दिब्य दरस 11 - Garhwali

परमेस्वर का दुई गवा

¹ तब मितैं नपणु खुणि एक फीता दिये गै, अर कैन मिकू बोलि, “उठ अर परमेस्वर का मन्दिर अर वेदी तैं नाप, अर वामा भक्‍ति करण वळो की गिनती कैर।

² पर मन्दिर का भैर वळा बरण्डा तैं छोड़ि दे वेतैं नि नाप, किलैकि उ ऊंतैं दिये गै जु यहूदी जाति का नि छिन, अर यू लोग सढ़े तीन साल तक पवित्र नगर का लोगु पर जुलम करला।

³ अर मि अपणा दुई गवा तैं इन ताकत द्‍यूलु, कि ऊ टाट पैरि के सढ़े तीन साल तक भविष्यबाणी करला।”

⁴ यू दुई गवा जैतून का दुई डाळा अर दुई दीपदान का जन छिन, जु पूरि धरती पर राज करण वळा प्रभु का समणि खड़ा रौनदिन।

⁵ अगर कुई ऊंतैं नुकसान पौंछाण चान्दु, त ऊंका गिच्‍चों बटि आग निकळि के ऊंका दुसमनों तैं भसम कैरी देन्दी। अगर कुई ऊंतैं नुकसान पौछाण कि कोसिस करलु, त ऊंतैं भि उन्‍नि मरे जालु।

⁶ अर ऊंका पास इन अधिकार च कि ऊ आसमान तैं बन्द कैरी सकदिन, ताकि जौं दिनों मा ऊ भविष्यबाणी करला ऊं दिन मा आसमान नि बरखो, अर पाणि तैं ल्वे बणण को अर जब ऊ चा तब धरती पर बड़ी-बड़ी महामारी भेजि सकदिन।

⁷ अर जब वु दुई गवा अपणी गवै देण का काम तैं पूरु कैरी द्‍याला, तब एक दैंत अधलोक बटि भैर निकळ्‍ळु अर ऊं दुई गवाओ का दगड़ा मा युद्ध करलु, अर ऊं पर जीत हासिल कैरिके ऊंतैं जान से मारी द्‍यालु।

⁸ अर ऊंन दुईयों की लांश यरूशलेम नगर का बीचों-बीच पोड़ि राली, जख ऊंका प्रभु तैं भि क्रूस पर चड़ये गै छौ। अर उखा लोगु को चाल-चलन सदोम नगर की तरौं बुरु, अर वु लोग मिस्र मुलक का लोगु की तरौं बेरहम छिन।

⁹ अर सब जाति, गोत्र, अर सब भाषा अर देस-देस का लोग सढ़े तीन दिन तक ऊंकी लांश तैं दिखणा राला, अर ऊंतैं कबरुन्द नि रखण द्‍याला।

¹⁰ अर धरती मा रौण वळा लोग ऊंकी मौत पर खुशी मणाला अर मगन ह्‍वे जाला, अर वु एक-दुसरा तैं उपहार द्‍याला, अर इन ऊ इलै करला, किलैकि यों दुई रैबर्यों न धरती पर रौण वळो तैं अपणा रैबार का द्‍वारा भौत दुख दिनी।

¹¹ मगर सढ़े तीन दिन का बाद परमेस्वर न ऊंका सरील मा जीवन की सांस फूकी दिनी, अर ऊ अपणा खुटों पर खड़ा ह्‍वे गैनी। तब जु लोग ऊंतैं दिखण छा ऊं सभ्यों पर बड़ु खौफ ऐ गै।

¹² अर ऊंन स्वर्ग बटि एक तेज आवाज सुणी, जिं न ऊं दुईयों कू इन बोलि, “इख मथि ऐ जा।” अर ऊ दुईया का दुई बादळों मा उठये गैनी, अर ऊंका दुसमन ऊंतैं दिखदी रै गैनी।

¹³ अर वे ही बगत एक बड़ु भ्वींचळु ऐ अर नगर का दसुं हिस्सा को नास ह्‍वे गै, अर सात हजार लोग वे भ्वींचळा मा मोरि गैनी। अर बच्यां लोगु मा डौऽर समै गै अर ऊंन स्वर्ग मा रौण वळा परमेस्वर की बडै कैरी।

¹⁴ अर दुसरि विपदा भि पूरि ह्‍वे गै, अर जल्द तिसरी औण वळी च।

सातु बिगुलो

¹⁵ अर जब सातवां स्वर्गदूत न बिगुला बजै, त स्वर्ग बटि तेज आवाज ऐ अर वींन इन बोलि कि, “दुनियां पर राज करण को अधिकार अब हमरा परमेस्वर अर वेका मसीह को ह्‍वे गै। अर उ हमेसा-हमेसा तक राज करला।”

¹⁶ अर चौबीस अध्यक्षों न जु की परमेस्वर का समणि अपणी-अपणी राजगद्‍दियों पर बैठयां छा, ऊंन भ्वीं मा पोड़ि के परमेस्वर की भक्‍ति कैरी।

¹⁷ अर इन बोलि कि, “सर्वसक्‍तिमान प्रभु परमेस्वर, जु छौ जु अभि भि च हम तुमरो धन्यवाद करद्‍यां, किलैकि तुमुन अपणी बड़ी ताकत को इस्तेमाल कैरिके राज कन शुरु कैरियाली।

¹⁸ अर जब देस-देस का लोग तुम से गुस्सा ह्‍वेनि, त तुमरो परकोप ऊं पर भड़की गै। अर अब वु बगत ऐ गै जब तुम मुरयां लोगु को न्याय करिल्या, अर अब तुमरा सेवकों, रैबर्यों, अर सब पवित्र लोगु, अर जथगा भि लोग तुमरा नौ पर सरदा रखदिन ऊं सब सेवकों तैं इनाम दिये जालु, चै वु छुटा हो या बड़ा, मगर जौं लोगु न धरती तैं बरबाद कैरी तुम ऊंतैं खतम कैरी दिल्या।”

¹⁹ तब परमेस्वर को मन्दिर जु कि स्वर्ग मा च खुलै गै, अर वे मन्दिर मा करार को बक्सा दिखै। अर फिर बिजली चमकी अर बादळों की गगड़ाट, अर भ्वींचळु ऐ अर भौत ढांडो पोड़ि।