Maik 1 - Godope Awananapa Gilala

¹ Yotamata: Eyasata: Esekayata: obaite Yuda wa tiliyana tepala, LODote Maikape tao opa:ya da:miyala obate Samaliyata: gwama Yelusalemata: dima saolamalelona gi tida:yana.

² Luma da: ma:ma gilala enamada:la, a:i baiga a: enama, gwama a:mala edelina luma da: enamada:la. Enoba Sidinapa LODote da: gima gibabanapa elelo, LOD obape Awana balelamina genamala enoba gi lalelo.

Yelusalemata: Samaliyata: obaimunu gi bamina gi

³ Tila, LOD obate obape elelona sabale pa:lelo, obate pelote a:ibaigana sidina saba etoda:minano.

⁴ Podote oba a:iya:dela sosela:dili a:pite golo gogobate tetepama babelili walaga sape ilate olololola sosola:dilina gi a:na:pi sosola:dili, wi a:na:pi ilatatale sa:elelo.

⁵ Ma:ma Ya:ikobape sosawe gi waelabegape mene, Gi ase Islaelpe genama gobanate a:na:miyana sosawe gipe wisa. Ya:ikobape sosawe gi powaya. Pa: Samaliyape sosawe gita. Yudape sidinapa saba powaya. Pa: Yelusalemata.

⁶ Enobala na: Samaliya wa titimite kakapa wa minamalowa, tokobe adami tola saba minamalowa. Na: obape ba:kele waelabega golo dobama ilitatada:minamalowa a:pite obape sokate kekeminamalowa.

⁷ Obape ididali waelabeyagai ka:ka:munale ka:ka:munamalowa, obape balelamina genama gobana nagala lopala waelabega ilate oloda:malelo. Na: obape anekekeyapo imimina lopala waelabega dapolamalowa. Obate obe ewada: gile aleloyana nagala lopala waelabega, obaite gwama obe ewada: gima a:mai lopala alilamadili.

Gwanasaweda: gite Yelusalem dima pa:loyana gi

⁸ Ma:ma asema na: adimada:dele sabelamalowa, na: a:i lopala bini abadu wamunamalowa. Na: wa soka: a:na:pi audolamalowa, a:pite obo puwida: a:na:pi giladolamalowa.

⁹ Gi ase obape meleda sa:lemina nabidi bini, a Yuda dima pa:wena. Obate na:dowali lumumunu ogosa tepa bapima a pa:wena, enoba Yelusalem baiga bapima.

¹⁰ Gata baigala ma:ma gilala ege lala, pa:pa adimadelamadelewa. Pulule talapodelamadelewa.

¹¹ Abadu gita: pisala gita: eta:mi dima dapila, da: Sapil wala edelamadelewamena luma, Sanan wala edelina luma wama pa:pa saoda:madili. Bet Esel sabeda elelo, obape galabe pawamina lopala a wama egete na:diyana.

¹² Malot wala edelina luma alikikiminada talapodili, obai amowa gima enamadili, gi ase mene gi a LODdile obai dima pa:yana enoba Yelusalem ogosa tepama.

¹³ Lakis wala edelewamena luma, oso waite silidimininina sakana sa:liyot gawana taoma luma gagasila ga:ga:mina. Da: enobai sosawe gipe sokatena luma de Sayonope aminagi dima atayamana Islaelpe sosawe a:na:mina wisa a: gobama tiliyana.

¹⁴ Enobala a: asemite nagala lopala Moles Gat wama auda:minamalelo. Aksib kowabinapa baiga obate gasumitada:napa elamalelo, Islaelana kakanaba dima.

¹⁵ Na: kamalinapa giwa:lanapa dalagi a: dima auwaminamalowa, da: Moles wala edelewamena lumadima. Islaelpe lulila elelona lumagite Adulam wala pa:lamalelo.

¹⁶ Da: sabeda:dele da:pe ganabi tita aditila de obaima sa:keladewamena sege, obaiya da:pe ganabi kebele bapi da:minamadili, ase obaite da: gobala wama saoda:te dibulama na:da:madili.