A:imo 8 - Godope Awananapa Gilala

Mukusadana adamite dowatiliyana ele ka:isa gi

¹ Ma:ma enoba Sidinapa LODote na: ituna:miyana gi, adami ele ka:isa.

² Obate anate tiliyana, A:imos a: powa tilaloya. Na: gilala wisa layamana, na: adami ele ka:isa tilelowa. LOD amalena: dima layana, a:yatanapa tepa a saowena na:dowali Islael lumadima. Na: obaimunu sosawe gima obai pa:pa na:sa:da:minamalowa.

³ LOD Godote lalelo, na: enoba Sidinapa LODote lalelowa, a:ma kadepala balelamina genamana dilite sabe dilima leleda:madili. Lumumunu kaokoda:na obebe waelabeyagaite wa kabigibegale dowatelamadili. Iwiya awana.

⁴ Aitapadilina luma a:ima etoda:minenewamena luma da: ma:ma gilala enamada:la, a:pite ma:ma wa gobala aitapadilina luma ilapala da:minenewamena luma,

⁵ de latedelewa, samoso kanika:napa poko gi powa tepala a:yata saolamaleloya se sa:dowali totoda:minimana kon ewadelamada:le, a:pite Sabadi kadepa awana gi powa tepala a:yatamaleloya se ewa sasabale kon ewadelamada:le, a:pite nana ulama kowabi ameta wisa sidila ewadelamada:le a:pite sewatana awapamina lopalale wisa alilamadili,

⁶ se lopala binina wisale alelamada:le a:pite lopala iwida:mininina luma ameta a:i lopalale alelamada:le, kon kakapa nana ulamada ewadelamada:le.

⁷ LOD enoba Islael lumumunu Godote lalelo, na: obaite a:na:da:miniyana gi pa:pa kobele eda:malowa.

⁸ Ma:ma gima waima:te a:ma wa gagagamunamalelo, a:pite a:ma wala edelina lumate sabedelamadili. Nael wasewanapa wi a:na:pi a:ma wate patamalelo obate toteketate dite a:pite gwama wima manamalelo Isipt wanapa Nael wasewa a:na:pi.

⁹ LOD Godote lalelo, na: enoba Sidinapa LODote lalelowa, a:ma kadepala na: wa debe palala bapile wa debeminamalowa a:pite kadepa tepa bapile wa iti kanabi minamalowa.

¹⁰ Na: a:dowali awanana pokopoko gi ameta lumagite kaowela sasala edelewamena tepama leleda:minamalowa a:pite da:dowali sa:kela dili siya ameta sabema leleda:minamalowa. Na: de esesewalida:na kakana lopala kakamina gima da: auwada:minamalowa a:pite na: da:dowali ganabina tita galada:minamalowa. Ya:ma tepa enoba susa:gite obape pulagi menagite kaowela gwanasaweda:le sabelamlelona tepa minamalowa a:pite a:mape a:yata enoba sokamanapa kadepa elamalelo.

¹¹ LOD Godote lalelo, na: enoba Sidinapa LODote lalelowa, kadepate saolamalelo ne baya bini gi ma:ma wa kabigibegama auwaminamalowamena, pa: baya bini gita: gwama wi iyawa gita:, ameta LODope gilala enamada: gi iyawate obai dapolamalelo.

¹² Dalate eta wasewale eta wasewama dagadagale na:da:tedelamadili a:pite Wawi ya:dela gwama Tawa di palama na:da:tedelamadili, obaite LODope gilala uwalelamadili ameta pa:pa tilamadili.

¹³ A:ma kadepala sa:sa:lena apeda: kanika:da:na aminata: kakamalina apeda: kanika:dana kakasita: obaite wi iyawa gile kaokolamadili.

¹⁴ Samaliya wanapa ididalagida gi mengimite edilina luma, gwama Da:n wanapa god eolage latedilina luma, gwama Beyasiba wanapa god eolage latedilina lumate, nisislete kaokolamadili, obai pa:pa gwama patimada:madili.