दिब्य दरस 21 - Garhwaliपरमेस्वर का द्वारा बणयूं नयू स्वर्ग अर धरती 1 तब मिन एक नयू स्वर्ग अर एक नयी धरती देखि, अर पैलु आसमान अर पैलि धरती गैब ह्वे गै छै, अर समुन्दर भि नि रै। 2 फिर मिन पवित्र नगर, नया यरूशलेम तैं, परमेस्वर की तरफा बटि स्वर्ग बटि मूड़ी उतरद देखि। अर उ इन सज्युं छौ जन कि ब्यौलि अपणा ब्यौला खुणि सजीं रौन्दी। 3 फिर मिन राजगद्दी बटि कैतैं एक तेज आवाज मा इन बुल्द सुणी, “देख, परमेस्वर को डेरा मनखियों का बीच मा च, अर अब वु ऊंका बीच मा रालु, अर ऊ वेका लोग होला। अर परमेस्वर खुद ऊंका बीच मा रालु। 4 अर परमेस्वर ऊंका आंख्यों का सब आंसुओं तैं फुंजी द्यालु, फिर नऽ त मौत रैलि, ना शोक, नऽ रुंण-धुण अर ना ही कुई पीड़ा, किलैकि जु बात पैलि छै अब वु सब खतम ह्वे जालि।” 5 तब जु राजगद्दी पर बैठयूं छौ वेन बोलि, “देख, मि सब कुछ नयू बणौणु छौं।” अर वेन फिर मिकू बोलि, “लिख ले, किलैकि यू वचन भरोसा का लैख अर सच्चा छिन।” 6 अर वेन मिकू इन भि बोलि, “यू सब बात पूरि ह्वे गैनी, मि ही पैलु अर आखिरी छौं, शुरुवात अर आखिरी मि ही छौं। जैतैं तीस लगीं हो वेतैं मि जीवन देण वळा पाणि का छोया मा बटि मुफत मा पिलौलु। 7 अर जु जीत हासिल करलु वेतैं विरासत मिलेली, अर मि वेको परमेस्वर होलु अर उ मेरु पुत्र होलु। 8 मगर डऽरपोक अर जु बिस्वास नि करदिन, अर अशुद्ध अर जु घिण वळा काम करदिन, अर कत्ल करण वळा, अर गळत सम्बन्ध बणौण वळा छिन, अर जु लोग जादु-टोंणा अर मूरत पूजा करदिन, अर सब झूठ्ठ बोन्न वळा लोगु को हिस्सा वीं आग मा होलु, ज्वा की गंधक से जगणी रौन्दी। अर या ही दुसरि मौत च।” परमेस्वर का चुण्यां लोगु खुणि हमेसा की शान्ति 9 फिर जौं सात स्वर्गदूतों का पास सात आखिरी विपदा से भोर्यां सात कटोरा छा, ऊं मदि एक न मेरा पास ऐके बोलि, “यूहन्ना इख अऽ, मि त्वेतै वा जगा दिखान्दु जख बिस्वासी समुदाय का लोग यीशु से मिलणु खुणि तयार छिन, ठिक उन्नि जन एक ब्यौलि अपणा ब्यौला खुणि तयार रौन्दी।” 10 तब पवित्र आत्मा मितैं अपणा ताकत से एक भौत ऊँचा अर बड़ा ढौंडा मा लि गै, अर वेन मितैं पवित्र नगर यरूशलेम दिखै, जु कि स्वर्ग बटि परमेस्वर का पास से मूड़ी उतरणु छौ। 11 जु कि परमेस्वर की दिब्य चमक से चमकणु छौ। वेकी चमक भौत मैंगा हीरा की तरौं, अर सूर्यकान्त मणि की तरौं चमकीली छै। 12 नगर की दिवाल भौत बड़ी अर ऊँची छै, अर वेमा बारह गेट छा। अर यों पर बारह स्वर्गदूत बैठयां छा, अर ऊं गेटों पर इस्राएल का बारह गोत्रों का नौ लिख्यां छा। 