Malak 4 - Godope Awananapa Gilala

LODope kadepate pulamalelona gi

¹ LOD Kamalinapate lalelo, sosawe gi a:na:da:mida:na lumata: gwama na: awagana:na lumata: da:dima kadepa pulamalelo obaite kakapa ilate oloda:lona a:na:pi eda:madili. A:ma kadepala da: ila gobala binida:madelewa a:pite da:pe eta palate pa:pa dololamalelo.

² Ameta na: emona luma, sogolanapa kadepate da:dima obape a:ita gobala dololona kanika:wada pulamalelo. A:pite da: kaka pasala eda:te sa:kelada:da wama saoda:madelewa, ta gobala edelete wama saoda:madilina buluku kokowabi a:na:pi.

³ Ne gi a:na:minamalowamena kadepala da: a:mai sosawe gi a:na:da:mida:na luma a:i pulu a:na:pi etoda:minamadelewa, LOD enoba gi lalelo.

⁴ Da: na:dowali gisaolanapa dalagi Maosesepe itumina gilala ege kobele eda:madelewa, enoba ne Sainai sakala da: gima oba dima apuloyamana babala.

⁵ Da: tila, LODope ga:o kadepa da:dima pa: pa:lelona tepala na: lope da:dima pa: eda:na gi lope ladolotanapa dalagi Ilai auwaminamalowa.

⁶ Obate pa:te wawata: gwama segeta: opa:ya litata edilina gwama menagi da:minamalelo, na: a:ma gi pa:pa a:na:minamalowamena tepala ne auwaminamalowamena ga:o gite da: dapolamalelo.