Maik 5 - Godope Awananapa Gilala

Beteliyem baigala kanabate elamalelona gi

¹ Giwa:lana dalimunu gagile dololona baiga, a:dowali giwa:lana dala giwa:lama sa:leda:mu, galabete a: gima sa:lete dololo. Obaite Islaelpe apenapa obape apayama lapolamadili.

² Ameta a: Beteliyam Epalata, a: Yuda udaga kabigibega gobala kowabinapa elelo, a: gobala etate na: gima saolamalelo. Enobate Islael kabigibega apeyanapa elamalelo. Obape gibalama sokate obape iniwa tepala asemite pa:la.

³ Enoba gi asele Islael wa a: dololola wete susa:gite pulagi aminamalelona tepama saolamalelo. A:pite obape iyani menagigida:te gwama baigama pa:da:madili Islael dima gwama ga:eda:mada:le.

⁴ Obate lelate obape Sip iwa:la elamalelo LODope kamalile, enoba obape LOD Godope kamalile. Amale obaite galabe gi bini sa:lele edelamadili, amale obape kabigi gite a:ibaiga a:yatada: atida:malelo.

⁵ A:pite obate obaimunu gela elamalelo. Asiliyana lumate sa:dowali wa lapolamadilina kadepala obaite sa:dowali ba:kelele kalekale a:na:mina ediyana baigale a:i saominamadili, sa: 7 sip tida:na dalata: gwama 8 gaganabina dalata: oba asakamina gima pakada:minamadili.

Galabe pawamina gita: Alikikimina gita:

⁶ Obaite giwa:la gilile Asiliya wa apeyana edelamadili, a:pite giwa:la gili egete Nimlod wa apeyana edelamadili. Obate Asiliyape apeyanapa gobala sa: wama alesa:te saolamalelo. Obate sa:pe wa lapolamalelona tepala, gwama sa:pe wa a:yatada:la a:i saomunamalelona tepala.

⁷ Ya:ikobope na:sa:da:miyana luma menagigida:te, waelabega luma gobala LODope mimida:bi a:na:pi edeli., Gwama gwi pulu tila sidila dololona gi a:na:pi edeli, obai lumama pa:pa enamadili O luma pa:pa iwida:minini.

⁸ Dibulama alete na:da:dele na:sa:da:miyana Ya:ikobope luma menagigida:te eta:mi a:ibaigada edelamadili, luma waelabega gobala. Laiyon a:na:pi da:niya gobana wa waida elelo. Apela kanika:napa laiyon a:na:pi sip gagasila gobala elelo, a:pite oba amowanapate pa:pa amowamalelo.

⁹ Da:dowali mai giwa:lanadima pakakamite obai dapolete binibapida:minamdelewa. A:pite a:dowali giwa:lana waelabegate sosawe eda:madili.

¹⁰ LODote laleo, a:ma kadepala na: da: gobala da:dowali oso dapodamamalowa. A:pite osote silida:minetedilina gawa sosaweda:minamalowa.

¹¹ Na: da:dowali wa gobana kabigida:na baiga dapodamamalowa, a:pite da:dowali kakaleda:na eda: sasaba gagamunamalowa.

¹² Na: da:dowali wasiwa gi dapodamamalowa a:pite da: pa:pa gwama wasiwape kamalima na:delamadelewa.

¹³ Na: da:dowali maile a:na:da:mineyamana ikewa lopalata: a:pite da: gobana awanana ba:keleta: dapodamamalowa, a:pite da: pa:pa gwama obai dima baodelamadelewa, a:mai enobai da:dowali mai gweya lopala.

¹⁴ Na: da:pe Asela salo atilidolamalowa a:pite da:dowali ididalimunu kabigida:na baiga waelabeyagai gagamunamalowa.

¹⁵ Na: ilabegale ga:oladele da:dima da:pe sosawe gi wisa dapulamalowa. Enoba na:pe gilalama pa:pa gima kamideyamana lumadima.