मरकुस 16 - Garhwali

यीशु को मौत से ज्यून्दु होण

¹ अर जब सब्त को दिन खतम ह्‍वे गै, त मगदला गौं की मरियम अर याकूब की माँ मरियम, अर सलोमी न खुशबुदार चीजों तैं खरीदी, ताकि जैके यीशु की लांश पर लगौ।

² अर हप्‍ता का पैला दिन याने कि इतवार की सुबेर जब घाम औणु ही छौ, त ऊ कबर जनै गैनी।

³ अर वु अपणा आपस मा इन बोन्‍नि छै कि, “हम खुणि वे डांग तैं कु जि हटालु जु कि कबर का मुख पर लग्यूं च?”

⁴ मगर जब ऊंन कबर जनै देखि, त ऊंन देखि की डांग त पैलि बटि हटयुं च। अर उ डांग भौत ही बड़ु छौ।

⁵ अर जब वु कबर का भितर गैनी, त ऊंन देखि कि एक ज्वान सफेद कपड़ा पैरयूं दैंणी तरफा बैठयूं च, अर वेतैं देखि के वु भौचक ह्‍वे गैनी।

⁶ पर वेन ऊंकू बोलि, “सुणा, ताजुब नि कैरा, नासरत गौं का जै यीशु तैं क्रूस पर चड़ये गै छौ, जैतैं तुम खुज्याणा छाँ, उ मुरदो मा बटि ज्यून्दु ह्‍वे गै। अर देखा, या वा ही जगा च जख ऊंन वेतैं रखी छौ, मगर अब उ इख नि च।

⁷ पर तुम जा, अर वेका चेलों अर पतरस कू बोला कि उ तुम से पैलि गलील मुलक कू जाणु च। अर जन वेन तुम कू बोलि छौ वेका मुताबिक तुम लोग वेतैं उखि दिखल्या।”

⁸ तब वु जनानियां कबर बटि भैर ऐनी अर उख भागी के चलि गैनी, ऊ भौत हकदक अर कौंपणी छै, अर ऊंन या बात कैतैं नि बतै, किलैकि ऊ भौत डऽरयां छा। [

मगदला गौं की मरियम तैं यीशु को दिख्यौण

⁹ हप्‍ता का पैला दिन सुबेर होन्दी यीशु मुरदो मा बटि ज्यून्द होण पर सबसे पैलि मगदला गौं की मरियम तैं दिखै, अर या वा ही जनानि च जिं मा बटि यीशु न सात खबेसों तैं निकाळि छौ।

¹⁰ अर जु लोग यीशु का पिछनै चलण वळा छा, ऊ बड़ु शोक कना अर रुंणा छा। अर वींन ऐके ऊंतैं या खबर सुणै।

¹¹ मगर जब ऊंन सुणी कि उ ज्यून्दु ह्‍वे गै अर वींन यीशु तैं देखि, त ऊंन वीं की बातों पर बिस्वास नि कैरी।

दुई चेलों तैं यीशु को दिख्यौण

¹² अर येका बाद यीशु का दुई चेला कै गौं कू जाणा छा, तब यीशु ऊं दुईयों तैं कै अलग ही रुप मा दिखै।

¹³ तब ऊंन जैके दुसरा लोगु तैं ईं बात कि खबर दिनी, मगर ऊं लोगु न फिर भि यों की ईं बात पर यकीन नि कैरी।

ग्यारा चेलों तैं यीशु को दिख्यौण

¹⁴ अर येका बाद जब यीशु का ग्यारा चेला खाणुक खाणु खुणि बैठयां छा, त वे बगत उ ऊंतैं दिखै। तब यीशु न ऊंका निठुर मन अर बिस्वास की कमी की वजै से ऊंतैं झिड़की, किलैकि ज्यून्द होण का बाद जौं लोगु न वेतैं देखि छौ, ऊंकी बातों पर भि यों न यकीन नि कैरी।

¹⁵ अर वेन ऊंकू बोलि, “तुम पूरि दुनियां मा जैके शुभ समाचार को परचार दुनियां का सब लोगु तैं सुणा।

¹⁶ अर जु मनखि बिस्वास करलु, अर बपतिस्मा ल्यालु, वेतैं ही बचयै जालु, पर जु मनखि बिस्वास नि करलु, वु दोषी ठैरैये जालु।

¹⁷ अर बिस्वास करण वळा लोगु मा यू चिन्‍न होला, वु मेरा नौ से खबेसों तैं निकळळा, अर नई-नई भाषा बुलला,

¹⁸ वु गुरौऔं तैं भि उठे द्‍याला, इख तक की अगर वु बिस भि पे द्‍याला, तभि भि ऊंतैं कुछ नुकसान नि होलु, वु बिमार लोगु पर अपणु हाथ रखला अर ऊ खूब ह्‍वे जाला।”

यीशु को स्वर्ग मा उठये जाण

¹⁹ अर जब प्रभु यीशु ऊंका दगड़ा बात कैरी दिनी वेका बाद उ स्वर्ग मा उठये गै, अर परमेस्वर की दैंणी तरफा आदर-सम्मान वळी जगा मा बैठि गै।

²⁰ अर चेलों न उख बटि निकळि के हरेक जगा जैके परचार कैरी। अर प्रभु भि ऊंका दगड़ा-दगड़ि काम कनु रै। अर ऊंका द्‍वारा जु चिन्‍न-चमत्कार का काम होणा छा, वेका द्‍वारा वेन इन साबित कैरी, कि जै वचन को परचार ऊ कना छिन उ वचन सच्‍चु च।]