A:ig 2 - Godope Awananapa Gilala

Kanika:napa awana genamape lulila gi.

¹ Amale a:ma gogo menagi gobala, naba 21 kadepala naba 7 samoso gobala LODote obape gigiwinapa dalagi A:igaipe magatale gwalemonoyana.

² Oba a:negelayana, Yuda wanapa gabamani dalagi Selubabel Sa:eltielepe pulagita:, a:pite sidinapa guwali dalagi Yosuwa Yeyosadakape pulagita:, gwama Islael luma waelabegata: danamalelo.

³ Lopanapa genamape dola gi tiliyana lumagi amapulala elelota. Amapulala ma:ma genamape dola gi da:dima a:ta:piya. De amapulale tilelewamena tepala da:dima pa: lopala elelota.

⁴ Selubabel a:ta: a:pite Yosuwa Yeyosadakape pulagi sidinapa guwali dalagi a:ta: a:pite da: Islael luma waelabegata:. Amapulale da: kamalibapi eda:madelewa. Ma:ma enoba LOD Kamalinapate lalelona gilala.

⁵ Ma:ma enoba ne gibalamalele a:na:minamalale miyamana bata gi, de Isipt baigale wama saodeyamana tepala. Enobala ege emodela, na: elomina tepala da:da elamalowa.

⁶ Gwama LOD Kamalinapate lalelo, na: auwapula bapi sawisakata: a:ibaigata: wasewata: gwama sakata: gagagada:munamalowa.

⁷ Na: baiga baiga waelabeyagai gagagada:munamalowa, a:pite obaite obaimunu wisa kabigida:na lopala ma:mama alete pa:diwila, ma:ma balelamina genama gobala sa:lenapa lulilate dololamalelo, LODote lalelo.

⁸ Siliba enoba na:dowali, a:pite golod enoba na:dowali, LODote lalelo.

⁹ De amapulale a:na:minenowamena genamape lulilate lopanapa genamape lulila giwitilalo, LODote lalelo. A:pite a:ma genama gobala na:dowali lumadima gela gita: ya:biya:bi gita: dapulamalowa, LODote lalelo.

Sosawena lumadima sa:kela gi datamalelona gi

¹⁰ Kanaba Daliusape sakinapa gogo kanaba eloyana tepala a:pite naba 9 napa samoso 24 napa kadepala LODope gilalate gigiwinapa dalagi A:igaiyadima pa:yana.

¹¹ LOD kamalinapate lalelo, guwali luma danate tila, Godope babala powa gi laleloya ma:ma gilala gima.

¹² Eta lumagite Gododima nagala elanapa awana wai sepo obape guwali kakanapa lopalale papamite egete weladele a:ma kakanapa lopalate eta:mi baya o sepo lopalata: gwama adami wita: a:pite sape mamenata: daleda:minamalelona tepala ya:mai nana lopala a awanana lopala ediwinata. Guwali dalagi ameta gilala wisa eda:dele a:negelayana, awa.

¹³ A:igai anate tila gilala gwama layana, powate lumagite kaolanapa obe dalowamite ma:mai eta:mi lopala dalowada:minamalelona tepala ma:mai lopala sosawe eda:madilita. Guwali dala a:negelaiyana, Eya, ya:mai loplala sosawe eda:madili.

¹⁴ A:igai a:negelayana, LODote lalelo, ma:mai wana luma waelabeyagai enobai a:na:pina edeli. Obaite a:na:da:mininina gita: a:pite obaite awana sabama nagala edelina lopalata: enobai sosawena.

¹⁵ Enobala da: ama kadepala asemite ma:ma gi sa:lele iwalelamadelewa. De lope God balelamina genama sokatena ba:kele pa:pa toleyamana tepala da: a:ta:pinapa kanika:wa gobala edeleyamana gi sa:lele iwalelamadelewa.

¹⁶ Da: gi a:ta:pi tila edeleyamanaya. Lumagite obape egada gobala 20 kilogla:m nana ulama egela gima wetoloyana tepala oba ameta 10 kilogla:m bapi tilitoloyana. Lumagite waen a:na:mina sabala 50 lita egela gima awapanapa oko a:na:minotoloyana tepala oba ameta 20 lita bapi tilitoloyana.

¹⁷ De da:pe maile a:na:da:mineyamana gi waelabeyagai ne gite tila gile gwama gwi lapipilale sosaweda:munoyamana, a:ma gi tideleyamana tepala da:na: dima pa:pa gima kamida:te pa:deyamana, LODote lalelo.

¹⁸ Ama kadepa enoba naba 9 samosope 24 napa kadepa de God balelamina genama sokate a:na:mina gi gumiyamana. Da: ma:ma tepala asemite saodelamadilina gi tidelamadelewa.

¹⁹ Ma:ma tepala egadana lopalate da: gobala pa:pa alawada:te dowatili, ga:lip tokobeta: pigi adami ita: salabisa adami ita: olib adami ita, ma:ma tepala na: da: sa:kelada:minamalowa a:pite da:dila lopala waeda:madili.

Selubabel enoba LODope mai lini a:na:pi

²⁰ LODope gilalate gwama A:igaidima pa:yana, naba 9 napa samosope naba 24 kadepala,

²¹ oba a:negelayana, a: Yuda wanapa gabamani dalagi Selubabel ana, na: a sa:lewamena a:ibaigata: sawisakata: gagada:mina gima.

²² Na kabigida:na baiga baiga a:ima ba:ba:mite obaimunu kakamali ekeda:minamalowa. Na: obaimunu giwa:la gawata: a:mai gawa alelamidilina dalata: a:ima ba:ba:minamalowa, obaimunu osote kaokolamadili a:pite obai alelawamidilina dalate obaiya obai dapolamadili.

²³ LOD Kamalinapate a:negelalelo, ya:ma kadepala na: na:dowali gisaolanapa Sa:eltiyelepe mata Selubabel na: a: gwalilamalowa, LOD Kamalinapate lalelo, na: a: gwalite pakaminadele na:dowali mai lini didiya a:na:piminamalowa, gi ase na: a: a omonoyamana, LOD Kamalinapa enoba gi lalelo.