रोमियों 8 - Garhwaliपवित्र आत्मा का द्वारा जीवन 1 इलै अब जु लोग प्रभु यीशु मसीह का दगड़ा मा एक ह्वे गैनी, ऊं पर दण्ड की आज्ञा नि च। 2 किलैकि जीवन देण वळा परमेस्वर की पवित्र आत्मा न अपणा नियम का मुताबिक तुमतै यीशु मसीह पर बिस्वास करण की वजै से पाप अर मौत का बन्धन से आजाद कैरियाली। 3 किलैकि पिता परमेस्वर न वु काम कैरिके दिखै दिनी, जु काम नियम-कानूनों न नि कैरी सैकी, अर सरील की इच्छा मा ऊंतैं पूरु करण बड़ु कठिन छौ। इलै वेन ये काम तैं पूरु करणु खुणि अपणा पुत्र तैं ईं दुनियां मा एक मनखि का रुप मा भेजि, ताकि एक पापि सरील तैं लेके उ पाप का दण्ड तैं अपणा मथि ले ल्यो, अर हमतै माफी मिली जौ। 4 अर यू सब त इलै ह्वे, ताकि हम लोग परमेस्वर की नजर मा धरमी जीवन जीण की मांग तैं पूरु कैरी सैका, जु कि नियम-कानून का मुताबिक च। अर खास कैरिके या बात ऊं लोगु मा पूरि हो जु की सरील का मुताबिक ना, बल्किन मा पवित्र आत्मा का मुताबिक चलदिन। 5 किलैकि ईं दुनियां मा मनखि दुनियां की बातों पर अपणु मन लगौन्दिन, इलै ऊ अपणा सरील की मनसा का मुताबिक ही चलदिन, मगर जु लोग पवित्र आत्मा का मुताबिक अपणा जीवन तैं चलौण चनदिन, वु लोग अपणु मन पवित्र आत्मा की बातों पर लगौन्दिन। 6 अब जु लोग केवल अपणा सरील की मनसा तैं पूरि करण मा लग्यां रौनदिन, ऊंन मुरण च मगर जु लोग पवित्र आत्मा की मनसा का मुताबिक चलदिन, ऊ ज्यून्दा राला अर एक नयू जीवन पाला अर ऊंतैं अपणा जीवन मा शान्ति मिलली। 7 किलैकि शरीर पर मन लगौण को मतलब परमेस्वर का दगड़ा मा दुसमनी रखण च, अर मनखि को सरील ना त परमेस्वर का नियम-कानून का अधीन च अर नऽ त कभि ह्वे सकदु। 8 अर जु लोग सरील का मुताबिक चलदिन, वु पिता परमेस्वर तैं खुश नि कैरी सकदिन। 9 पर अगर जु पिता परमेस्वर को पवित्र आत्मा सच्चि मा तुम मा वास करदु, त ईं बात तैं जाणि ल्या, कि तुम लोग ईं दुनियां मा पाप का वस मा नि छाँ, बल्किन तुम मा पवित्र आत्मा को वास च। अर जै मनखि मा प्रभु यीशु को पवित्र आत्मा वास नि करदु, वु मनखि यीशु मसीह को नि ह्वे सकदु। 10 अर अगर जु यीशु मसीह को सभौ तुम मा वास करदु, अब चै तुमरो सरील पाप की वजै से मोरि भि किलै नि जौ, फिर भि पवित्र आत्मा तुमतै सदनि को जीवन द्यालु, किलैकि तुमुन बिस्वास कैरी अर पिता परमेस्वर की नजर मा धरमी ठैरि ग्यां। 11 अर पिता परमेस्वर न यीशु मसीह तैं मुरदो मा बटि ज्यून्द कैरी, अर वेकी पवित्र आत्मा तुम लोगु मा वास करदी, त जन वेन यीशु मसीह तैं मुरदो मा बटि ज्यून्द कैरी, उई तुमरा नास होण वळा सरील तैं भि अपणा पवित्र आत्मा का द्वारा मुरदो मा बटि ज्यून्द करलु। अर इन वु इलै करलु, किलैकि वेकी पवित्र आत्मा तुम मा भि वास करदी। 12 हे मेरा भै-बैंणो, हमरु फरज यू नि च, कि हम अपणा सरील की इच्छा का मुताबिक अपणु जीवन को गुजर-बसर कैरा। 13 किलैकि अगर जु तुम सरील की इच्छा का मुताबिक अपणा जीवन को गुजर-बसर करद्यां, त या बात पक्की च कि तुमरि आत्मिक मौत जरुर होण, पर अगर जु तुम पवित्र आत्मा का द्वारा सरील की इच्छा को नास करद्यां, त तुमतै सदनि को जीवन दिये जालु। 