A:bak 3 - Godope Awananapa Gilala

Abakakape timo gi

¹ Wala gilala lada:napa A:bakakate timo eladele ladoloyana gilala. Dilile gwaledoloyana timo gilala.

² LOD na: a:dowali gi kabigibega a enamadolowamena, na: e a:na:da:munowena gima emolelowa, o LOD. Sa:dowali tepale gwama a:na:da:mu, a: sa:dowali tepala gwama kekeda:mu, gwama a: sa:pe giwa:lana dima ga:olelona tepala sa:lebega sa:dima nagala ela gi iwalo.

³ God Teman wale pa:yana, awananapate Palan sakale pa:yana. Sela Obape lulilate sawisaka waelabega kawapida:yana a:pite obape ewama: gite a:ibaiga kabigibega tawamiyana.

⁴ Obape lulila enoba kadepa sosola a:na:pi, obape maile kadepa sosolate saodiyana, obape kamali amale a:wate dololoyana.

⁵ Gite tida: gite oba lopama:te weleyana, enoba gite obape a:iwale weleyana.

⁶ Oba patate a:ibaiga gagamiyana, oba lotobada:yala a:ibaigala luma sasiwadiliyana. Amatana podo babasa:midiyana a:pite amatabegale dowatamidiliyana sakate nisisiliyana. Obate a:na:da:minanona gi elomina tepala dowatili.

⁷ Na: Kusan wana bikiwa tida:yamana galabe gite obai atida:yana, Midiyan wana gegenamama alikikimina gite a saodiyana.

⁸ A: wasewa dima ga:oloyana, o LOD. A:dowali ga:o gite tulibi dima dololo. A: kalama wasewa dima ga:o pakamite kamalibega eyana, e a:dowali osole wamunote, a:pite a:dowali kamalinapa giwa:la gawale wamunoyana tepala.

⁹ A: a:dowali gagi giwa:la gima sa:lemiyana, a: soba kotama kakamiyana. Sela A:ibaiga baeyala tulibi eyana,

¹⁰ podo sakate a: tilite alikikimina enamadiliyana. Wite kanika:da:na siwile kamalile iwidiliyana, a:i gobala wite gwaleladele a:pite obape ka:ka:lowa sidima auda:munoyana.

¹¹ Kadepata: samosota: sidile a:wada:te dowatiliyana a:dowali agogoda:na sobate wamidiliyana tepala, a:pite a:dowali ila babaleladana kibilite wamidiliyana tepala.

¹² A: a:i gobala ilada a:i saominoyana a:pite ga:o gida a:ibaiga waelabega sasada:miyana.

¹³ A: a:dowali Islael luma alolamalale saoyana, a:dowali mai etapaminanapa lumagipe galabe pawamina gima. A: ya:ma sosawe gidanapa wape ganabinapa ganabima sasamiyana, a: sosawenapa lumagipe genama, a:sole kwakwalamida:mitata pelote timi sokatema saote a:ibapima saoyana. Sela

¹⁴ A:dowali kibilite obape giwa:la kanaba kotomiyana obape giwa:lanate sa: opa:ya alisa: eda:mada:le sela pa:da:bega ediyana tepala, oba sa:kelaloyana nana lopala munitilamalale enoba a:wada:te mitatiliyana salipana luma.

¹⁵ A: wasewa etomiyana a:dowali osole, amale wasewana kabigida:na wite patimadiyana.

¹⁶ Enamayamana tepala na:dowali alipote maiyatoloyana, na:dowali magata pite ya:ma siya gima sasiwaloyana, babalada: gite na:dowali gosa gobama manaya, a:pite na:dowali a:i sakite sasiwadiliyana. Ameta na: gelada ga:o kadepa atolomunamalowa sa: ilapalada:mininina lumadima pa:lamalale.

¹⁷ Pig adami ite pa:pa sosola da:minadili a:pite ga:lip adami tokobele pa:pa dowatamadili, a:pite olib pa:pa awapamalelona a:pite egadate nana ulama pa:pa alawada:minamalelona, sip ta gobala sip binibega elamalelona a:pite ka:o waite ta gobala bini elamalelona,

¹⁸ na: ameta LOD gobala sa:kelolamalowa, na:dowali God galabe pawada:mida:napa gobale sa:kelolamalowa.

¹⁹ Sidinapa LOD enoba na:dowali kamali elelo, obate na:pe a:i saki diya waipe a:i saki apela da:minano, obate na:da elelola na: saka sidima dite waminotolowa.