A:imo 1 - Godope Awananapa Gilala

¹ A:imosope gilala, oba Tekowa wala sip tida:na dala gobala eta sip tida:napa dalagi. Obate taote opa:ya ediyala gi tiliyana. Obate Isalel wa gima gi tiliyana enoba Waima:pe pa:la gi Islael wama saki gogo dowatelaliyana tepala. A:ma tepala Usayate Yuda wala kanaba eloyana, a:pite Yelebowa:m Yeyoa:sape mata obate Islael wala kanaba eloyana.

² Obate layana, Sayon baigala LODote layon a:na:pi ulupodoloyana. Yelusalem baigala oba kadepape gigila a:na:pi elelo, sip tida:napimunu tiladana wa a sesedili, Ka:mol podo sidila wate sa:ila bapi elelo.

Islael wa auwala ediliyana lumumunu gi bamina gi

³ Ma:ma enoba LODote lalelona gilala. Damaskasape sosawe gi salikiliwa gima o sakisaki gima, na: na:dowali ga:o gi pa:pa ekeminamalowa. Gi ase oba Giliyad sasamiyana, menenapa auli posodanapa lopalale.

⁴ Na: kanaba A:iselepe genamama ila auwaminamalowa, enoba ilate Ben Adadape tadanapa baiga ololamalelo.

⁵ Na: Damaskes ogosa ka:minamalowa. Na: kanaba lapolamalowa Aben gwaila elelona, a:pite Bet Iden wala kamalinapa gabi egete elelona dalagi lapolamalowa. Amale Alam wana lumate dibulama na:da:madili, Kil wama, LODote lalelo.

⁶ Ma:ma enoba LODote lalelona gilala, Gasa wape sosawe gi salikiliwa gima, o sakisaki gima na:dowali ga:o gi pa:pa ekeminamalowa. Gi ase obate na:dowali luma gagasila waelabega alolale alelote taole papada:mite, amale Idom wama ewadoloyana.

⁷ Na: Gasa baiga tama ila auwaminamalowa, enoba ilate obape tadana baiga oloda:malelo.

⁸ Na: A:sadod wanapa kanaba lapolamalowa, a:pite A:skalon wala kamalinapa gabi egelaminanona dalagi lapolamalowa. Na: na:dowali kamalinapa mai Ekolon dima gigiminamalowa, Pilisitiya luma waelabega etate pa:pa kanika:wamalelo, Sidinapa LODote lalelo.

⁹ Ma:ma enoba LODote lalelona gilala, Taya baigape sosawe gi salikiliwa gima, O sakisaki gima na: na:dowali ga:o gi pa:pa ekeminamalowa. Gi ase obate na:dowali luma gagasila alolale alolote taole papada:mite Idom dima ewadoloyana, obate sopodalagi eloyana gi kobele ete ma:ma gi a:na:miyana.

¹⁰ Na: Taya baiga tama ila auwaminamalowa, a:ma ilate obape baiga ta ololamalelo.

¹¹ Ma:ma enoba LODote lalelona gilala, Idomope sosawe gi salikiliwa gima, o sakisaki gima na: na:dowali ga:o gi pa:pa ekeminamalowa. Gi ase obate obape wabeya giwa:la gilile atate weleyana, awe iwalela gi bini eladele gi ase oba gwana gobala awe gi bini eloyana. Obape ga:o gite oba gamominaleyala obape gwana gobala ilate babalela pela eyana a:pite sa:emina gima pa:pa awapa eyana.

¹² Na: Teman wama ila auwaminamalowa, enoba ilate Bosala tadana baigabaiga oloda:malelo.

¹³ Ma:ma enoba LODote lalelona gilala, Amonpe sosawe salikiliwa gima, o sakisaki gima, na: na:dowali ga:o gi pa:pa ekeminamalowa, gi ase obate Giliyad wana oposomadana atomunu gwana gilile tatalada:munoyana, obape a:i a:yatada: wasegema alilamada:le.

¹⁴ Na: Laba baigape tama ila auwaminamalowa, enoba ilate obape kakaleda:na tadana baiga oloda:malelo, a:ma oloda: gi enoba giwa:la siya gobala saolamalelo, gwama kabiginapa laoda:te laodolamalelona kadepala.

¹⁵ Obape kanabate wanapa wama dibula gima welamalelo, obata: obape okona dalata: LODote lalelo.