A:imo 2 - Godope Awananapa Gilala

¹ Ma:ma enoba LODote lalelona gilala, Mowa:bape sosawe gi salikiliwa gima, o sakisaki gima na: na:dowali ga:o gi pa:pa ekeminamalo. Gi ase obate Idomonapa kanabape gosasa ilama aliyala pulu bapi eyana gima.

² Na: Mowa:b wama ila auwaminamalowa enoba ilate Keliyot wana kakaleda:na tadana baigabaiga oloda:malelo. Mowa:b wa siya kabigibegada a:ima dilamalelo, gegemada:da, gwama tutuli siyada a:ima dilamalelo.

³ Ne obape wa iwa:lanapa lapolamalowa, a:pite obape okona dala obada dapolamalowa, LODote lalelo.

⁴ Ma:ma enoba LODote lalelona gilala, Yudape sosawe gi salikiliwa gima, o sakisaki gima na: na:dowali ga:o gi pa:pa ekeminamalowa. Gi ase obai LODope kakami gilala a ilapala eda:te a:pite obape babalama pa:pa gima kamidili, gi ase obai sewatana ididali balelada:mina gile gibalama nabidile a wama ka:odiyana, enobai obaimunu iniwalite gwaladaminiyana ididali.

⁵ Na: Yuda wama ila auwaminamalowa enoba ilate Yelusalemape kakaleda:na tadana baiga oloda:malelo.

Islael wape gi bamina gi

⁶ Ma:ma enoba LODote lalelona gilala. Islaelpe sosawe gi salikiliwa gima, o sakisaki gima na: na:dowali ga:o gi pa:pa ekeminamalowa. Obaite siliba alela gima gi sogolana luma ewadili, a:pite aitapadilina luma obaite a:i lopalama ewadili.

⁷ Obaite lopala binina lumumunu gaganabi a:i puluma etoda:minini, obaite a:i pulu etoda:mina pela edili, a:pite obaite menemenena gite dapololona lumadima ameta sogolale gi bamina gi pa:pa a:na:minini. Wawate obape pulagida gisaolanapa aminagi menagi iliminetedili, a:na:pile Obaite na:dowali Awananapa Gagi a sosawe miyana.

⁸ Obaite awanana nagala lopala aliletediliyana awana ba:kele genama ebatala dowatiliyana, obaite ilile aleliyana kakana lopala alapoda:te dowatiliyana. Obaimunu ididaligipe genama gobala obaite lumate sosawe gi wisama aliliyana waen nidiliyana.

⁹ Ne obaimunu tao luliyabala Amolona luma dapoloyamana, ameta oba Seda i a:na:pi gigisabega a:pite obape kamali a kalekalenapa i a:na:pi ewena. Ne obape sidina adami sosaweda:mite a:pite obape a:ina sasa ta:temunoyamana.

¹⁰ Ne Isipt wala a: wama gwalite saoyamana, a:pite ne a: 40 gogo gobala lopama:te pa:yamana a:napa wa gobala a: dima Amolina lumumunu a:i atamalale.

¹¹ Ne da:pe sege gobala wala gilala lada:na dala pakada:miyamana, a:pite da:dowali apeda: kanika:da:na luma gobala na: Awanana dala pakada:miyamana. Da: ma:ma gi kowana eda: gima pa: awapa, O Islael luma, LODote lalelo.

¹² Ameta de ya:mai awanana dala waen dapileyamana, a:pite de ya:mai wala gilala lada:na dalate wala gilala lada: gima obai ekeda:miyamana.

¹³ Na: a: sasaminamalowa, kon tao a:na:mite weladele dilamalelona sakanapa anekeyapote siliminanona gawa a:na:pi a: dilamalelo.

¹⁴ A:i agogoda:nate pa:pa emoda:madili, kakamalinate obaimunu kakamali pa:pa pakakaminamadili a:pite kamalinapa dalagite obaya obape galabe pa:pa pawaminamalelo.

¹⁵ Gagi kota kalekalele gwalulamalelona dalagite gwa:ima sikamida:malelo, a:i agola bapinapa dalagite pa:pa wama guluda:malelo, a:pite osole waminanona dalagite obape galabe pa:pa pawaminamalelo.

¹⁶ Kakamali bapina giwa:lana dala iya:ta:, a:ma kadepala abadu emoda:te gugula:madili, LODote lalelo.