Maik 3 - Godope Awananapa Gilala

Gaganabinata: gwama Godope gilala ladeletediliyana dalata: danadoloyana gi

¹ Amale na: layamana, da: Ya:ikobope gaganabina gilala enamada:la, da: Islael genama gobala edelewamena. Da: sogolanapa gi bamina gi itawa eda: awapa.

² Da: sogola gima ilapala eda:dele ameta sosawe iwiminenewamena luma, na:pe lumumunu kaka ta:ta:minenewamena luma gwama obaimunu gosasa gobala sesepo ta:ta:minenewamena luma,

³ da: na:pe lumumunu sesepo nanelewamena luma, obaimunu kaka wama kwakwaminenewa, a:pite obaimunu gosasa alisasi bapida:minenewamena luma, amale sosopane gobanapa sepo apela minenewa.

⁴ Amale obaite LOD dima mamida:madili, ameta oba obaimunu gilala pa:pa wisa elamalelo. A:ma tepala obate obape sosoko obaile wama esa:minamalelo gi ase obaite a:na:miyana sosawe gile.

⁵ Ma:ma enoba LODote lalelona gilala, a:te pa: saoda:na gi lope ladeletana daladima enobaite na:pe luma wama alete ka:odili. Menagi lumagite obai baya dapulamalelona obai gela gi kekeda:minini. Oba ma:ma gi pa:pa a:na:minamalelona obai ameta a:ma lumagidima giwa:la gile wisa ata gima sa:ledili.

⁶ Enobala taote opa:ya ediwila inigwile gi pa:pa tidelamadelewamena iti kanabite da: kawapida:malelo. A:pite wa itilamalelo, ugu limote da:dima pa:pa gwalemenamadili. Pa: saoda:na gi lope ladeletana dala dima kadepate siliminamalelo. A:pite kadepa lulilate obai dima iti kanabi elamalelo.

⁷ Obai waelabega obaimunu sosoko kawapida:madili. Gi ase Gododile eta wisa gilalate pa:pa saolamalelo. Wa iwa:lanate pisala eda:madili a:pite gwama awanana iya:ta: pisala eda:madili.

⁸ Ameta na:, kamalite na: a tawana:miwina, enoba LODope limope kamali, sogolale kamalile gi bamina gi na: ituna:miwina, Ya:ikob dima obape pa: saoda:na gi waelabega anadolamalale, a:pite Islael dima obape sosawe gi anadolamalale.

⁹ Ma:ma gile enamada:la da: Ya:ikobope genamana gaganabina dala, da: Islaelpe genama apeyana dala da: sogolanapa gi bamina gi ilapalana dala a:pite sogoda:na gi waelabega ilapalana dala.

¹⁰ Da: Sayon saka a dede samina gile a:na:minenewa, a:pite da: Yelusalem sosawe gile a:na:minenewa.

¹¹ Obape gaganabinate wisama gi babamina gi a:na:da:minini, obape guwali dalate wisa gima wala gilala ladili, obape pa: saoda:na gi lope ladeletedilina dalate pa: saoda:na gite saoda: gima lope ladeliyana, kipale gosa alelamada:le. A:ma gi gobale obai LODope gagile gilala gwalemini. LOD sa:da elelota. Sa:dima eta galabe gite pa:pa pa:lamalelo.

¹² Enobala da:pe ya:ma gi asema Sayon saka egada a:na:pi pasaminamadili. Yelusalem baigate kola:te sosawe dola bega elamalelo. Balelamina genamate lelaloyana saka ameta oladana tilate apedilina saka elamalelo.