मत्ती 27 - Garhwali

पिलातुस का समणि यीशु

¹ अर सुबेर होन्दी यहूदियों का सब मुख्य पुरोहित अर अध्यक्ष लोग मिली के यीशु तैं मरवौण की सला बणौण लगि गैनी।

² तब ऊ वेतैं बान्धि के लि गैनी, अर रोमी गवर्नर पिलातुस का हाथ मा सौंप दिनी।

यहूदा की फांस

³ अर यीशु तैं धोखा से पकड़वौण वळा यहूदा इस्करियोती न जब इन सुणी, कि न्याय करण वळो न वेतैं मौत की सजा सुणैयालि, त उ भौत पछतै, इलै उ मुख्य पुरोहितों अर अध्यक्ष लोगु का पास चांदी का ऊं तीस सिक्‍कों तैं लेके गै।

⁴ अर वेन ऊंकू बोलि, “मिन एक निरदोष मनखि की मौत खुणि वेका दगड़ा मा बिस्वासघात कैरिके पाप कैरियाली,” पर ऊंन वेकू बोलि, “हमतै ईं बात से कुई भि मतलब नि च, तू खुद ही निस्तारि ले।”

⁵ तब यहूदा न चांदी का सिक्‍कों तैं मन्दिर मा ढोळि दिनी अर उख बटि चलि गै, अर जैके फांस खै दिनी।

⁶ तब मुख्य पुरोहितों न चांदी का ऊं सिक्‍कों तैं उठे अर बोलि, “यों सिक्‍कों तैं मन्दिर की दान-पेटि मा रखण ठिक नि च, किलैकि कै की मौत खुणि येको इस्तेमाल किये गै।”

⁷ इलै ऊं लोगु न मिली के ऊं सिक्‍कों से माटा का भाँडा तैं बणौण वळा का पुंगड़ा तैं खरीदी, ताकि परदेसी लोगु का मुरण का बाद ऊंतैं उख दफनये जै सैको।

⁸ इलै वे पुंगड़ों तैं आज का दिन तक “ल्वे को पुंगड़ा” बुले जान्दु।

⁹ अर इन त इलै ह्‍वे, ताकि उ वचन पूरु ह्‍वे जौ जु कि परमेस्वर का रैबर्या यिर्मयाह न बोलि छौ, अर उ इन च कि, “ऊंन चांदी का तीस सिक्‍का लिनी, इस्राएली लोगु न वेकी जान की कीमत या ही ठैरै।

¹⁰ अर ऊंन यू सिक्‍का माटा का भाँडा बणौण वळा तैं पुंगड़े की कीमत मा दे दिनी, ठिक जन प्रभु न मितैं आज्ञा दे छै।”

रोमी गवर्नर पिलातुस का यीशु से परसन

¹¹ अर जब यीशु तैं रोमी गवर्नर पिलातुस का समणि लये गै, त वेन वेसे पूछी, “क्या तू यहूदियों को राजा छैई?” यीशु न वेतैं जबाब दिनी, “तुम अफि बोन्‍ना छाँ।”

¹² मगर जब मुख्य पुरोहित अर ऊंका अध्यक्ष लोग वे पर इळजाम लगौणा छा, त वेन कुई जबाब नि दिनी।

¹³ तब रोमी गवर्नर न वेकू बोलि, “क्या त्वेतै सुन्यौणु नि च कि यू लोग तेरा खिलाप इथगा माप इळजाम लगौणा छिन?”

¹⁴ पर यीशु न वेतैं कै भि बात को जबाब नि दिनी, अर यू देखि के रोमी गवर्नर तैं बड़ु ताजुब ह्‍वे।

यीशु तैं मौत की सजा दिये जाण

¹⁵ अर फसह का त्योवार पर हर साल इन रिवाज छौ, कि जै कैदी तैं लोग गवर्नर बटि मंगदा छा, वु ऊं लोगु खुणि वे कैदी तैं छोड़ि देन्दु छौ।

¹⁶ अर ऊं दिनों मा बरअब्बा नौ को एक भौत बदनाम मनखि ऊंका इख कैदी छौ।

¹⁷ अर जब भीड़ इकट्‍ठा ह्‍वे गै, त पिलातुस न ऊं बटि पूछी, “तुम क्या चन्द्‍यां, कि मि तुम खुणि कैतैं छोड़ द्‍यूं, बरअब्बा तैं या यीशु तैं जैकू मसीह बुले जान्दु?”