14 इलै जथगा लोग परमेस्वर की पवित्र आत्मा का मुताबिक अपणु जीवन तैं चलौन्दिन, वु लोग पिता परमेस्वर की औलाद छिन। 15 अर जु पवित्र आत्मा तुमतै दिये गै, वु तुमतै गुलाम नि बणौन्दु कि तुम फिर से डौऽरी-डौऽरी के अपणा जीवन को गुजर-बसर कैरा। अरे, जु पवित्र आत्मा पिता परमेस्वर न तुमतै देई वां से इन साबित होन्दु, कि हम वेकी औलाद छां। तभि त हम पिता परमेस्वर कू, “हे अब्बा, मेरा पिता” बोलि सकद्यां। 16 अर तब पवित्र आत्मा हमरि आत्मा का दगड़ा मा मिली के इन गवै देन्दी, कि हम परमेस्वर की औलाद छां। 17 अर अगर जु हम पिता परमेस्वर की औलाद छां, त यां को मतलब यू च कि हम वेका वारिस भि छां। अर स्वर्ग मा जन यीशु मसीह पिता परमेस्वर को वारिस च, ठिक उन्नि स्वर्ग मा हमतै भि वेसे वारिस होण को अधिकार मिलण, अर यू अधिकार मिलण की वजै से हम भि यीशु मसीह का दगड़ा मा साझी ह्वे जौला। इलै हे मेरा भै-बैंणो, या बात सच्च च कि अगर हम यीशु मसीह की तरौं दुख-तकलीफ सौन्द्यां, त स्वर्ग मा पिता परमेस्वर हमतै भि जरुर आदर-सम्मान द्यालु। स्वर्ग मा मिलण वळु आदर-सम्मान 18 हे मेरा दगड़्यों, मि इन समझदु की आज का ये बगत मा जु दुख-तकलीफ हम झिलणा छां, यू सब कुछ वे आदर-सम्मान का समणि कुछ भि नि च, जु कि हम पर परगट किये जालु। 19 अर पूरि धरती सबर रखी के परमेस्वर का परगट होण को इंतजार कनि च, कि कब उ अपणा औलादों तैं आदर-सम्मान द्यालु। 20 अर एक बगत छौ, जब पूरि धरती पिता परमेस्वर का द्वारा मिल्यां दण्ड का अधीन मा चलि गै छै, अर इनकै सब चीज बेकार ह्वे गैनी। अर वे बगत धरती वेका खिलाप मा खुद नि गै छै, मगर फिर भि वेन इन होण दिनी। अर अब पूरि धरती बड़ी आस से वेको इंतजार कनि च, 21 कि अब वा भि विणास कि गुलामी से आजाद ह्वेके छुटकारु पालि, अर पिता परमेस्वर की तरफा बटि वेकी औलादों तैं मिलण वळा आदर-सम्मान मा धरती भि सामिल ह्वेके बदलि जालि। 22 किलैकि हम जणदा छां, कि पूरि धरती अभि तक वीं जनानि का तरौं पीड़ा मा कड़ौणी च, ज्वा कि अपणा बच्चा तैं जनम देण वळी होन्दी। 23 अर या धरती ही ना, बल्किन मा हम बिस्वासी लोग भि जौं तैं वेन पैलि अपणु पवित्र आत्मा दिनी, हम भि ईं धरती का जन पीड़ा अर परेसानियों मा रै के वेको इंतजार कना छां, कि परमेस्वर की औलाद होण का नाता आखिर कब उ हम पर लग्यां इळजामो अर पापों से छुटकारु द्यालु? 24 अर ईं आस का द्वारा ही हमरु छुटकारा भि होयुं च। अर आस हमेसा वीं बात की किये जान्दी ज्वा कि दिखौण मा नि औन्दी, मगर जब वा आंख्यों का समणि साफ ह्वे जान्दी तब आस रखण को कुई फैदा नि च। 25 मगर हम वे पर अपणी आस बणै के रखद्यां, जु हमुन देखि ही नि छिन। इलै हम सबर रखी के ऊं चीजों तैं पौण को इंतजार करद्यां। 26 अर ठिक इन्नि जब हम बिस्वास मा मजबूत नि रौन्द्यां, त परमेस्वर को पवित्र आत्मा हमरि मदद करदु। अर वे बगत हमतै इन पता नि रौन्दु कि हमतै क्या प्रार्थना करण चयेणी। तब पवित्र आत्मा हमरि आत्मा मा ह्वेके पिता परमेस्वर बटि बात करदु, अर रुवे-रुवे के वेसे हम खुणि प्रार्थना करदु। 