A:imo 6 - Godope Awananapa Gilala

Islael luma dapolamalelona gi

¹ Sayonola awapale edelage latedilina luma da: kakabeya, a:pite Samaliya podola galabe bini a: edelina luma da: kakabeya, da: eta:mi wana kabigida:na dala, da: enobai luma Islaelana lumate da:dima pa:da:tedelamadili.

² Da: Kanelema wama na:da:te a:ma wa tilamadelewa, amale gwama Amat kabiginapa wama na:da:madelewa, a:pite amale gwama Pilisitiyanapa wa Gatama kola:madelewa. Obaimunu baiga sa:lesegeyagita ameta da:dowali baiga sosawe beyagaita. Obaimunu a:i kabigida:beyagaita ameta da:dowali a:i pa: kabgida:beyagaita.

³ Da: ya:ma sosawenapa kadepa wama mila a:pite sosawenapa kanaba auwama gwalite pa:da:la.

⁴ Da: sa:sa:lena tene sabala tenedelewa a:pite da:dowali tene sabala sa:lele dowatelewa. Da: a domoda:na sip kokowabi nanelewa a:pite sa:sa:lena ka:o nanalewa.

⁵ Da: Da:ibid a:na:pi da:pe ap lopalale siya a:na:minenewa a:pite eta:mi siya lopalale siya pakamitedelewa.

⁶ Da: kabuwa waen tawatawana nideletedelewa a:pite sa:sa:le bapina ipowada:na lopala kakama suguda:mitedelewa, ameta da: Yosepete sosawe elelona gima pa:pa gwanasaweda: edelewa.

⁷ Enobala da: eta a:ibaigama lope dibulama alete na:da:madilina luma gagasila edelewa, da: da:dowali poko gita: a:me eda: gita: binida:madili.

LODote Islaelana lumumunu na: awagana: gima ga:oloyana gi

⁸ Sidinapa LOD obaya obape gaigile a lawena, LOD God Kamalinapate lalelo. Na: Ya:ikobipe na: awagana: gima ga:olelowa a:pite na: obape tadana baiga tatalada:munamalowa. Na: obape kabinapa baigata: obape lopala waelabegata: eta:mi lumadima dapulamalowa.

⁹ Powa tepala 10 dala genama gobama na:seda:minamadilina tepala obai iya:ta: kaokolamadili.

¹⁰ A:pite obape eta lumagi obaimunu obebe ilama alila gima pa:te a:ma genama gobala obaimunu obebe wama alete saola gima eta a:wate manonamalelona lumagi anamalelo, eta lumagi a:da elelota. A:pite obate lalamalelo, awa, amale obate a:nege lalamalelo, nugunale, sa: LODope gagi pa:pa omona:madili.

¹¹ LODote kamalinapa gilala a lawena, a:pite obate kabiginapa genama titiminamalelo, a:pite kokowabina gegenama alisasi bapida:minamalelo.

¹² Os ba:keledana sakale gugula:tedilita. Amale menagite a:i pasaminanapa lopalale a:i pasamunamalelota. Ameta da: sogolale gi bamina gi a sokamanapa wi a:na:pi miwamena a:pite da: sogola gipe adami a kamalinapa ya:ti wi a:na:pi miwamena,

¹³ da: Lao Deba baiga giwa:lale sa:keladelewamena luma a:pite latedelewa, Kanaim baiga sa: sa:dowali kamalile egelimana.

¹⁴ Enobala LOD God Kamalinapate lalelo, Na: eta a:ibaiga pakaminamalowa a: dima giwa:la elamalale, o Islael, obate da: ilapalada:munamalelo Lebo Amat wale asemite wete A:la:b goloma saolamalelo.