¹⁸ किलैकि पिलातुस जणदु छौ कि यों लोगु न यीशु तैं जलन रखण की वजै से पकड़वै।

¹⁹ अर जब पिलातुस न्याय आसन पर बैठयूं छौ, त वेकी घरवळी न वेका पास इन रैबार भेजि कि, “तुम वे धरमी मनखि का मामला मा हाथ नि डलयां, किलैकि ब्याळि राति मिन वेका बारा मा सुपन्या देखि, अर वेकी वजै से आज मि भौत दुख झेली।”

²⁰ अर मुख्य पुरोहितों न अर यहूदी अध्यक्ष लोगु न भीड़ का लोगु तैं उकसै, कि ऊ बरअब्बा तैं आजाद करण की, अर यीशु तैं जान से मरण की मांग कैरा।

²¹ तब रोमी गवर्नर पिलातुस न लोगु बटि पूछी, “तुम क्या चन्द्‍यां, कि यों दुईयों मा बटि मि तुम खुणि कैतैं आजाद कैरुं?” अर ऊंन बोलि, “बरअब्बा तैं छोड़ि द्‍या।”

²² अर वेन ऊंकू बोलि, “त फिर मि यीशु का दगड़ा क्या कैरुं, जैकू मसीह बुले जान्दु?” तब ऊं सभ्यों न बोलि, “वेतैं क्रूस पर चड़ै द्‍या, वेतैं क्रूस पर चड़ै द्‍या।”

²³ वेन ऊंकू बोलि, “किलै, वेन क्या अपराध कैरी?” पर लोग और भि चिल्‍लै-चिल्‍लै के बोन्‍न लगि गैनी, “वेतैं क्रूस पर चड़ै द्‍या, वेतैं क्रूस पर चड़ै द्‍या।”

²⁴ जब पिलातुस न देखि कि कुई फैदा नि होणु, बल्किन मा हल्‍ला और भि जादा होणु च, त वेन पाणि ले अर भीड़ का समणि अपणा हाथ ध्वेके बोलि, “ये निरदोष मनखि का ल्वे मा मेरु कुई हाथ नि च येका बारा मा तुम ही जाणा।”

²⁵ तब लोगु न वेकू बोलि, “येका ल्वे को हिसाब-किताब हमरा अर हमरि औलादों बटि लिये जौ।”

²⁶ तब पिलातुस न ऊंकी मांग का मुताबिक बरअब्बा तैं छोड़ दिनी, अर यीशु तैं कोड़ा लगवैनि अर क्रूस पर चड़ौणु खुणि ऊंका हाथों मा सौंप दिनी।

सिपयों द्‍वारा यीशु को अपमान

²⁷ अर येका बाद रोमी गवर्नर पिलातुस का सिपै यीशु तैं राजमहल मा लि गैनी, अर उख सिपयों की पूरि पलटण वेका चौतरफि इकट्‍ठा ह्‍वे गै।

²⁸ अर उख ऊंन वेका कपड़ा उतारि के वेतैं बैंगनि रंग को चोळा पैरै,

²⁹ अर कांडों को एक मुकुट बूणी के वेका मुण्ड़ मा पेनै, अर वेका दैंणा हाथ मा निगुंलो को एक जांठु दिनी। अर वेका अगनै घुंडा टेकी के वेको मजाक उड़ै के बोलि, “हे यहूदियों का राजा तेरी जै हो।”

³⁰ अर ऊंन वे पर थूकि, अर निगुंला का वे जांठा तैं लेके वेका मुण्ड़ पर मरण लगि गैनी।

³¹ अर जब ऊंन यीशु को खूब मजाक बणै दिनी, तब ऊंन वे चोळा तैं उतारि के फिर से वेका कपड़ा वेतैं पेनै दिनी। अर वेतैं क्रूस पर चड़ौणु कू लि गैनी।

यीशु तैं क्रूस पर चड़ये जाण

³² जब रोमी सिपै यीशु तैं लि जाणा छा। तब सिपयों न कुरेन नगर का रौण वळा शमौन तैं पकड़ी, अर वेतैं मजबूर कैरी कि उ यीशु की क्रूस तैं उठे के लि जौ।

³³ अर जब ऊ गुलगुता नौ की एक जगा पर पौंछिनी, अर ईं जगा कू खोपड़ि की जगा भि बुल्दिन।

³⁴ तब ऊंन यीशु तैं तीत मिल्यूं अंगूरों को रस पीणु खुणि दे, मगर वेन उ चखी के पीण नि चै।

