रोमियों 4 - Garhwaliबिस्वास द्वारा अब्राहम को धरमी बणण 1 अर अगर इन च, त हम पितर अब्राहम का बारा मा क्या बोला, जु कि सरील का रिश्ता का मुताबिक हमरु पितर च अर हम वेका वंशज छां। 2 किलैकि अगर जु पितर अब्राहम अपणा कामों का द्वारा धरमी ठैरैये जान्दु, त वु बड़ु मोन कैरी सकदु छौ, मगर जु कुछ भि वेन कैरी ऊं सब बातों का खातिर वेन परमेस्वर का समणि बड़ु मोन नि कैरी सैकी। 3 अर पवित्रशास्त्र मा क्या च लिख्यूं? अरे वेमा त इन लिख्यूं च कि, “अब्राहम न परमेस्वर पर बिस्वास कैरी, अर अपणा बिस्वास की वजै से ही उ धरमी गिणै गै।” 4 सुणा, काम करण वळा तैं ध्याड़ि देण कुई दान नि होन्दु, बल्किन मा उ त ऊंको हक च। 5 अर इन्द्रयो कुई भि मनखि नि च जु कि अपणी ताकत से परमेस्वर की नजर मा धरमी साबित ह्वे सैको, मगर जु मनखि परमेस्वर पर बिस्वास करदु उ वेतैं माफ करदु अर अपणी नजर मा वेतैं धरमी साबित करदु। 6 अर जब कुई मनखि भलै का काम नि करदु, पर अपणु बिस्वास पिता परमेस्वर पर बणै के रखदु, त इन्द्रया मनखि तैं पिता परमेस्वर धरमी ठैरान्दु। इलै इन्द्रया मनखि का बारा मा राजा दाऊद भि इन बुल्दु कि, “वु बड़ु धन्य च।” 7 अर भजन संहिता की किताब मा वु इन लिखदु कि, “धन्य छिन ऊ, जौन परमेस्वर का नियम-कानूनों को पालन नि कैरी, मगर फिर भि परमेस्वर न ऊंतैं माफ कैरी, अर धन्य छिन ऊ, जौं का पापों तैं परमेस्वर न दूर कैरियाली, 8 अर धन्य च वु मनखि, जैतैं परमेस्वर पापि नि ठैरान्दु।” 9 अर यहूदी लोग जौन खतना का रिवाज तैं पूरु कर्युं च, आसीस को यू वचन सिरफ ऊं खुणि ही नि च बल्किन मा यू त ऊं लोगु खुणि भि च जौन अपणु खतना नि कर्युं। अर हम त इन बुल्द्यां कि, “पितर अब्राहम न पिता परमेस्वर पर बिस्वास कैरी, इलै वेका बिस्वास की वजै से उ धरमी गिणै गै।” 10 अब तुम सुचणा ह्वेल्या, कि पिता परमेस्वर न जब वेतैं धरमी ठैरै, तब पितर अब्राहम को खतना होयुं रै होलु कि ना। हे मेरा भै-बैंणो मि तुमतै बतै देन्दु कि वे बगत वेको खतना नि होयुं छौ। 11 हाँ, या बात सच्च च कि पिता परमेस्वर न वेतैं पैलि स्वीकार कैरिके धरमी ठैरै दिनी, जब कि वे बगत वेको खतना भि नि होयुं छौ। अर इन वेन इलै कैरी, किलैकि पितर अब्राहम न वे पर बिस्वास कैरी। इलै खतना करण हमरा पितर अब्राहम खुणि एक चिन्न छौ, ताकि पितर अब्राहम ऊं सभ्यों को बुबा बणि जौ, जु पिता परमेस्वर पर बिस्वास त करदा छिन, मगर अपणु खतना नि करौन्दिन। इलै वु सब लोग अपणा बिस्वास करण की वजै से ही पिता परमेस्वर की नजर मा धरमी मणै जनदिन। 12 अर येका दगड़ा-दगड़ि जब पिता परमेस्वर न पितर अब्राहम तैं खतना करण को चिन्न दिनी, त इन करण की वजै से उ हमरु पितर बणि गै, अर हम लोग वेका वंशज। अर हम लोग भि ठिक उन्नि बिस्वास का बाटा पर चलद्यां, जन हमरु पितर अब्राहम चलि छौ जब वेको खतना भि नि होयुं छौ। परमेस्वर का करार सभ्यों खुणि 13 अर यू सब कुछ मूसा का दियां नियम-कानून का मुताबिक नि ह्वे, बल्किन मा पिता परमेस्वर न त वेसे भि पैलि पितर अब्राहम का दगड़ा मा करार कैरी छौं, कि उ अर वेका वंश का लोग ईं दुनियां का वारिस होला। अर यू सब त इलै नि ह्वे, किलैकि वेन नियम-कानूनों को पालन कैरी, बल्किन मा यू त इलै ह्वे किलैकि पितर अब्राहम न पिता परमेस्वर पर बिस्वास कैरी। अर पिता परमेस्वर न भि वेतैं एक धरमी मनखि का रुप मा स्वीकार कैरी। 