A:imo 3 - Godope Awananapa Gilala

Islael wa gima gibaba edeliyana luma gi

¹ O Isalalel, ma:ma gilala enamada:la, LODote a:dowali sosawe gima a gwalemonoyana, enoba ne Isipt wale wama gwalite saoyamana noneya.

² Na: a: menagi omona:yamana, a:i baigala edelina noneya waelabega gobala, enobala na: a: dima wisa atamalowa a:dowali sosawe gima.

³ Luma saki mengimite wamina gima awapa elamalita, obaite menagimite wamina gima, gima kamina gi pa:pa a:na:minamalilina tepala.

⁴ Da:niya gobala layon uluwapodaolamalelo, obate nana lopala bini elelona tepala. Layon obape genama gobala ulowapoda:malelo nana lopala pa:pa lapowena tepala.

⁵ Api ya:wile pa:pa dololamalelona tepala puwida: ya:wima pa:pa manamalelo. Ya:wi eta lopala pa:pa pa:te manamalelona obaya saote dilamalelota.

⁶ Tutulile kabiginapa baiga gobala gilada:malelona tepala, luma emodelamadili, Menenapa gite kabinapa baiga gobama saolamalelona, ya:ma LODote a:na:miwina gi.

⁷ Gibalama, Sidinapa LODote eta gi pa:pa a:le a:na:minamalelo, oba lope obate a:na:minamalelona bata gi kekeminamalelo obape gisaolana lumale, enobai wala gilala lada:na luma.

⁸ Layonote ulupoda:wena powate madakaela eleloya., Sidinapa LOD a lawena, na: obape gilala ladolamalowa.

⁹ A:sadodope giwa:la gima tadana baigama gwalemo, a:pite Isiptpe tadana baigama. Samaliya sakama saba edala, obape kabiginapa ilapala gi tilelewata oba gobama, a:pite ilapalada:mininina luma tidelewata obape luma gobala.

¹⁰ Obai sogola gi a:na:mina gi pa: itawada:, LODote lalelo, obaite obaimunu tadana baiga gobana gegenama gobama obaite ilile aleliyana lopala a:wada:miniyana.

¹¹ Enobala ma:ma enoba Sidinapa LODote lalelona gilala, Giwa:lanapate da:pe wa lapolamalelo, obate da:pe baiga a:ima ba:ba:mite a:pite da:pe tadana baiga sosaweda:minamalelo.

¹² Ma:ma enoba LODote lalelona gilala, sip tida:napate layonope magata gobala sipipe a:i gosasa saki o igibi menagi silida:minamalelona gi a:na:pi obate Islael a:gelamalelo, Samaliya wala obaite sa:lenapa tene sabale edelina lumata: a:pite Damasakas wala sa:sa:lena mitata lopalale mitatilina lumata:.

¹³ Ma:ma gilala enamada:te Ya:ikobipe noneyape a:na:mina gima wala eda:la, Lod enoba gi lalelo LOD Kamalinapa God.

¹⁴ Ne Islaelpe sosawe gima oba wisa atolamalelowamena kadepala, na: Betol wana balelamina ba:kele gegenama gagamunamalowa, balelamina ba:kele genamape iwitawana lopala ta:ta:munowamela a:ima nisisilamadili.

¹⁵ Na: ga:ga: tepala eda: genama gaminamalowa gogo tepala edeletedilina genamada iya gaminamalowa, na: lumate sa:lele sa:leda:miniyana waya:dena gegenama gagamunamalowa a:pite lumate eda: gima ga:geminiyana gegenama gagamunamalowa LOD enoba gi lalelo.