मत्ती 3 - Garhwali

बपतिस्मा देण वळु यूहन्‍ना

¹ अर या ऊं दिनों की बात च, जब यूहन्‍ना नौ को एक मनखि जु की बपतिस्मा देन्दु छौ। उ यहूदिया मुलक का निर्जन जगा मा इन परचार करण लगि गै कि,

² “अपणा-अपणा पापों से पस्ताप कैरा, किलैकि परमेस्वर राज करण वळु च अर उ नजदीक ही च।”

³ अर यू यूहन्‍ना उई च जैका बारा मा परमेस्वर का रैबर्या यशायाह न बोलि छौ कि, “निर्जन जगा मा एक पुकरण वळे की आवाज औणी च, प्रभु खुणि बाटु तयार कैरा वे खुणि बाटु सैणु कैरा।”

⁴ अर यूहन्‍ना ऊंट का बाळो से बणयूं कपड़ा पैरदु छौ, अर अपणी कमर पर चमड़ा का पठुगा तैं बान्धि के रखदु छौ। अर खाण मा वेकू खाणुक टिड़ियां अर जंगळि शहद छौ।

⁵ तब लोग निकळि-निकळि के यूहन्‍ना का पास यरूशलेम नगर बटि अर पूरा यहूदिया मुलक बटि, इख तक की यरदन गाड का आस-पास का पूरा मुलक बटि वेका पास ऐनी।

⁶ अर ऊं लोगु न अपणा-अपणा पापों तैं कबूल कैरिके यरदन गाड मा यूहन्‍ना बटि बपतिस्मा ले।

⁷ अर जब यूहन्‍ना न भौत सरा फरीसी दल का लोगु तैं अर सदूकियों तैं बपतिस्मा लेण कू अपणा पास औन्द देखि, त वेन ऊंकू बोलि, “हे गुरौ का बच्‍चों, तुमतै कैन चितै की परमेस्वर का औण वळा परकोप से दूर भागा?

⁸ इलै इन्द्रया काम कैरा, ज्यां से इन पता चलु कि तुमुन मन से पस्तावा कैरियाली।

⁹ अर अपणा-अपणा मनों मा इन नि समझा कि, ‘हम अब्राहम का वंश मदि छां, इलै हमतै परमेस्वर दण्ड नि द्‍यालु।’ पर सुणा, मि तुमतै बतै देन्दु कि परमेस्वर यों ढुंगो मा बटि भि अब्राहम खुणि औलाद पैदा कैरी सकदु च।

¹⁰ अर अब कुल्हाडु डाळों की जड़ पर रख्युं च, इलै जै डाळा पर अच्छा फल नि लगदिन, वेतैं काटी के आग मा ढुळै जान्दु।

¹¹ “अर मि त तुमतै पापों से माफी पौणु खुणि पाणिळ बपतिस्मा देणु छौं। पर उ मनखि औण वळु च, जु मिसे भि जादा ताकतबर च, अर मि ये लैख भि नि छौं कि वेको नौकर बणि के वेका जुता उठे सैकु अर उ तुमतै पवित्र आत्मा अर आग बटि बपतिस्मा द्‍यालु।

¹² अर वेको सुप्पु वेका हाथों मा च, अर उ अपणा खल्याण तैं ढंगल साफ करलु, ग्यूँ तैं अपणा कुठार मा इकट्‍ठा करलु, पर बूखा तैं वीं आग मा ढोळि द्‍यालु ज्वा कभि बुझि नि सकदी।”

यीशु को बपतिस्मा

¹³ अर ऊं दिनों मा यीशु गलील मुलक बटि ह्‍वेके यरदन गाड का छाला पर यूहन्‍ना का पास बपतिस्मा लेणु कू ऐ।

¹⁴ पर यूहन्‍ना इन बोलि के वेतैं रुकण लगि गै कि, “मितैं तुम बटि बपतिस्मा लेण की जरुरत च, अर तुम मेरा पास अयां छाँ?”

¹⁵ तब यीशु न वेतैं जबाब दिनी, “अबरि जन होणु च तू वेतैं होण दे, किलैकि हम खुणि यू जरुरी च, कि जन परमेस्वर की मनसा च हम वींतैं उन्‍नि पूरु कैरा।” तब यूहन्‍ना न वेकी बात माणी दिनी।

¹⁶ अर यीशु न बपतिस्मा ले अर जन्‍नि उ पाणि बटि भैर निकळि ठिक उन्‍नि स्वर्ग खुलि गै, अर वेन परमेस्वर का आत्मा तैं कबूतर का रुप मा उतरद देखि अर अपणा मथि औन्द देखि।

¹⁷ अर सुणा, स्वर्ग बटि इन आवाज ऐ कि, “यू मेरु लाडलु पुत्र च, अर मि येसे भौत खुश छौं।”