13 तीन गेट पूरब दिसा की तरफा, अर तीन गेट उत्तर दिसा की तरफा, तीन गेट दक्छिण दिसा की तरफा छा अर तीन गेट पच्छिम दिसा की तरफा छा। 14 अर ये नगर की दिवाल बारह बुनियादो पर खड़ि छै, अर ऊं पर यीशु का बारह खास चेलों का नौ लिख्यां छा। 15 अर जु स्वर्गदूत मेरा दगड़ा मा बात कनु छौ, वेमा ये नगर अर वेकी दिवालों अर वेका गेटों तैं नपणु खुणि सोना को एक फीता छौ। 16 यू नगर चौकोर छौ अर यू जथगा लम्बो छौ उथगा ही चौड़ु भि छौ। अर वेन वे फीतळ नगर तैं नापी, त बाइस सौ किलोमीटर निकळि। अर ये नगर की लम्बै-चौडै अर वेकी ऊंचै एक ही जन छै। 17 तब वेन दिवाल तैं नापी, त वा एक सौ चवालीस हाथ की छै, जै नाप से स्वर्गदूत नपणु छौ उ नाप मनखियों का नाप का बराबर छौ। 18 अर ये नगर की दिवाल सूर्यकान्त मणि की बणि छै, अर नगर साफ काँच की तरौं शुद्ध सोना को छौ। 19 अर दिवाल की बुनियाद सब किसम का मैंगा मणियों से सजीं छै। लाल रंग को पैलु मणि सूर्यकान्त छौ। नीला रंग को दुसरो मणि नीलम छौ, भूरणयां रंग को तिसरु मणि गौदन्ती छौ। अर हरयां रंग को चौथुँ मणि पन्ना छौ। 20 हल्का लाल रंग को पांचु मणि गोमेद छौ। लाल रंग को छटुं मणि माणिक्य छौ, सोना का रंग की तरौं सातु मणि पीतमणी छौ। अर नीला रंग की तरौं आठु मणि फिरोजे छौ, पीला रंग की तरौं नवु मणि पुखराज छौ। अर खाकी रंग को दसुं मणि लहसुनिया छौ, हल्का नीला रंग को ग्यारु मणि धुम्रकान्त छौ, अर बैंगनि रंग को बारु चन्द्रकान्त को छौ। 21 अर बारह गेट बारह मोतियों का बणयां छा, हरेक गेट एक-एक मोति को बणयूं छौ। अर नगर की सड़क साफ काँच की तरौं शुद्ध सोना की बणि छै। 22 मिन वे नगर मा कुई मन्दिर नि देखि, किलैकि सर्वसक्तिमान प्रभु परमेस्वर, अर यीशु ही वेको मन्दिर च। 23 वे नगर तैं उज्याळु देणु खुणि सूरज अर चाँद की जरुरत नि च, किलैकि परमेस्वर को तेज वेतैं उज्याळु देन्दु, अर यीशु वेको द्यू च। 24 अर सब जाति का लोग वे नगर का उज्याळा मा चलला अर धरती का राजा अपणी धन-दौलत मा बटि वेमा लेके आला। 25 अर वेका गेट कभि भि बन्द नि होला, किलैकि उख कभि भि रात नि होलि। 26 अर देस की धन-दौलत अर सान-सौकत नगर मा लये जालि। 27 अर कुई भि अशुद्ध चीज, अर ना ही कुई इन्द्रयो मनखि जु कि इन्द्रया काम करदु हो ज्यां से की घिण अऽ, या झूठ्ठ बुल्दु हो इन्द्रया लोग वेमा कभि दाखिल नि ह्वे सकला। मगर जौं को नौ जीवन की किताब मा लिख्यां छिन उई लोग वेमा दाखिल होला, अर या किताब यीशु मसीह की च जु कि मेम्ना की तरौं बलिदान ह्वे गै। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.