A:imo 7 - Godope Awananapa Gilala

Sa:sa:ta: ilata: a:pite awapamina taota: gi

¹ Ma:ma enoba Sidinapa LODote na: ituna:miayana gi. Nana ulama dapola tepala kanabape saki tepanapa nana ulama apiliyana wapiki palala a:pite saki tepanapa popo saote dilaleyala obate sa:sa: gagasila sa:leda:miyana.

² A:ma wa kabigibega a sa:sa:te sosawe bapi miyala na: Sidinapa LODdima layamana, Sidinapa LOD sa:pe sosawe gi kobele edasama. Ya:ikob a:ta:pi kanika:wa elamaleloya. Oba kowabi bapi.

³ Enobala LOD gi iwalela opa:ya ete layana, Ma:ma gi pa:pa elamalelo.

⁴ Ma:ma enoba Sidinapa LODote na: ituna:miyana gi. Sidinapa LOD gi bamina gi ilale a:na:minamalale mamamidoloyana, a:ma ilale gaolanapa wasewa wi tuloyana a:pite sa:ila:napa wa pala tuloyana.

⁵ Na: amale mamamida:yamana, Sidinapa LOD, na: a: dima timo elelowa, a: eke. Ya:ikob a:ta:pile kanika:wamaleloya oba lumagi kowabi.

⁶ Enobala LOD obape gi iwalela opa:ya ete layana, ma:ma gi iya:ta pa:pa elamalelo Sidinapa LODote lalelo.

⁷ Ma:ma enoba obate na: ituna:miyana gi. LOD gibapile awapamina taole awapamina gima a:na:miyana bilima etapamite lelaloyana a:pite obape maile obate awapamina tao egete lelaloyana.

⁸ Amale LOD na: nanate tiliyana. A:imos, a: powa lopala tileloya. Na: amale layamana, na: awapamina tao tilelowa. LOD amale a:negelayana, A: ti na: awapamina tao milelowa na:dowali Islael lumadima. Na: da:pe sosawe gima da: pa:pa a: na:sa:da:munamalowa.

⁹ Aesekepe sidina balelamina sasaba na: gagamunamalowa a:pite Islaelepe awana sasaba na: sosaweda:munamalowa, na: Yelebowamape genamana dima na:dowali giwa:la gilile giwa:laminamalowa.

A:mosota: Amasayata:

¹⁰ Amale Betolonapa guwali dalagi A:masayate Islaelanapa kanaba dalagi Yelebowam dima gilala auwamiyana, oba a:negelayana. A:imosote bata elelo luma pakakamina gima a: dima giwa:la eda:mada:le Islael wa gobala. A:imosipe gilala waelabeyagai luma dila menemenebeyagai ediliyana.

¹¹ Ma:ma enoba A:imosote lalelona gilala. Yelobowamate giwa:la gilile kaolamalelo, a:pite Islael lumate gibalamale eta:mi wama dibulama na:da:madili, obaimunu wa bapi elatete wa amatana opa:yana wama na:da:madili.

¹² Amale A:masayate A:imos dima a:negelayana, Godope Wala gilala lada:napa a: wama sao. A: Yuda wama gwama we. Wete a:mala a:pe baya naonamalelo a:pite a:mala Godope gilala ladolamalelo.

¹³ Betol wala pa:pa gwama Godope gilala ladolamalelo, gi ase ma:ma kanabape balelamina saba a:pite kanabape kamali gobanapa wa.

¹⁴ A:imos amale A:masayape gilala wisa eyana, na: pa: Godope wala gilala lada:napa lumagi, gwama na: pa: Godope wala gilala lada:napa dalagipe pulagi, na: enoba sipi tida:napa lumagi gwama na: pigi adami i tida:napa eloyamana.

¹⁵ Ameta LODote sip tida:napa eloyamana gi gobala na: awana:mitena: dima a:negelayana, A: wete na:dowali Islaelana lumadima wala gilala lado.

¹⁶ A:pite amapula a: LODote lalelona gilala enama. A:e lalelo, Isalalel lumadima wala gilala ege lado, a:pite a: Aesekepe noneya dima wala gilala ege lado.

¹⁷ Enobala ma:ma enoba LODote lalelona gilala. A:dowali susa:gite kabinapa baiga gobala kipale gosa gima obape obe ewada:na:napa susa:gi elamalelo, a:pite a:dowali segeta: susukowabita: giwa:la gilile kaokolamadili. A:dowali a:i lumate babaminete opa:ya alela eda:madili, a:pite a:niya:ta: wete God gi pa: itawanapa a:i baigala kaolamalelo. A:pite Islael wa gibapile dibula gima welamalelo, obaite obaimunu ya:bi gwalila wa elatete wabeganapa wama dibula gima na:da:madili.