A:imo 9 - Godope Awananapa Gilala

LODote Gi baminamalelona gi.

¹ Na: LOD tiliyamana ba:kele i genama lopa palale lelaleyala a:pite obate layana. Balelamina genama salo lapoda: genama pakamite litatilina salote gagaga edelamada:le. Luma waelabeyagimunu gaganabima alete kola:madelewa a:pite pa:pa meleda eda:madilina luma ne giwa:la gilile dapolamalowa. Eta lumagi menagite pa:pa wama saolamalelo, pa:pa etate a: wama emolamalelo.

² Obaite ola:wape a:yata bapima a:i tutata kola:madilina, a:mala na:pe maite obai atida:malelo. Obaite sawisakama dida:madilina, na: a:mala obai alete pelolamalowa.

³ Obaiya obai Ka:mol podoma a:wada:minamadilina, na: a:mama obai uwalada:da wete alolamalowa. Obai na: emoda:te wasewa gobama kola:te a:ibapima a:wada:madilina, na: a:mala ugu lopala auwamimela obai munitodolamalelo.

⁴ Obaimunu giwa:lanate dibulama wabeganapa wama alete na:da:madilina, a:ma wala na: giwa:la gili anawamela obai ta:ta:munamalelo. Na:dowali tao na: obaima lotobadolamalowa obaite sosawena gi itawa eda:mada:le pa: sogoda:na gi.

⁵ LOD God enoba Kamalinapa LOD enobate a:ibaiga dalowaminamila soseledeletedili, a:pite a:mala edelina luma sabeletedili, Nael wasewa a:na:pi a:ibaigate toteketata dite a:pite Isipt wasewa a:na:pi kwaetelelo,

⁶ a:pite obape sa:lenapa kanaba genama sawisakama a:na:mite a:pite obape sokate a:ibaigama toda:yana, obate wasewanapa wi egete a:i baigama samitelelo, LOD enoba obape gagi.

⁷ Da: Islaelana luma, da:na: dima Kusuna luma a:na:pi edelewa, LODote lalelo. Na: Isipt wale Islael wama gwalite saoyamana, Ka:ptol wala Pilisitiyana luma, a:pite Kil wala Alamina luma.

⁸ Gibapile Sidinapa LODope tao sosawe bapina baigama dololo. Na: oba talaminamalowa ma:ma a:ibaigala, ameta na: Ya:ikobipe noneya pa:pa talaminale talaminamalowa, LODote lalelo.

⁹ Na: kamali gilala laladele, a:pite Islael noneya kabigibega gagaminamalowa obaite edelina sasabala, lumagite wit kosokosominotolona gi a:na:pi, etate a:ima pa:pa dilamalelo.

¹⁰ Na:pe luma gobala sosawe a:na:da:mida:na lumate giwa:la gilile kaokolamadili, enoba ma:ma gilala latedilina luma, Galabete sa: pa:pa atisa:malelo.

Islael obate gwama patayana gi

¹¹ A:ma kadepala na: pakaminamalowa enoba dilayana Da:ibidipe bikiwa. A:pite obape gi gwama pakakaminamalowa, a:pite obape kokoleliyana papala gwama pakakaminamalowa, a:pite gwama lopanapa gweyale a:na:minamalowa,

¹² a:na:pile Islael lumate Idomonapimunu wa pala egelamadili a:pite na:dowali gagile edelina luma, ma:mai gi a:na:da:mida:napa LOD enoba gi lalelo.

¹³ Kadepa saolamalelo LODote lalelo, dapoda:napa lumagi a:i pasaminanona lumagite giwitilamalelo, a:pite a:i pasaminanapa lumagi ga:lip tokobe etoda:minanona lumagite giwitilamalelo. Podo sakale kanika:napa waen wite iwidelamadili, a:pite waelabega sakala waen wite iwida:te kolelamadili.

¹⁴ Dibulama alete na:diyana na:dowali Islael luma na: gwama alete pa:lamalowa, obaimunu baigabaiga lumate titida:miniyana obai gwama a:na:da:minete a:mala edelamadili. Obai ga:lip adami tolete adami wi nidelamadili, obai egada a:na:da:minete adami naenamadili.

¹⁵ Islael luma na: obaimunu wa bapima gwama tolamalowa, lumate obai pa:pa gwama otopolamadili ne obai dima datayamana wa gobala, LOD a:dowali God enoba gi lalelo.