27 अर मनों तैं परखण वळु परमेस्वर जणदु च, कि पवित्र आत्मा की क्या मनसा च, किलैकि उ पवित्र लोगु खुणि परमेस्वर बटि वेकी मनसा का मुताबिक बिन्ती करदु। 28 अर हम जणदा छां कि जु लोग परमेस्वर से प्यार करदिन, ऊं खुणि सब बात मिलै के भलै ही पैदा करदिन, हाँ, ऊं लोगु खुणि जौं तैं पिता परमेस्वर न अपणी इच्छा का मुताबिक बुलयूं च। 29 किलैकि पिता परमेस्वर जौं लोगु तैं दुनियां की शुरुवात से भि पैलि बटि जणदु, ऊं खुणि वेन इन योजना बणै कि वु सब लोग वेका पुत्र यीशु मसीह का जन ह्वे जा, ताकि उ सब लोगु मा सबसे पैलु बणि जौ, अर वेका बाद सब वेका भै-बैंणा ह्वे जा। 30 अर दुनियां की शुरुवात से भि पैलि जौं लोगु तैं पिता परमेस्वर न चुण्यालि छौ, वेन ऊंतैं बुलै भि च अर ऊंको न्याय कैरिके ऊंतैं अपणी नजर मा धरमी भि ठैरैयालि। अर वेन ऊंतैं अपणी नजर मा केवल धरमी ही नि ठैरै, बल्किन मा ऊंतैं आदर-सम्मान भि दियाली। परमेस्वर को प्यार 31 हे मेरा भै-बैंणो, अब मि तुमतै इन बतौण चान्दु, कि यों सब बातों की एक ही बात च अर वा या च कि अगर जु पिता परमेस्वर हमरि तरफा च, त हमरु विरोध करण वळु कुई भि नि ह्वे सकदु। 32 अर यू सच्च च कि पिता परमेस्वर न हमरि खातिर अपणा पुत्र तैं भि नि छोड़ि, बल्किन मा वेन वेतैं भि हमरि खातिर दे दिनी, त वु ही परमेस्वर हमतै यीशु मसीह का दगड़ा मा सब कुछ द्यालु। 33 अर जब पिता परमेस्वर ही अपणा लोगु तैं निरदोष साबित करदु, त फिर कु च वु, जु कि वेका चुण्यां लोगु पर नियम-कानून तोड़ण को इळजाम लगालु? 34 किलैकि यीशु मसीह वु मनखि च जैतैं पिता परमेस्वर न हम लोगु तैं बचौणु खुणि ठैरै, अर उई च जैतैं मनखि का पापों का खातिर मरे गै। अर पिता परमेस्वर न वेतैं उन्नि नि छोड़ि, बल्किन मा वेतैं मुरदो मा बटि ज्यून्दु कैरी, अर अपणा दैंणी हाथ की तरफा बैठे के वेतैं पूरु आदर-सम्मान दिनी, ताकि वु बिचलु बणि के हमतै पिता परमेस्वर का दगड़ा मा एक कैरो। 35 अब कुई भि हमतै यीशु मसीह का प्यार से अलग नि कैरी सकदु, नऽ त कुई दुख-तकलीफ, ना ही कुई सतौ, नऽ त अकाळ, अर ना ही कपड़ों की कमी जु की हम नंगा ह्वे जा। अर नऽ त नुकसान पौछाण वळु कुई खतरा हमतै वेका प्यार से अलग कैरी सकदु, अर ना ही मौत हमतै वेसे अलग कैरी सकदी। 36 अर जन की पवित्रशास्त्र मा भि लिख्यूं च कि, “त्वे खुणि हम हरेक बगत मौत का खतरा मा रौन्द्यां, अर हम त बलिदान का रुप मा चड़ये जाण वळी भेड़ का जन छां।” 37 मगर यों सब बातों का बारा मा हम यीशु मसीह का द्वारा, जैन हम से प्यार कैरी हरेक बात मा जीत हासिल करद्यां। 38 अर मितैं पूरु यकीन च, कि हमतै परमेस्वर का प्यार से कुई भि अलग नि कैर सकदु, नऽ त मौत, ना ही जीवन, नऽ त स्वर्गदूत, अर ना ही अधिकारी, अर नऽ त आज को दिन, ना ही औण वळु दिन, नऽ त ताकत, ना ही कुई ऊंचै, 39 अर ना ही कुई गैरी जगा, अब चै ईं दुनियां मा कुई भि हो उ हमतै हमरा पिता परमेस्वर का प्यार से, जु की हमरा प्रभु यीशु मसीह का द्वारा हम पर परगट ह्वे वेसे अलग नि कैरी सकदु। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.