Maik 4 - Godope Awananapa Gilala

LODope Saka gi

¹ A:yatadana kadepala LOD balelamina genamate lelalona saka a:na:minamadili, waelabega saka gobala obate sidinapa saka elamalelo, eta:mi saka waelabega obate giwida:malelo, A:pite luma waelabegate oba dima gaogominamadili.

² Waelabega a:ibaigate oba dima pa:da:te a:nege lalamadili, pa:da:la, saga LODope podo sakama dida:. Ya:ikobape Godope genama sabama. Obate obape gi sa: itusa:minamalale, se obape nabidile wamidelamada:le. Sayon sakala babala gite wama saolamalelo, Yelusalem baigala LODope gilalate wama saolamalelo.

³ Obate waelabega luma gobala gi bamina gi a:na:minamalelo, a:pite kakamalina wabegana wala edelina lumumunu menemenena gita: gwama kabigida:na baigabaigala edelina lumumunu menemenena gita: sogolada:munamalelo. Obaite obaimunu giwa:la gili ameta a:i pasada:mina lopala a:na:da:minamadili. A:pite obaite obaimunu gili kibili ameta ga:lip ta:ta:mina gili a:na:da:minamadili. Eta a:ibaigate eta a:ibaiga dima pa:pa giwa:la gili waisole giwa:la elamalelo. Gwama obai pa:pa gwama giwa:la gima luma ituda:minamadili.

⁴ Dala waelabeyagaite obaiya obaimunu tokobe adami i a:iya:dela mitatelamadili, a:pite obaimunu pigi i a:iya:dela, a:pite eta lumagite obai emo gi pa:pa datamalelo, gi ase LOD Kamalinapate a lawena.

⁵ Waelabega a:ibaigate a:i saowaminamadili, obaiya obaimunu ididalimunu gagile. Sa: ameta sa:dowali LOD Godope gagile elomina tepala wamidelamadili.

LODope Bata Gi

⁶ LODote lalelo, a:ma kadepala, na: a:i sauda:na gaogoda:munamalowa. Na: wama alete na:diyana luma gaogoda:munamalowa, a:pite ne gwanasaweda: eladele alete pa:yamana luma.

⁷ Na: a:i sauda:na luma ameta lumadana da:minamalowa. Obaite kamalinapa a:ibaiga wama egete na:diyana, LODote Sayon podo sakale obai apeyanapa elamalelo, a:ma kadepala asemite elomina tepama.

⁸ O sip gagasila lawilanapa saba, gilala a: dima ma:na:pi dololo. O kalekalenapa baiga Sayonope aminagi, a: e a lope apeyanapa eloyana gite gwama a: dima pa:da:madili. Yelusalemape aminagi dima kanaba gite gwama pa:lamalelo.

⁹ Amapula a: ase ba:ya mamale adimadolona, a: kanaba dalagi binita. A:dowali gi sogoda:na dala a wama kaokoliyanata, a:ma gite pulagite ipa:la ewela susa:gite enamonamalelona alikikimina a:na:pile elelota.

¹⁰ O Sayonope aminagi, a: alikikiminada talapololo pulagipe alikikimina enamanona susa:gi a:na:pi. A: auwapula kabiginapa baiga elatelamalelo wa gobala bikiwa a:na:mite ela gima. A: Ba:bilon wama welamalelo amale lumate a: amowamadili. Amale LODote a:pe galabe pawaminamalelo.

¹¹ Ameta amapulala waelabega baigabaigate a: dima giwa:la gima gaogoda:minini. Obaite a:nege latedili, awapa oba sosawe minamadili. Sa:pe taote Sayon saka gima sa:keladelamadili.

¹² Ameta obai pa: itawada: LODope gi iwalela gi. Obai obape bata gi pa: itawada: enobate obai wit a:na:pi papada:mina genama gobama alete gaogoda:mineno.

¹³ Patate obai dapo, O Sayonope aminagi, gi ase na: a: dima auli kalita apulamalowa, na: a: dima blons a:i kati apulamalowa a:pite a: waelabega a:ibaiga ka:ka:munamalelo. A: obai dapolote obaite ilile aleliyana sa:sa:lena lopala waelabega alelote pa:te LOD dima apulamalelo. Enoba a:i baigana waelabeyagimunu LOD.