A:imo 5 - Godope Awananapa Gilala

Lumate gwama isolada:te pa:da:mada:le awada:miyana gi

¹ Ma:ma gilala enamada:la o Islael luma, ma:ma enoba ne da: gima ladolowamena sabe gilala.

² Dalagi gi pa: itawanapa aminagi Islael a dilawena dilawena sabale pa:pa gwama patamalelo, oba obape wa bapile oba kopa elelo lumate elatiyala, eta lumagi bini oba pakamina gima.

³ Ma:ma enoba Sidinapa LODote lalelona gilala, miya Isalalelanapa kabinapa baigate obape 1,000 giwa:lana dala giwa:lama auda:minamalelona, obape 100 giwa:lana bapite kanika:wada:madili. Miya Isalalelanapa kowabinapa baigaite 100 kakamalina giwa:lana dala giwa:lama auda:minamalelona, obape 10 giwa:lana dala bapite kanika:wada:madili.

⁴ Ma:ma enoba LODote Islael dima lalelona gilala, na: uwalela a:pite da: edelamadelewa,

⁵ da: ege Betel uwalela, ege Giligal wama na:da:la, da: ege Beyasiba wama pitida:la. Gi ase Giligal gibalamale gisaola gima eta a:ibaigama welamalelo, a:pite Betel pa:pa lopala elamalelo.

⁶ Sidinapa LOD uwalelete kanika:wadela, da: pa:pa ana:pi eda:madelewamena tepala oba Yosepepe luma gobama ila babalela a:na:pi pa:lamalelo, obate oloda:malelo, a:pite Betelope ila sa:emina gima lumagi pa:pa saolamalelo.

⁷ A: sogolale gi bamina gi ameta sokamanapa gima leleminanona lumagi a:pite sogola gi ameta a:ima etominanona lumagi.

⁸ Obate kadepa sidima ibina gagasida: saki a:na:da:minoyana, iti kanabi kadepa pula gima lelemiyana a:pite kadepa itimite elelo, wasewa gobanapa wi dima mamamida:yana amale wi egete dite a:i baigama samitelelo, LOD enoba obape gagi.

⁹ Obate mene gi kamalida ka:omitelelo kakaleda:na sasabama amale tadana baiga tatalada:miniyana,

¹⁰ a: gi bamina sabale sogolale gi babaminanona lumagidima mene elelo a:pite gibalama gi ladolona lumagidima ilapala elelo.

¹¹ A: lopala binina luma a:ima etoda:mineno a:pite obai gamobegada:mineno a: dima kon apilamada:le. Enobala a: sa:sa:lena gegenema ba:kelele a:na:da:munoyana, ameta a:mai gegenamala a: pa:pa elamalelo, a: sa:sa:lena tokobe adami toloyana a: ameta a:mai waen pa:pa nidolamalelo.

¹² Gi ase na: a:dowali sosawe gi waelabeyagi itawa, a:pite a:dowali kabigida:na sosawe gi iya:ta:. A: sogolale edelina lumadima giwa:la eladele ameta pa: sogola nabidile gi alelalo, a:pite da: gi bamina sabale aitapadilina lumate sogolale gi bamina gima obai ilapala da:minenewa.

¹³ Enobala sa:kemanapa dalagite a:ma tepala gelate manano, gi ase a:ma enoba sosawenapa tepa.

¹⁴ Sa:sa:lena gi uwaladela pa: sosawena gi, de kanika:wadelamada:le. Amale LOD God Kamalinapate da:da elamalelo, de lalelewamena gi obate da:da elelona gi a:na:pi.

¹⁵ Sosawe gi ilapala edela, sa:sa:lena gi iwida:mina, gi bamina sabale sogolale gi bamina gi pakamina. Da: a:pidelamadelewamena LOD God Kamalinapate kabiginapa awe iwalela gile Yosepepe eta:mi luma awedolamaleloga.

¹⁶ Enobala ma:ma enoba LOD God Kamalinapate lalelona gilala. Nabidi tetepala sabe siyate dololamalelo, a:pite mana gegenama sasabale gwanasaweda: gite dowatelamadili. Egada okona awada:minamadili adimada: gima a:pite sabedilina lumate mamale adimadelamadili.

¹⁷ Tokobe adami egada gobala sabe gite dololamalelo gi ase na: da: gobala pa:welamalowa LODote lalelo.

LODope kadepa

¹⁸ Awe iyo da: LODope kadepate saolamalale enamadelewamena luma. Da: powa gi ase LODope kadepama enamadelewaya. A:ma kadepate iti kanabi elamalelo, pa: lulila.

¹⁹ A:ma kadepa enoba a:na:pi dalagite layon emote wama welamalelona oba ameta Beyada gusumida:malelo, a:na:pi dalagite obape genama gobama sa:ete obape mai bilima etapaminamalelona ameta malebete oba lapolamalelo.

²⁰ LOD ope kadepate itilamalelo pa:pa lulilamalelo, iti kanabi bapi elamalelo eta lulila kowabi pa:pa dololamalelo.

²¹ Na: ga:olelowa, de balelamina gima poko edelewamena gima ilapala eleowa. Na: da:pe gaogoda:mina gi ilapala elelowa.

²² Da: olodana nagala lopalata: kon nagala lopalata:na: dima alete pa:da:madelewa, na: ameta a:mai lopala pa:pa awapage lalamalowa. Da:na: dima a domoda:na nagala lopala menagimina gima alete pa:da:madelewa na: pa:pa awapage lalamalowa

²³ Da:dowali dili siya ela:we bega wama alete na:da:la, na: da:dowali apa siya pa:pa enamamalowa.

²⁴ Ameta awapa sogolanapa gi bamina gite wasewanapa wi a:na:pi iwolamalelo, a:pite sogola gite pa:pa ekelalona kebane gobanapa saelelona wi a:na:pi.

²⁵ Da:na: dima ewama: gita: nagala gita: pa:pa alete pa:deleyamanata O Islael luma, de 40 gogo a:napa wala edeleyamana tepala.

²⁶ Da: da:dowali kanaba dalagipe balelamina saba a pakamiyamana, enoba da:dowali ididiligipe dola saba, enoba da:dowali godope ibina de da:ya da:gima a:na:miyamana.

²⁷ Enobala na: da: Damasekes wala alete eta a:i baigama dibula oko gima auda:minamalowa, LODote lalelo, obape gagi enoba God Kamalinapa.