Lut 1 - Godope Awananapa Gilala

Elimelekete obape segeda Mowa:b wama weleyana gi

¹ Amatabegala Islaelana lumate, kakamalina giwa:lana bini ediliyana tepala, obaimunu wa gobala nana lopalate binibapi ediyana, eta dalagi eloyana Yuda wa gobala Beteliyem baigala, obape susa:gita: segeta:da menagimite eloyana, obate Mowa:b wa gobala elasege elamalale weleyana.

² Dalagipe gagi Elimelek, obape susa:gipe gagi Naomi, a:pite obape sege sakimunu gagi enobai Mayalonta: Kiliyonta:. Obai Epalat udgana Yudiya wa gobala Beteliyem baigala edeliyana. Amale obaite Mowa:b wa gobama na:da:te a:mala edeliyana.

³ Obai a:ma wala edeliyana tepala Elimelek amale kaoyana, a:pite Naomite obape dala sege sakida oba kopa eloyana.

⁴ A:mai sege saki amale Mowa:b wana ato saki aleliyana, obaimunu gagi enobai Opata: Lutita:. A:pite 10 gogo a pa:na:diyala,

⁵ a:ma wapiki palale a:mai sege saki Mayalonta: Kiliyonta: iya:ta: amale kaokoliyana, amale Naomite obape dalagita: gwama sege sakita: bini oba kopa eloyana.

⁶ A:pite tepa lewasege a pa:weleyala Naomi LODote Islaelana luma gwama amowada:dele nana lopala waelabega dapuloyana gi enamayana, enobala obate apili sakida Mowa:b wa elatela gima sa:leyana.

⁷ Amale obai salikiliwate menagimite Yuda wama gwama asemiyana Ameta nabidi tepala.

⁸ Naomi obape apili sakidima a:negelayana, da: gwama da:pe baiga ya:bima na:te dape agita:mida elamalelewa. A:pite awapa LODote da: saki sa:lele amowadolamalelo, de na:ta: gwama kaokoliyana lumata: sa:lele amowaseleyamana a:na:pile.

⁹ Gwama awapa LOD menagite da: sakimunu dala gwama awalida: nabidi sa:leda:munamalelo de noneyada elamalale. Enobala Naomite obai saki guluda:minadele totoda:munote na:sa:da:mina gima nagala gilala layana ameta obai saki kabigibegale adimadiliyana,

¹⁰ obaite Naomidima a:nege laiyana, Awa, sa: a:da pa:lamalela: a:pe lumadima.

¹¹ Amale Naomi obai sakidima a:negelayana, Na:dowali amina saki, da: da:pe baiga ya:bima gwama na:na:malelewa. De na:da pa:la gi pa: awapa. Da: iwalelelewata ne eta:mi dala sege amunomela, de awalidelamalale.

¹² Enobala da: gwama da:pe baiga ya:bima na:na, gi ase na: kabeyagi bapi elelowa, na: pa: awapa dalagi gwama awa gima. Ne ama isala gwama dalagi awate sege mata tidolamalowamena,

¹³ da: awapada:madelewata obaite dala bapi eda: gima obai atolada:mina gima. Gwama da: na:dowali dala sege saki atolada:minamalelewamena, gite da: ekeda:minamalelota de eta:mi dala awalida: gima. Awa, na:dowali amina saki, da: itawada: ma:ma gi kalekalebega. LODotena: dima salipa gi a ma:yana enobala na: da: gima kabigibegale gwana saweda: elelowa.

¹⁴ Obai saki gwama adimada: gi asemiyana. A:pite Opa obape apinapaya guluminadele totomunote amale obape baiga ya:bima gwama weleyana, ameta Lutite Naomi kalekale gwalilabega eyana.

¹⁵ Enobala Naomite Lutidima a:negelayana, A:dowali ya:denapa a welewe obape lumata: idadalita: dima. A: obada we a:pe baiga ya:bima.

¹⁶ Lut ameta a:negelayana, a: ege na: usina:mu ne a: elatelamalale o a:dile wama saola gima. E miya wama welamalelona, na: a:da welamalowa. E miya wala elamalelona, na: a:da elamalowa. A:dowali luma enoba na:pe luma edelamadili, a:pite a:dowali God enoba na:dowali God elamalelo.

¹⁷ A: miya wala kaolamalelona na: a:mala kaolamalowa, a:ma sabama na: a:ima mina:madili. Awapa LODope sosawenapa ga:o gitena: dima pa:lamalelo, ne eta gi a:na:minamalowamena tepala, a:meta kaola gi menagite a:ta: na:ta: sa: baminamalelo.

¹⁸ Naomi amale Lutite obada welamalale obape gi iwalela pa:pa opa:yamiyana gi tiladele, eta gi pa:pa gwama layana.

¹⁹ Obaite na:na:le na:te Beteliyem baigama sauyana. Obai na:te Beteliyem baigama sauyala, a:ma baigana luma kabigibegale emosa:midiyana, a:pite atote a:negelaiyana, eya, ma:ma enoba Naomita.

²⁰ A:pite Naomi amale a:negelayana, da: ege na: Naomi gagile awana:mina, ameta da: na: Mala gagile awana:mina, gi ase Kamalinapa Godote na:dowali kanika:wa gobama sokamanapa gi a egete pa:yana.

²¹ Na: lopala ya:biya:bida ma:ma wa elateyamana, ameta LOD na: a salipa gida gwama gwalina:te pa:wena, enobala powa gi ase da: na: Naomi gagile awana:minenewaya, Kamalinapa Godote na: baiga naponadele na: dima galabe a ma:yana tepala. Kamalinapa LODote na:dowali kanika:wa gobama sokamanapa gi a egete pa:yana.

²² Ma:ma enoba Naomite obape Mowa:b wanapa apilada, a:ta:pi pa:la eyana gi, obai bali ta:ta:minadele papada:miniyana tepala Beteliyem baigama sauyana.