दिब्य दरस 10 - Garhwali

स्वर्गदूत अर एक छुटो दस्तावेज

¹ अर येका बाद मिन स्वर्ग बटि एक और ताकतबर स्वर्गदूत तैं उतरद देखि, जैन बादळों तैं कपड़ों की तरौं पैरयूं छौ, अर वेका मुण्ड़ मा मेघधनुष छौ। अर वेको मुख सूरज की तरौं, अर वेका खुटा आग का खम्बों की तरौं छा।

² अर वेका हाथ मा एक छुटो दस्तावेज छौ जु कि खुल्यूं छौ। अर वेन अपणु दैंणु खुटों समुन्दर मा रखी, अर अपणु बैं खुटों धरती पर रखी,

³ अर उ शेर की तरौं डुकरताळ मारी के चिल्‍लै। अर जब उ चिल्‍लै त बादळों मा बटि गगड़ाट की सात आवाज सुणैनी।

⁴ अर जब सात आवाज ह्‍वे गैनी, त मि लिखण वळु छौ, मगर मिन स्वर्ग बटि एक आवाज सुणी जैन मिकू बोलि, “सात आवाजों मा जु बुले गै, ऊंतैं लिख ना बल्किन मा छिपै के रख।”

^5-6 अर परमेस्वर हमेसा खुणि ज्यून्द च जैन आसमान अर वेकी सब चीजों तैं, धरती अर वेकी सब चीजों तैं, समुन्दर अर वेकी सब चीजों तैं बणै। अर जै स्वर्गदूत तैं मिन समुन्दर अर धरती पर खड़ु होयुं देखि, वेन अपणा दैंणा हाथ तैं स्वर्ग की तरफा उठे, अर परमेस्वर की कसम खै के बोलि, “अब जादा देर नि होलि।

⁷ पर जब सातु स्वर्गदूत को बिगुलो बजौण को बगत आलु, त वे बगत परमेस्वर अपणी छिपी योजना तैं पूरि करलु, जैकी घोसणा वेन अपणा सेवकों याने कि अपणा रैबर्यों का द्‍वारा कैरी छै।”

⁸ अर ज्वा आवाज मिन पैलि स्वर्ग बटि सुणी छै, वींन मिकू फिर से इन बोलि कि, “जा, जु स्वर्गदूत समुन्दर अर धरती पर खड़ु होयुं च, वेका हाथ बटि वे खुल्यां दस्तावेज तैं ले ले।”

⁹ तब मिन वे स्वर्गदूत का पास जैके वेसे वु छुटो दस्तावेज मांगि। अर वेन मिकू बोलि, “ले, अर येतैं खै ले, यू तेरा गिच्‍चा मा शहद की तरौं मिठ्‍ठु लगलु मगर तेरा पुटगा तैं खट्‍टु कैरी द्‍यालु।”

¹⁰ अर मिन स्वर्गदूत का हाथ बटि वु छुटो दस्तावेज लेके खै दिनी अर वा मेरा गिच्‍चा मा शहद की तरौं मिठ्‍ठु लगि, पर जब मिन खै दिनी त मेरु पुटगु खट्‍टु ह्‍वे गै।

¹¹ अर येका बाद मिकू इन बुले गै कि, “त्वेतै भौत सि जातियों, देसों अर अलग-अलग भाषा का लोगु खुणि, अर भौत सा राजाओं का बारा मा और भविष्यबाणी करण होलि।”