Nayu 1 - Godope Awananapa Gilala

¹ Ma:ma enoba Elikosonapa dalagi Nayumate taote opa:ya ediyala tida:yana gi, Godote Niniba baiga gima ma:ma gi oba itumiyana.

LODote Niniba baigadima ga:oloyana gi

² LOD enoba sosawe gima nugu elotanapa God, LOD wisa eladele kabigibegale ga:olotelelo. LOD oba dima giwa:la edelina lumadima wisa dapulotelelo, a:pite obate obape giwa:lanadima ga:olamunotelelo.

³ LOD pa: sela ga:otanapa, obape kamali kabigibega, LODote sosawenage layana luma pa:pa wisa bini a: na:sa:da:minamalelo. Obate waminanona nabidi paiwa ganabita: gogota:te wamidilina gi a:na:pi, a:pite iti enobai obape a:i pulu.

⁴ Oba wasewa anadolote wi apada:munotelelo, Wasewa waelabega gobana wi obate apada:mitelelo. Basan wata: Ka:mel wata:la apedilina lopala waelabeyagai sesedili, Lebanon wana ikala iya:ta: sesedili.

⁵ A:pite saka sisidina gagaga edelamadili obape sosoko palala, gwama a:i saka ka:ekelete binida:madili. Obate pa:lelola a:ite gaga elamalelo a:pite a:ibaigata: gwama a:mala edelina luma waelabegata: sasiwadelamadili.

⁶ Obate ga:olamalelona powate lelolamaleloya. Obate kabigibegale ga:olamalelona tepala powate elamaleloya. Obape ga:o gi enoba ila a:na:pi, obate a:na:minamalelo, obape lopa palala ba:kele babasa:mida:madili.

⁷ LOD enoba sa:lebapi, gite menebega etelelona tepala oba enoba a:wa saba. Obape a:wa sabale edelina luma obate sa:lele iwa:la elotelelo,

⁸ wi ganabile obate, giwa:lana dapolale dapolamalelo, a:pite obate giwa:lana iti kanabi gobama datawamunamalelo.

⁹ Obai LODdima sosawe a:na:mina gi iwalelamadilina, LODote ya:ma gi ekeminamalelo. A:pite obai pa:pa gwama patimada:te oba asakamainamadili.

¹⁰ Tokobe olate obai papada:minamadili. Sika nidelete daledale edelina luma a:na:pi obai daledale edeli, ilate tila oloda:lona gi a:na:pi obai binida:minamadili.

¹¹ Nineba baiga, a: gobala LODdima sosawe gi a:na:mina nabidi uwalolona lumagi a kekeyana, obate sosawe a:na:da:mina gi luma ituda:minano.

¹² Ma:ma enoba LODote lalelona gilala. Oba a:negelalelo, obai amowada:na luma waelabega a:meta, ameta giwa:lanate obai dapoliwila obai wama kaokolamadili. Yuda, na: a: dima alikikimina a atayamana, ameta amapulala na: pa:pa gwama a: dima alikikimina atamalowa.

¹³ Obaite a:dowali madama kamiyana lopala na: amapulala ka:minamalowa, obaite auli taole a: papamiyana, enoba tao na: ta:mite wama milamalowa.

¹⁴ Nineba baiga, LOD a: gima gilala a lawena. Oba a:negelalelo, a:dowali gagida:na luma, enobai a:dowali a:iwani, bini balama eda:madili. Obaite maile ukuluta: aulita:le a:na:da:miniyana ididali, enoba a:dowali awanana gegenama gobala dowatilina lopala, na: ka:ka:munamalowa. A:dowali olawa a:idoba tute a: gima sa:leminamalowa, gi ase a: sosawe gi a a:na:da:munoyana.

¹⁵ Tila, podo sidila pa:lelona dalagi sa:lenapa gilala egete pa:lelo, a:pite gela gilala ladolo nagala apila gima. Yuda a:dowali awanana poko gi sa:leda:mu, e gibapile ladoloyana gilala a: a:na:da:mu. Sosawena lumate pa:pa gwama a:dowali wa gobama pa:da:madili, obai a dapolale dapote binida:miyana.