दिब्य दरस 7 - Garhwali

परमेस्वर का चुण्यां एक लाख चवालीस हजार लोगु पर मोर

¹ येका बाद मिन धरती का चरी कुणों पर चार स्वर्गदूत खड़ा होयां दिखिनी। अर ऊंन धरती मा चौतरफि दिसा की हवा तैं रोकी के रख्युं छौ, ताकि नऽ त कै डाळा पर, नऽ त धरती पर अर ना ही समुन्दर मा हवा चलु।

² तब मिन एक और स्वर्गदूत तैं पूरब दिसा बटि औन्द देखि, अर वेमा ज्यून्दा परमेस्वर की मोर छै। अर जौं चार स्वर्गदूतों तैं धरती अर समुन्दर मा नुकसान पौंछण को अधिकार दिये गै छौ, वेन ऊंकू ऊँची आवाज मा बोलि कि,

³ “जबरि तक हम अपणा परमेस्वर का सेवकों का माथा पर मोर नि लगै द्‍या, तब तक डाळों अर धरती पर या समुन्दर मा कुई भि नुकसान नि पौंछ्यां।”

⁴ अर जौं पर मोर लगये गै मिन अपणा कन्दूड़ो न ऊंकी गिनती सुणी ऊंकी गिनती एक लाख चवालीस हजार छै। अर ऊ इस्राएल का हरेक गोत्र मा बटि छा।

⁵ यहूदा का गोत्र मा बटि बारह हजार पर मोर लगि, अर उन्‍नि रूबेन का गोत्र बटि बारह हजार पर, अर गाद का गोत्र बटि बारह हजार पर मोर लगि।

⁶ अर आशेर का गोत्र बटि बारह हजार पर मोर लगि, अर उन्‍नि नप्‍ताली का गोत्र बटि बारह हजार पर, अर मनशेस का गोत्र बटि बारह हजार पर मोर लगि।

⁷ अर शमौन का गोत्र बटि बारह हजार पर मोर लगि। अर उन्‍नि लेवी का गोत्र बटि बारह हजार पर, इस्साकार का गोत्र बटि बारह हजारों पर मोर लगि।

⁸ अर उन्‍नि जबूलून का गोत्र बटि बारह हजार पर मोर लगि, अर यूसुफ का गोत्र बटि बारह हजार पर, अर बिन्यामीन का गोत्र बटि बारह हजार पर मोर लगि।

एक बड़ी भीड़ का द्‍वारा परमेस्वर अर मेम्‍ने की भक्‍ति

⁹ अर येका बाद मिन भौत सा लोगु तैं देखि, जौं तैं गिणै नि जै सकदु। अर वु अलग-अलग देसों, गोत्रों अर जातियों का छा जु कि अलग-अलग भाषा बुल्दिन। अर ऊंका सफेद कपड़ा पैरयां छा अर अपणा हाथों मा खजूर का फौंकों तैं लेके राजगद्‍दी अर मेम्‍ना का समणि खड़ा होयां छा,

¹⁰ अर इन नारा लगौणा छा कि, “हमतै बचौण वळा परमेस्वर की, जै हो, जु कि राजगद्‍दी पर बैठयूं च बोला वेकी, जै हो हमतै बचौण वळा मेम्‍ना की, जै हो।”

¹¹ अर राजगद्‍दी का चौतरफि सब स्वर्गदूत, अध्यक्ष अर चरी पराण खड़ा होयां छा, अर ऊंन राजगद्‍दी का समणि भ्वीं मा पोड़ि के पिता परमेस्वर की भक्‍ति कैरिके बोलि कि,

¹² “हे मेरा परमेस्वर, तुमरि तारीफ, अर तुमरा आदर-सम्मान, अर तुमरो ही धन्यवाद सदनि तक होणु रौ, तुमरो ज्ञान, अर तुमरि ताकत अर तुमरा सामर्थ की बडै सदनि तक होणी रौ। आमीन।”

¹³ तब एक अध्यक्ष मा बटि एक न मिसे पूछी, “यू सफेद कपड़ा पैरयां लोग कु छिन, अर इख कख बटि ऐनी?”

¹⁴ अर मिन बोलि कि, “हे मेरा प्रभु, मितैं त नि च पता पर तुमतै पता होलु।” अर वेन मिकू बोलि कि, “यू वु लोग छिन, जौन बड़ी पीड़ा सै अर वामा बटि निकळि के अयां छिन, अर ऊंन अपणा कपड़ों तैं मेम्‍ना का ल्वे मा ध्वेके के खुद तैं सफेद कर्युं च।

¹⁵ इलै यू लोग परमेस्वर का मन्दिर मा रै के वेकी सेवा करदिन। अर वेकी राजगद्‍दी का समणि खड़ा छिन। अर परमेस्वर जु कि राजगद्‍दी पर बैठयूं च उ ऊंका दगड़ा मा च अर ऊंकी देख-रेख करदु।

¹⁶ फिर यों तैं ना कभि भूक लगली अर ना यू तिसाला, नऽ त यों तैं घाम लगलु अर ना ही चटकतळै हाळ,

¹⁷ किलैकि मेम्‍ना जु की राजगद्‍दी का बीच मा च, उ ऊंको चरवाह होलु, अर ऊंतैं जीवन का छोया का पास लेके जालु। अर पिता परमेस्वर ऊंका आंख्यों बटि सब आंसुओं तैं फुंजी द्‍यालु।”