14 अर अगर जु नियम-कानून को पालन करण वळा लोग ही असली वारिस छिन, त बिस्वास करण वळा लोगु को कुई फैदा ही नि ह्वे, अर जु करार परमेस्वर न कैरी वु भि खतम ह्वे गै। 15 मगर सच्चै त या च कि नियम-कानूनों से लोगु तैं दण्ड मिलदु, किलैकि लोग नियम-कानून को पालन पूरि तरौं से नि कैरी सकदिन। अगर नियम-कानून नि होन्दा, त लोग भि नियम-कानून का खिलाप मा जैके दोषी नि ठैरदा। 16 इलै ही परमेस्वर का द्वारा जु करार किये गै वु मनखि का बिस्वास पर टिक्यूं च, ताकि करार को दान पितर अब्राहम का वंश का सब लोगु तैं पिता परमेस्वर की महान किरपा से मुफत मा मिली सैको। अर केवल यहूदी लोगु खुणि ही ना जु की नियम-कानूनों को पालन करदिन, बल्किन मा हम सभ्यों खुणि भि जु की पितर अब्राहम की तरौं बिस्वास करदिन। इलै ही पितर अब्राहम बिस्वास मा सब लोगु को आत्मिक बुबा च। 17 अर जन कि पवित्रशास्त्र मा भि लिख्यूं च कि, “मिन त्वेतै भौत सा जाति का लोगु खुणि ऊंको बुबा ठैर्युं च।” अर यू करार पिता परमेस्वर न पितर अब्राहम का दगड़ा मा इलै कैरी किलैकि वेन वे पर बिस्वास कैरी। हाँ, वे परमेस्वर पर जु की मुरदो तैं ज्यून्द करदु, अर अपणा बोन्न का मुताबिक सब कुछ बणौन्दु। 18 अर पितर अब्राहम का पास औलाद होण की कुई आस नि छै मगर फिर भि वेन पिता परमेस्वर पर बिस्वास कैरी, इलै उ भौत सि जाति का लोगु को बुबा बणि। अर पिता परमेस्वर न वेसे यू ही करार कैरी छौ कि, “तेरा वंश मा भौत जादा लोग होला।” 19 जब कि वे बगत मा पितर अब्राहम लगभग सौ साल को बुढ्या ह्वे गै छौ, अर वेकी घरवळी सारा बाँझ छै। इलै ऊंका पास कुई उम्मीद नि छै कि ऊंकी कुई औलाद पैदा होलि। मगर यों सब बातों का होन्द भि पितर अब्राहम को बिस्वास कम नि ह्वे। 20 अर जु करार पिता परमेस्वर न वेसे कैरी छौ, वेन वां पर बिस्वास कैरी अर वे पर अपणु बिस्वास बणै के रखी अर सक नि कैरी। अर पितर अब्राहम न जु बिस्वास पिता परमेस्वर पर कैरी वां से वेतैं और भि जादा ताकत मिली, अर पितर अब्राहम न वेकी बडै कैरी। 21 किलैकि वेतैं पूरु यकीन छौ कि जु करार परमेस्वर न वेका दगड़ा मा कर्युं च, वे करार तैं उ पूरु करण की ताकत भि रखदु। 22 अर ये ही बिस्वास की वजै से पितर अब्राहम परमेस्वर की नजर मा धरमी गिणै गै। 23 “उ धरमी गिणै गै” अर पवित्रशास्त्र को यू वचन केवल पितर अब्राहम खुणि ही नि च, 24 बल्किन मा या बात त हम खुणि भि लिखे गै, किलैकि हम वे परमेस्वर पर बिस्वास करद्यां जैन हमरा प्रभु यीशु मसीह तैं मुरदो मा बटि ज्यून्द कैरी। इलै या बात हम खुणि भि च, ताकि हम लोग भि बिस्वास करण का द्वारा धरमी गिणै जां। 25 अर यीशु मसीह ही च जु कि हमरा अपराधों का खातिर मरणु खुणि पकड़वै गै, अर पिता परमेस्वर न वेतैं मुरदो मा बटि ज्यून्द कैरी, ताकि हम वे पर बिस्वास कैरिके धरमी ठैरैये जा। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.