Malak 1 - Godope Awananapa Gilala

¹ LODope gilalate Islael lumadima pa:yana Malakaipe magatale.

LODope awe iwalela gi Islael lumadima

² LODote a:negelalelo, na: da: awe iwalelale iwaledoloyamana. Da: ameta na: nanala. A: a:ta:pi sa: awe iwalelale iwalesa:loya. Iso pa: Ya:ikobape kakata. LODote a:negelayana. Na: ameta Ya:ikob awe iwalelale iwaloyamana.

³ Na: ameta Isodima ga:oladele obape ela saba podo saka waelabeyagai sa:sa:lena gite pa:pa dowatelamada:le gi bininapa wa miyamana. A:pite obape ya:biya:bi gi a:na:pa wa ite pa:pa apedilina wala edelina wa soka:dima datayamana.

⁴ Isope wapiki palanate Idom wala a:negelalili, sa: enobai a pa: awapada:na gi binina luma edela:. Sa: se ma:ma pa: awapanapa sosawe dolabega ete dololona gi gwama sa:lemite baiga gwama a:na:minamadili. LOD Kamalinapate lalelo. Obai kanika:napa baiga gwama a:na:minamadili. Na: ameta ya:ma baiga gwama lapote sosaweminamalowa. Obaimunu wa enoba sosawe bapinapa wa elamalelo, sosawete dolamunamalelo. Lumate LODope ga:o gi gobala elomina tepala edelamadili.

⁵ Da:pe tao bapile ma:ma gi tiladele amale gilala a:na:pi lala eda:madelewa, LODope kabigi gite Islael lumumunu a:i a:yata giwida:lo.

Guwali dalimunu sosawenapa oko gi

⁶ Pulagite obape wawa ewama:dele oba dima baolelelona gi a:na:pi pa:pa gisaolapate obape apeyanapadima iya:ta: enoba a:na:pi elamalelo. Na: wawa elamalowamena tepala ba: na: ewama: gi,na: dima gi a:ta:pi dola elamaloya. Na: enoba da:pe apeyanapa, da: pa: awapada:tana: dima baoda: gima. LOD Kamalinapate lalelo. Da: guwali dala, da: na:pe gagi sosaweminadele a:negelatedelewa, a: sa: itusa:mi. Sa: a:pe gagi powa gile sosawe minetedela:ya.

⁷ Da: sosawena nana lopala na: balelamina awana igenamama aliletedelewa. De ameta latedelewa, sa: a:ta:pina sosawena gi a: dima a:na:minetedela:ya. Enobala na: da: dananowa, da: LODope awana igenama a pa: awapanapa a:na:mina gile sosawe miyamana.

⁸ Da: tao pesapesana anekeyapo Gododima awanana nagala lopala a:na:pi apiletedelewamena gi pa: sosawege lalelewata. Da: a:i sauda:na anekeyapota: gwama gitetila gida:na anekeyapota: Gododima apiletedelewamena gi pa: sosawege lalelewata. Aga a:na:pinapa sosawenapa nagala lopala a:dowali gabamani dima atate ti. Obadima sa:kela atamalelota, LOD Kamalinapate lalelo.

⁹ LOD Kamalinapate lalelo, guwali dala, da: Godope nagala gima oba timo mite tila. A:pite da:pe maile oba dima nagala eda:te tila. Obate da:pe nagala lopala awapage lalamalelota.

¹⁰ LOD Kamalinapate lalelo, Na: iwimina:nowa da: gobala eta lumagi pa:pa tilalowa ya:ma balelamina genama ogosa kamina gima a:pite da: sosawena gi pa:pa a:na:da:minadele na:dowali gagi sosawe minamadelewa. Da:pe mailena: dima nagala eda:madelewamena nagala lopala gima na: pa:pa awapage lalamalowa.

¹¹ Kadepate dilelona palata: gwama siliminanona palata:le na:dowali gagite kabiginapa elelo, enoba a:ibaiga wa kabigibegale. Waelabega a:ibaigala lumate na:dowali gagi gima sa:lele ipowada:na nagala lopalata: awapada:na nagala lopalata:le balelaminamadili. Gi ase na: enoba Kamalinapa LOD.

¹² Ameta de na:dowali gagi iya lopala minenewa da:pe a:na:mina gile. Da: soswena nagala lopalana: dima napinenewa, amale de latedelewa ma:mai lopala awapada: LODope awana saba sosawemina gima.

¹³ Da: na:dile wama esa:da:dele latedelewa, sa: gamobega edela: LOD Kamalinapa balelaminena:mena. De ilile aleleyamana anekekeyapota: gwama a:i sauda:nata: gwama gite tila gida:nata: da:na: dima napinenewa ne awapage lalamalale.

¹⁴ Powate lumagite obape sip wai ta gobala sapenapa dalagi sip wai Lod dima ata gi late ameta eta palewadanapa atamalelona a:ma lumagite pa:pa awapa elamalelo gi ase na: enoba kabiginapa Kanaba, Kamalinapa LODotelalelo, a:pite a:ibaiga kabigibegale na:dowali gagi awanada dololamamlelo.