मत्ती 4 - Garhwali

शैतान को यीशु तैं पाप खुणि भकलौण

¹ यीशु का बपतिस्मा लेण का कुछ देर बाद, पवित्र आत्मा यीशु तैं निर्जन जगा कू लि गै, ताकि उख शैतान वेतैं भकलौ।

² अर वेन चालीस दिनों तक उपवास रख्युं छौ अर वेन कुछ भि नि खै, तब वेतैं भूक लगि।

³ तब शैतान जु कि भकलौण वळु च वेका पास ऐ, अर वेन यीशु कू बोलि, “अगर जु तू परमेस्वर को पुत्र छैई, त यों ढुंगो कू बोल कि रुट्‍टी बण जा।”

⁴ मगर यीशु न वेकी बात तैं नकारी के बोलि कि, “पवित्रशास्‍त्र मा लिख्यूं च कि, ‘मनखि केवल रुट्‍टी बटि ही ज्यून्दु नि रालु, बल्किन मा परमेस्वर का मुख बटि निकळ्यां हरेक वचन बटि ज्यून्द रालु।’”

⁵ तब शैतान वेतैं पवित्र नगर यरूशलेम मा लि गै, अर वेतैं मन्दिर की सबसे ऊँची जगा पर खड़ु कैरिके बोलि,

⁶ “अगर तू परमेस्वर को पुत्र छैई, त इख बटि मूड़ी फाल मारी दे, किलैकि पवित्रशास्‍त्र मा लिख्यूं च कि, ‘तेरी हिफाजत करणु खुणि उ अपणा स्वर्गदूतों तैं आज्ञा द्‍यालु, अर ऊ त्वेतै तुरन्त अपणा हाथों मा उठे द्‍याला, ताकि कखि इन नि हो कि तेरा खुटों मा ढुंगे की चोट लगि जौ।’”

⁷ तब यीशु न वेकी बात तैं नकारी के बोलि कि, “पवित्रशास्‍त्र मा इन भि लिख्यूं च कि, ‘तू अपणा प्रभु परमेस्वर तैं नि भकलौ।’”

⁸ तब शैतान वेतैं एक ऊँचा पाड़ पर लि गै, अर झट वेतैं दुनियां का सब राज्य, अर दुनियां की सब धन-दौलत दिखै के बोलि,

⁹ “अगर जु तू झुकि के मेरी पूजा करली, त मि यू सब त्वेतै दे द्‍यूलु।”

¹⁰ तब यीशु न वेकी बात तैं नकारी के बोलि, “शैतान मेरा पास बटि दूर ह्‍वे जा, किलैकि पवित्रशास्‍त्र मा लिख्यूं च कि, ‘तू केवल अपणा प्रभु परमेस्वर की ही पूजा कैर, अर बस वेकी ही सेवा कैर।’”

¹¹ अर तब शैतान यीशु तैं छोड़ि के चलि गै, अर स्वर्गदूत ऐके यीशु की सेवा करण लगि गैनी।

सेवा का कामों की शुरुवात

¹² अर जब वेन सुणी की यूहन्‍ना तैं बन्धी बणयै गै, तब यीशु वापस गलील मुलक कू चलि गै।

¹³ अर नासरत नगर तैं छुड़ण का बाद उ कफरनहूम नगर मा रौण लगि गै। अर कफरनहूम नगर झील का छाला पर बस्यूं च, अर जबूलून और नप्‍ताली का गोत्र का लोग ये मुलक मा रौन्दा छा।

¹⁴ अर यू इलै ह्‍वे, ताकि यशायाह रैबर्या का द्‍वारा बुलयूं वु वचन पूरु ह्‍वे जौ। अर वु इन च कि,

¹⁵ “जु लोग गलील झील का किनरा जबूलून अर नप्‍ताली का मुलकों मा रौनदिन, इख तक कि जु लोग गलील इलाका मा रौण वळा लोगु का बीच मा रौनदिन, जु कि यहूदी जाति का नि छिन। ऊंकू मि इन बुल्दु कि,

¹⁶ जु लोग अन्धेरा मा अपणा जीवन को गुजर-बसर कना छिन, ऊ एक बड़ा उज्याळा तैं दिखला, अर जु लोग आत्मिक मौत का बाटा मा छिन, ऊं पर एक उज्याळु चमकी।”

¹⁷ अर ये बगत बटि ही यीशु परचार करण लगि गै। अर वेन बोलि कि, “अपणा-अपणा पापों से पस्ताप कैरा, किलैकि परमेस्वर को राज नजदीक ही च अर उ राज करण वळु च।”

पैला चेलों तैं बुलौण

¹⁸ अर जब यीशु गलील की झील का छाला बटि जाणु छौ, त वेन दुई भैयों तैं देखि, शमौन जैकू पतरस भि बुल्दिन, अर वेका भै अन्द्रियास तैं। अर यू दुई मछैर छा अर झील मा जाल डलणा छा।

¹⁹ तब यीशु न ऊंकू बोलि, “मेरा पिछनै आ, अर मि तुमतै मनखियों तैं पकड़ण वळु बणौलु।”

²⁰ अर ऊ अपणा जालों तैं तुरन्त उखि छोड़ि के यीशु का पिछनै ह्‍वे गैनी।

²¹ अर जब यीशु उख बटि अगनै गै, त वेन याकूब अर यूहन्‍ना तैं देखि जु कि जबदी का नौना छा, अर यू दुई भै नाव मा बैठि के अपणा बुबा का दगड़ा मा जाल ठिक कना छा। तब यीशु न ऊंतैं भि अपणा दगड़ा मा बुलै।

²² तब ऊंन भि तुरन्त अपणा बुबा अर नाव तैं छोड़ि दिनी, अर यीशु का पिछनै ह्‍वे गैनी।

भौत सा लोगु तैं खूब करण

²³ अर यीशु पूरा गलील मुलक मा घूमणु रै। अर यहूदी लोगु का प्रार्थना भवनों मा जैके उपदेस देणु रै, अर परमेस्वर का राज को शुभ समाचार परचार कनु रै। अर उखा लोगु की हरेक किसम की बिमारियों तैं अर कमजोरियों तैं दूर कनु रै।

²⁴ अर पूरा सीरिया मुलक मा वेकी चर्चा फैली गै। अर लोग वेका पास बन्‍नि-बन्‍नि किसम का दुख-बिमारियों मा पोडयां लोगु तैं, अर खबेस लग्यां लोगु तैं लेके ऐनी। अर जौं लोगु पर मिर्गी औन्दी छै, अर जु लोग लकवा मा पोड़यां छा ऊंतैं भि यीशु का पास लये गै अर वेन ऊं सब लोगु तैं खूब कैरी।

²⁵ इलै गलील, दिकापुलिस, अर यहूदिया मुलकों बटि, अर यरूशलेम नगर अर यरदन गाड का दुसरा छाला बटि, भीड़ की भीड़ यीशु का पिछनै चलण लगि गै।