दिब्य दरस 8 - Garhwali

सातवीं मोर अर सोना का धूपदान

¹ जब मेम्‍ना न सातवीं मोर तैं खोली, त स्वर्ग मा अधा घन्टा तक कुछ भि आवाज नि ऐ।

² तब मिन ऊं सात स्वर्गदूतों तैं देखि, जु कि परमेस्वर का समणि खड़ा रौनदिन, अर ऊंतैं सात बिगुला दिये गैनी।

³ फिर एक और स्वर्गदूत ऐ अर उ पिता परमेस्वर की राजगद्‍दी का पास ज्वा वेदी छै, उ वींका समणि खड़ु ह्‍वे गै, अर धूपदेणु खुणि वेका हाथों मा सोनो को एक कटोरा छौ। तब वेतैं भौत सारी धूबत्ती दिये गैनी ताकि वु परमेस्वर का सब लोगु की प्रार्थनाओं तैं भेंट का रुप मा चड़ौ।

⁴ अर फिर पिता परमेस्वर का सब पवित्र लोगु की प्रार्थना धूबत्ती का धुंवा मा मिली के एक स्वर्गदूत का हाथोंळ परमेस्वर का पास पौंछिनी।

⁵ तब स्वर्गदूत न धूपदेणु वळु कटोरा ले अर वेमा वेदी की आग भोरी, अर धरती की तरफा ढोळि दिनी। तब बादळों मा गगड़ट की तेज आवाज औण लगि गै, अर बिजली चमकी, अर भ्वींचळु ऐ।

छह बिगुला

⁶ अर जौं सात स्वर्गदूतों मा सात बिगुला छा, वु ऊंतैं बजौणु खुणि तयार ह्‍वे गैनी।

⁷ अर जब पैला स्वर्गदूत न बिगुला बजै, तब ल्वे मिल्यूं ढांडो अर आग पैदा ह्‍वे, जु की धरती पर ढुळै गै। अर इन होण से जमीन का तीन हिस्सों मदि एक हिस्सा फुकै गै, अर इन्‍नि डाळों को एक हिस्सा फुकै गै, अर पूरि हरीं घास भि फुकै गै।

⁸ अर जब दुसरा स्वर्गदूत न बिगुला बजै, तब समुन्दर मा कुई चीज ढुळै गै जन की एक बड़ु पाड़ जै पर आग लगीं छै। अर इन होण से समुन्दर का तीन हिस्सों मदि एक हिस्सा ल्वे बणि गै।

⁹ अर पाणि का जीव-जन्तुओं मा बटि तीन हिस्सों मदि एक हिस्सा को नास ह्‍वे गै, अर ठिक इन्‍नि समुन्दर का जाजों का तीन हिस्सों मदि एक हिस्सा को नास ह्‍वे गै।

¹⁰ अर जब तिसरा स्वर्गदूत न बिगुला बजै, तब एक बड़ु गैंणु जु मसाल की तरौं जगणु छौ, आसमान बटि पोड़ि के कई गाडा अर पाणि का छोयों का तीन हिस्सों मदि एक हिस्सा पर पोड़ि।

¹¹ अर ये गैंणो को नौ धतुरो च, अर येकी बजै से पाणि का तीन हिस्सों मदि एक हिस्सा कड़ु ह्‍वे गै, अर पाणि कड़ु होण की वजै से भौत सा लोग मोरि गैनी।

¹² अर जब चौथा स्वर्गदूत न बिगुला बजै, तब सूरज, चाँद अर गैंणो का तीन हिस्सों मदि एक हिस्सा को नास ह्‍वे गै अर ऊंन उज्याळु देण बन्द कैर दिनी। अर इनकै सूरज न दिन मा चार घन्टा उज्याळु देण बन्द कैरी, अर ठिक उन्‍नि रात मा चाँद अर तारों न भि चार घन्टा उज्याळु देण बन्द कैर दिनी।

¹³ तब मिन आसमान मा एक चील तैं उड़ण देखि अर मिन वेतैं ऊँची आवाज मा इन बुल्दु सुणी कि, “धरती पर रौण वळा लोगु, तुम पर हाय च, हाय, किलैकि तीन और स्वर्गदूतों छिन जौन अभि अपणु-अपणु बिगुलो बजौण।”