A:bak 1 - Godope Awananapa Gilala

¹ A:bakuk Godope wala gilala lada:napa dalagite tida:te aleloyana gilala.

A:bakakate lumumunu gima ilapala eloyana gi.

² Na: a:ta:pi tepa a: dima mamamida:malowaya, O LOD, e na: amowana:malale, ameta a: na:dowali gilala pa:pa enamano. Gwama na: a: dima adimada:dele layamana, sosawenapa lapitada: kamali a:meta, ameta powa gi ase a: na:dowali galabe pa:pa pawamiyanaya.

³ Pa: sogolale gi babamina gi tilalowa. Powa gi ase a: pa:pa ekeda:minanoya. Eta:mite eta:mi dapola gita: lapitada: kamali gita: na:pe sosoko palale dololo, lapitada: gita: giwa:la gita: kabigibega a:meta.

⁴ Enobala kakami gilala a: dololo, a:pite sogolale gi bamina gi pa:pa kekelelo. Sosawena lumate gi sogoda:na luma gwanamada:minini, enobala obai sogolale gi bamina gi pa:pa sa:lele a:na:minini.

LODope gilala wisa

⁵ Baigabaiga waelabegama tao lotobada:te ti, a:pite a:pe alipo ka:elamamalelo. Gi ase e elelona tepala na: eta gi a:na:minamalowa a:ma gi a: pa:pa gibapiminamalelo gwama a:e enama tepala iya:ta:.

⁶ Na: Ba:bilon luma pakada:minanowa, sosawena gi a:na:da:mina gima kakamalina luma, obaite a:ibaiga kabigibega wamideletedili pa: obimunu wa obaite a:mala eda: gima aleletedili.

⁷ Lumate obai kabigibegale emoda:dele mosele wamideletedili, obai obaiya obaimunu babalale eda:dele awaga gi kabigibega a:pite obaiya obaimunu gi awapada:na ladeleta babalale gi a:na:da:mina gi ladeletana luma.

⁸ Obaimunu os a:i agogoda: beyagai obai lepad waimunu agogoda: giwidili, wa debela wamidilina wa soka:imunu kamali giwidili. Obaimunu giwa:la oso sela gugula:te pa:na:dili, obaimunu osole wamidilina dala wabegale pa:dili. Waliya puwida:te nana lopala egelamalale pelotolona gi a:na:pi obai pa:na:dili,

⁹ obaimunu giwa:lana waelabeyagaite kamalile luma sosaweda:minamada:le pa:na:dili. Obaimunu luma waelabeyagai a:napa wanapa kamalinapa laoda: a:na:pi pa:na:dili a:pite dibulama luma sasasa a:na:pi alelili.

¹⁰ Obai kanabana luma tuwatada:minete a:pite wa apeyana iyada:minini. Ba:kele tadana baigabaiga obai iyada:minini, obai a:i ta ebatama tilida:minete ya:mai baigabaiga aleleli.

¹¹ A:pite obai laoda: a:na:pi lopala paiwada:minadele na:dili, obai obaiya obaimunu kamali a godoge laiyana.

A:bakuk gwama LOD dima ilapala eloyana gi

¹² O LOD, a: elomina tepala God elelo. Na: a: ewamonowa O God, A: tatali pala bininapa pa: kaotanapa. O LOD a: Ba:bilon luma a domonoyana obaite sa:pe gi babaminamada:le, a:pite a: enoba sape a:wa ba:kele elelo, a: obaimuunu gwana a kakalada:miyana obaite sa:dima wisa dapilamada:le.

¹³ A: sosawe bininapa a:te enobala a: sosawe tila gima pa: awapa, sosawe gi a: pa:pa pa: gige lalelo. Powa gi ase a: sosawena gi a:na:da:ininina kakamalina luma tida:lona ameta gi pa:pa a:na:minanoya. Enobala a: powa gi ase gilala bini eleloya ma:mai sosawena Ba:bilon lumate sogoda:na luma alelilina tepala.

¹⁴ A: sa: a wasewa gobana mewa a:na:pi sa:miwina lumate pa:pa madakaelalele lapodili, enoba apeyanapa bininapa wasewana tukalu a:na:pi.

¹⁵ Giwa:lanapa sosawebegate obai waelabega tudile alelalo, obate tiyale obai alelote kabiginapa silimina tiyale obai goloma gagsada:mitelelo, a:te enobala oba kabigibegale sa:kelalo.

¹⁶ Enobala oba obape tiya dima awanana nagala lopala atalo a:pite sa:sa:lena ipowada:na nagalala lopala obape kabigida:na silimina tiyadima ilale ololotelelo, gi ase obate tiyale alelotolona sa:sa:lena lopalate obape sabale oba sa:kelaminini a:pite obate sa:sa:lena baya nanotolona gima sa:kelalotelelo.

¹⁷ Oba tepa waelabegale obape giwa:la gili wiwimunamalelo, oba awe nagala bini eladele baigabaiga dima giwa:la eladele obai dapolalo.