A:imo 4 - Godope Awananapa Gilala

Isaelate pa:pa sela Gododima esa:yana gi

¹ Ma:ma gilala enamada:la, da: Samaliya wala edelewamena Basan wana ka:o, da: lopala binina luma ilapala da:minete a:pite aitapadilina luma a:ima etoda:mite edelewamena ato, a:pite de da:dowali dala dima latedelewa, sa:dima waen alesamate pa:da:mela sa: dalagile nidelamada:le.

² Sidinapa LOD enoba awananapate obape awana gile a lawena, tepa saolamalelo, lumate da: taole papada:mite alete na:da:madili, da:pe a:yatadana luma enobai tudi iyapole alelamadili.

³ Da: eta:mite eta:mi lopadamate wama saoda:le saoda:madelewa ka:ekeliwina ta gobala, a:pite da: Amon wa palama ba:ba:minamadili. LODote lalelo.

⁴ Betel wama na:da:te sosawe gi a:na:da:mina, Gilgal wama na:da:te sosawe gi kabigibegale a:na:da:mina, waelabega ibasegela da:dowali nagala lopala alete pa:da:la. Salikiliwa gogola da:dowali 10 papala gobala menagi pala egete pa:da:la.

⁵ Nagala gima potadana belede ilama olola a:pite da:pe iwiminale apiletedelewamena nagala lopala gima awaga gilala ladela, lumate enamada:mada:le. Da: na: awagana: edela Islael luma, ase ma:ma enoba de a:na:mina iwiminetedelewamena gi, Sidinapa LODote lalelo.

⁶ Ne da:pe kabigida:na baiga waelabega gobala gwana gaoda: gi da:dima datayamana, a:pite na: da:dima baya pa:pa dapuloyamana da:dowali kowabinapa baiga gobala, ameta a:ma gi gobala da:na: dima pa:pa isola:deyamana, LODote lalelo.

⁷ Ne gwite da:dima onona gima gwalite lelayamana, nana ulama dapola tepa salikiliwa samoso dowatelaliyala. Na: eta kowabinapa baiga dima gwi auwamite a:pite eta kowabinapa baiga dima gwi gwalite lelatoloyamana. Egada menagima gwite ononotoloyana, ameta eta dima gwi pa:pa ononotolaleyala egada lopala sesediliyana.

⁸ Lumate wi uluwada:da dagadagale eta kowabinapa baigale eta kowabinapa baigaima na:da:tediliyana ameta obai nida: wi pa:pa sa:lele egetediliyana, a:ma gi tiliyamana tepala da:na: dima pa:pa isolada:yamana, LODote lalelo.

⁹ Na: waelabega tepama da:dowali egadata: tokobe adami egadata: sosaweda:miyamana, na: bonota: kaka sisida: gita:le egada sosaweda:miyamana, sa:sa:te pig ita: olib ita: naniyana, ameta da:na: dima pa:pa isolada:yamana, LODote lalelo.

¹⁰ Ne menemenena gi da:dima auda:miyamana ne Isipt wama auda:miyamana gi a:na:pi. Ne da:dowali apeda: kanika:da:na dala giwa:la gilile dapoloyamana, da:dowali giwa:la gobala aleleyamana osoda. Ne de edeleyamana sabala da:dowali mina daodoba aula:le kakamunoyamana, a:ma gi tiliyamana tepala da:na: dima pa:pa isolada:yamana. LODote lalelo.

¹¹ Ne da: eta:mi sosaweda:miyamana, Sodomota: Gomolota: sosaweda:miyamana gi a:na:pi. A: ila awa a:na:pi ila babalela gobala silimiyamana, ameta a:na: dima pa:pa isola:yana, LODote lalelo.

¹² Enobala ma:ma enoba ne da:dima a:na:minamalowamena gi, gi ase na: ma:ma gi da:dima a:na:minamalowamena, da: sa:leda:la, o Islael, da:pe Gododa gusimida:la.

¹³ Saka a:na:da:minanapa, ibowa laoda: a:na:miyana, obape iwalela gi lumagidima ekalamamiyana, obate kadepa pula gi gwama iti kanabima mite elelo, a:ibaigana sidina sasaba obate etoda:mitelelo, LOD God Kamalinapa enoba obape gagi.