Maik 2 - Godope Awananapa Gilala

Aitapadilina luma ilapala da:mininina lumumunu wisa gi

¹ Galabete da:dima sa:lete dololo da: sosawe gi bata edelewamena lumadima. Obaimunu tene sasabale dowatate a:mai sosawe a:na:da:mina gima bata edelewa. Ibasegenapa kadepa lulilale obaite a:mai bata gi a:na:da:minini, gi ase a:mai gi a:na:da:mina gima obaimunu kamali gobala dowatili.

² Obaite iwida:miniyana a:i kamalile luma dile aleletediliyana, gwama gegenamata: aleletediliyana. Obaite eta dalagipe genama egema:te, gwama sopodalimunu lopala aledamenetedili.

³ Enoba gi ase. LOD a:nege lalelo, na: aitapadilina luma ilapala da:mininina lumadima mene gi datamalowa, a:mai gi gobala da: da:ya da:pe galabe pa:pa pawada:minamdelewa. Da: pa:pa gwama kenatekenatale wamidelamadelewa, gi ase a:ma enoba galabe tepa elamalelo.

⁴ A:ma kadepala lumate a: ilapala minamadili, obaite a: iyaminadele ma:ma sabe dili a: dima gwaledelamadili. Sa: a sosawe bapi eda:mena, na:pe lumumunu lopala a tepama ka:ka:miniwina. Obate na:dile egewena obate sa:dowali a:i eta:mi atakabina lumadima dapulowena.

⁵ A:te enobala da:dile eta LODope gi gobala elelona lumagi bini obate sa:lele gititiwa gi a:na:mite a:i babamunamalale.

Sewata ituda:mida:na gi

⁶ Obaite latedili, sa:dima gilala ege ladela, pa: eda:na gi ege lope ladela. Da: ege ma:mai pa: eda:na gi lope ladela. Pisala gite sa: pa:pa kawapisa:malelo.

⁷ Ya:ikobope sege ma:na:pi gilala lala gima awapa, LODope limo ga:olelota. Oba ma:na:pina gi a:na:da:mina gi awapata. Na:pe gilalate sa:lenapa amowa gi elelo, sa:lenapa gi a:na:minanona lumagidima.

⁸ Ameta amapulale na:dowali luma a patimadiwina enoba giwa:lana luma a:na:pi. Da: wisa kabigida:na kaliko a wama kwaima:yamana, pa: gi pa: gi eda:dele nabidi tepala na:diliyana lumadile, giwa:la sabale gwama baigama pa:diliyana dala a:na:pi.

⁹ Da: na:pe lumumunu ato wama datamideleyamana obaimunu sa:sa:lena gegenama gobale. Da: na:dowali a: dapilalowamena sa:kelamina gi a elomina tepama wama milelewa, Obaimunu sege gobala.

¹⁰ Patimada:te, wama na:da:la, ase ma:ma pa: da:pe a:me saba. Gi ase oba a sosawe ewena, oba a titimiwina, oba sa:lela gima nabidi bini.

¹¹ Sewatanapata: gwama gasumitada:napata: etate pa:te lalamalelona, na: a: waenta: sikata: alela gima pa: elanapa gi lope lalamalowa, obate ma:mai lumumunu pa: eda:na gi lope ladolotanapa dalagi elamalelo.

Galabe pawamina gi

¹² O Ya:ikob, na: gibalamale da: waelabega menagi sabama gaogoda:munamalowa, na: giwa:lale wama alete saoda:dele na:sa:da:miyana Islaelana luma gwama menagida:minamalowa. Na: obai ta gobana sip a:na:pi gaogoda:munamalowa. Sip gagasila a:na:pi sa:sa:lena tiladanapa wala edelamadili. Luma waelabeyagaite a:ma wala edelamadili.

¹³ Nabidi a:na:minapate ogosa gamite obai lopadamate welamalelo, obaite ogosale wama saoda:madili. Obaimunu kanabate obai lopadamate welamalelo, LODote obaimunu lopa bapi elamalelo.