Maik 7 - Godope Awananapa Gilala

Islaelpe sosawe a:na:mina gi

¹ Awe iyo na: kabeya, Na: enoba gwi tepana adami gaogoda:mida:napa lumagi a:na:pi elelowa, tokobe adami tukuda:mina sabala ga:lip adami a:ididi bini ne nana gima. Lopana nana ulama dowata tepala ediyana pigi adami bini bapi ne iyawa elamalale.

² God emona luma a:ma wala a wama saodiyana, Eta gi sogolanapate pa:pa elelo. Dala waelabeyagaite dede samina gima atolominadele dowatili, etate obaya obape wabeya tiyale egela gima sima elelo.

³ Obaimunu mai saki sosawe a:na:mina gima a itawa bapi ediyana. Obai apeyanapate lumadile nagala lopalama gi alilelo, a:pite gi babamida:napate pa: nabidile lopala iwida:mineno. Kakamalina lumate kamalile obaite iwida:mininina lopala apeyana edeli. Obaite sosawena gi menagimite a:na:da:minini.

⁴ Obaimunu sa:lenapa gi enoba posonapa i a:na:pi obaimunu uwapa gi enoba tokobepe abele a:na:pi Da:pe wa lawilana dalimunu kadepa a pa:wena, enoba Godote da:dima saolamalelona kadepa. Amapula enoba obaimunu emosa:mida: kadepa.

⁵ A:dowali ebatanapa ege gibapimunamalelo a:dowali sopodalagi dima a:pe gibapimina gi pa:pa milamalelo. A:da tene sabale etapate teneleleona susa:gi iya:ta: a: oba tiladele a:dowali gwalema: gilala sa:lele bapi.

⁶ Pulagite obape wawa dima pa:pa gima kaminamalelo aminagite patate obape agi dima giwa:la elamalelo, apilate obape apila dima giwa:la elamalelo enobala dalagipe giwa:lanapa enoba obape genama gobana luma bapi.

⁷ Ameta na:, na: LOD menagi dima enamada:dele atolomunamalowa. Na: God na:dowali galabe pawaminapa atolomunamalowa, na:pe God na:dowali gilala enamamalelo.

Islael Godope gilala enamayana gi

⁸ Na:pe giwa:lanapa, ege na: awagolamalelo, na: a:ima dilayamana, ameta na: gwama patamalowa. Na: iti kanabi gobala mananowa LODote na:dowali lulila elamalelo.

⁹ Gi ase na: oba dima a sosawe eyamana, na: LODope mene itawa elamalowa obate na:pe gi sa:leminamalelona tepama a:pite obate na: gobana gi gwama pakakaminamalelo. Obate na: lulilama gwalina:te saolamalelo, na: obape sogola gi tilamalowa.

¹⁰ Amale na:pe giwa:lanate tilamadili obai amale pisala gite alolamalelo, na: dima gilala layana susa:gi. A:dowali LOD ba:maya, na:pe tao sakile obate dilamalelona gi tilamalowa, ma:ma tepa bapile oba iya:ta: a:ile etominamadili nabidinapa boda a:na:piminamadili.

¹¹ A:pe baiga ta a:na:mina kadepa pa:lamalelo, enoba a:pe a:i a:yatada: wabegada:mina kadepa. Isipt wale asemite wete Yupala:itis wama saola iya:ta: enoba a:na:pi elamalelo gwama eta wasewale asemite wete eta wasewama saolamalelo a:pite eta podole wete eta podoma saolamalelo.

¹² A:ma kadepala na: da:dima pa:lamalowa Asiliya wale pa:lamalowa gwama Isipt wape kabiginapa baiga gobale pa:lamalowa. Isipt wale asemite wete Yupala:itis wama saolamalowa, a:pite eta wasewale asemite wete eta wasewama saolamalowa, gwama eta podole asemite wete eta podoma saolamalowa.

¹³ A:ibaigate sosawe dola bega elamalelo amale edelina lumumunu gile. Enobai obaimunu a:na:da:mina gile.

Timo gita: Ewamo gita:

¹⁴ A:dowali a:ikole a:dowali luma iwa:la eo, a:dowali wale edelina anekekeyapo gagasida: obaite obaiya eda:na luma edeli da:niya gobala, sa:sa:lena tilate apedilina wala. Awapa obaite Basana wata: Giliyad wata:la baya naenamadili lopena pa:na:diyana kadepana gi a:na:pi.

¹⁵ De Isipt wala wama saoda:te pa:deyamana kadepa a:na:pi, na: obai na:dowali memelada:na gi ituda:munamalowa.

¹⁶ A:i baigate a:mai gi tida:te pisala edelamadili, amale obaimunu kakamalite binida:madili, obaite obaimunu magata maile kawapidelamadili, a:pite obaimunu igibite tuda:madili.

¹⁷ Obaite malebe a:na:pi pulu totopeyadelamadili, gwanale wamidilina lopala a:na:pi edelamadili. Obaite sasiwoda:da obaimunu a:i dodowaba gobale wama saodelamadili. Obaite emoda LOD sa:dowali Gododima eseda:madili a:pite obaite a: emodelamadili.

¹⁸ Powate a: God a:na:piya, obate sosawena a:na:da:mina gi sawada:munote kobele etanapa, obape wala edelina na:sa:da:miyana lumadima. A: pa:pa elomina tepala ga:olotanapa ameta kabiginapa awe iwalela gi kekemina gima sa:kelalo.

¹⁹ A: gwama sa:dima sa: iwalesa: gi a:na:minamalelo a: sa:dowali sosawe gi a:pe a:ile etoda:minamalelo a:pite sa:pe pa: sogoda:na gi waelabega gaolanapa wasewa gobama ba:ba:minamalelo.

²⁰ A: Ya:ikob dima gibalamanapa elamalelo a:pite A:ibala:m dima awe gi kekeminamalelo a:e lopena kadepala wawata:mi dima gibalamale layana gi a:na:pi.