Maik 6 - Godope Awananapa Gilala

LODope galabe giala Islael lumadima

¹ LODote lalelona gilala enamada:la, Patimada:la, podoma da:pe gilala ladela, Awapa saka pokopoko eda:te de ladelewamena gilala enamada:madili.

² O podo, da: LODope anada: gilala enamada:la, enamada:la da: elomina tepala a:ibaigala dowatilina sokokate. Gi ase LOD obape lumadima gi bamina gi a:meta. Obate Islael lumadima gi egete pa:lelo.

³ Na:pe luma, na: powa gi da:dima a a:na:miyamanaya, na: miya gile da: a mene da:miyamanaya, wisa gilala na: nanala.

⁴ Ne Isipt wale da: wama alete saoyamana a:pite taole papamina gi gobale edeleyamana wa gobale ne da: kaka pasalana da:miyamana. Na: Maoses auwamiyamana da: lopadamate wela gima a:pite Elonta: Miliya:mata:.

⁵ Na:pe luma, da: iwalela, Mowa:b wanapa kanaba dalagi Balak obate powa kakami gilala da:dima ladoloyana gita:, a:pite Boepe pulagi Balamate wisa eyana gita:. Da: de Sitim wale Giligal wama na:deyamana gi iwalelelewata. A:na:pi de LODope sogolanapa a:na:mina gi itawa eda: gima.

⁶ Na: powa lopalada LODope sososko palama saolamalowaya a:pite Awananapa Sidibapinapa LOD dima baolamalowaya. Na: ilale oloda:na nagala lopalada saolamalowata, enoba gogo menagina buluku kokowabida.

⁷ LOD sip kokowabi waelabega tida:malelona tepala oba sa:kelolamalelota. Gwama 10,000 wite saeolapela elamalelona owele tini iya:ta:. Na: awapata na:pe lopanapa pulagi na:pe sosawe gima wisa elelona lopalamina gima. Enoba na:pe obepe adami ulama ameta na:pe limope sosawe wisa elamalelo.

⁸ Dalagi, obate dabalibapinapa gi a: dima a kekemiyana, LOD a: dima powa gi iwiminanoya. Sogolale gi a:na:minadele a:pite gela gi awele iwalolamalelo, a:pite a:pe Gododa waminadele a:ya a: kowabiminamalelo.

Islaelpe Sosawe gi wisa

⁹ Enamada:la, LODote kabiginapa baiga dima mamamida:lo, a:pite a:dowali gagi emo gi enoba sa:kema gi. Enobala gabipe amowa kakami gilala enamada:la, a:pite oba omona:yana lumagi.

¹⁰ O sosawe gi a:na:da:mida:napa genama, na: kobele elamalowata, a: e ilile wisa kabigida:na lopala alelowemena gita: a:pite sewatanapa awapamina gita: a:mai enobai galabe gi edilita.

¹¹ Na: awapata sewatanapa awapaminale a:na:miwamena okope wisa gilalale dalagi gasumina gima.

¹² Obape lopala waelana dala enobai sosawena edeli, obape luma enobai sewatana a:pite obaimunu ma:la:pilate sewatale gilala ladeletedili.

¹³ Enobala na: a: lapola gi asemiwamena a: kaowaminamalale, gi ase a:pe sosawe gima.

¹⁴ A: baya naonamalelo ameta a: gwana pa:pa ilamalelo, a:pe gwana gobala bayate pa:pa dololamalelo. A: lopala gwana elamalelo ameta eta:mi lopalate a:dila pa:pa dowatelamadili gi ase a: e gwana elamalelona lopala na: ameta giwa:la gili dima apulamalowa.

¹⁵ A: lopala tolamalelo ameta nana ulama pa:pa alolamalelo, a: Olib owele tukumina sabale owel kabigibega egelamalelo ameta a: a:ma owel, gi pa:pa a:na:minamalelo. A: ga:lip adami tukuda:munamalelo ameta a: ya:mai waen pa:pa nidolamalelo.

¹⁶ A: Omilipe ikewa balelamunoyana a:pite a: A:iya:bape genama gobana gi balelada:munoyana. Enobala na: a:e sosawe elamalale a: auminamalowa, a:pite lumate a:dowali luma iyada:minamadilina gima auda:minamalowa. A: a:ibaiganapimunu iyamina gi gobala elamalelo.