³⁵ तब ऊंन वेतैं क्रूस पर चड़ै दिनी, अर पांसा डालि के वेका कपड़ा आपस मा बांट दिनी।

³⁶ अर उख बैठि के वेकी पैरेदारी करण लगि गैनी।

³⁷ अर वे पर लग्यां इळजाम तैं एक पाटि मा लिख्वे के क्रूस पर लगवै दिनी, अर वीं पाटि मा इन लिख्यूं छौ कि, “यू यहूदियों को राजा यीशु च।”

³⁸ अर यीशु का दगड़ा-दगड़ि दुई और डाकुओं तैं भि क्रूस पर चड़ये गै, एक तैं वेकी दैंणी तरफा अर दुसरा तैं वेकी बैं तरफा।

³⁹ अर जु लोग उख बटि औणा-जाणा छा वु वेकी बेजती कना छा, अर अपणु मुण्ड़ हिलै-हिलै के इन बोन्‍ना छा कि,

⁴⁰ “हे मन्दिर का नास करण वळा, अर तीन दिन मा वेतैं बणौण वळा, अरे अब खुद तैं बचौ, अर अगर जु तू परमेस्वर को पुत्र छैई, त क्रूस बटि मूड़ी उतर।”

⁴¹ अर ठिक इन्‍नि मुख्य पुरोहित, शास्‍त्री अर यहूदी अध्यक्ष लोग भि मजाक उड़ै के बोन्‍ना छा कि,

⁴² “अरे येन दुसरो तैं बचै पर अब खुद तैं नि बचै सकणु रे, अर यू च ‘इस्राएल को राजा,’ अर अगर यू क्रूस बटि उतरि जौ त हम भि ये पर बिस्वास करुला।

⁴³ अरे, अगर यू परमेस्वर पर भरोसा रखदु, अर अगर जु पिता परमेस्वर भि चान्दु त अब उ येतैं बचौ, किलैकि यू त बुल्दु छौ कि ‘मि परमेस्वर को पुत्र छौं।’”

⁴⁴ अर ठिक इन्‍नि जु डाकु वेका दगड़ा क्रूस पर चड़ये गै छा, ऊंन भि वेको मजाक उड़ै।

यीशु की मौत

⁴⁵ अर दुफरे की बारह बजी बटि लेके तीन बजी तक पूरा देस मा अन्धेरु होयुं रै।

⁴⁶ अर तीन बजी का करीब यीशु न ऊँची आवाज मा चिल्‍लै के बोलि, “एली, एली, लमा शबक्‍तनी?” ज्यां को मतलब इन च कि, “हे मेरा परमेस्वर, हे मेरा परमेस्वर, तुमुन मितैं किलै छोड़याली?”

⁴⁷ अर जु लोग उख खड़ा छा, ऊंन ईं बात तैं सुणी के बोलि कि, “यू त एलिय्याह तैं बुलाणु च।”

⁴⁸ तब तुरन्त सिपयों मा बटि एक भागी के गै अर वेन एक स्पंच तैं सिरका मा भिजे, अर निगुंला का जांठा पर रखी के वेका गिच्‍चा पर लगै।

⁴⁹ तब दुसरा लोगु न बोलि, “रुकी जा, दिखद्‍यां कि एलिय्याह येतैं बचौणु खुणि औन्दु च, कि ना।”

⁵⁰ अर यीशु एक बार फिर ऊँची आवाज मा चिल्‍लै, अर वेन अपणा पराण छोड़ि दिनी।

⁵¹ अर वे ही बगत मन्दिर को परदा मथि बटि मूड़ी तक दुई हिस्सों मा फटी गै, अर एक बड़ु भ्वींचळु औण से धरती हिली गै, अर पौड़-पखाडो पर तिड़कवाल पोड़ि गै,

⁵² अर इख तक की कबर खुलि गैनी, अर भौत सा परमेस्वर का पवित्र लोग जु मोरि गै छा, ऊ अपणा-अपणा सरील मा ज्यून्दा ह्‍वे गैनी।

⁵³ अर यीशु का मौत मा बटि ज्यून्द होण का बाद, यू लोग भि कबर बटि भैर निकळि गैनी, अर पवित्र नगर यरूशलेम मा जैके भौत सा लोगु तैं दिखैनि।

⁵⁴ अर जु रोमी सुबेदार अर दुसरा सिपै यीशु की पैरेदारी कना छा, ये भ्वींचळा का औण से अर जु कुछ भि ह्‍वे वां से ऊ भौत डौऽरी गैनी। तब ऊंन बोलि, “सच्‍चि मा यू परमेस्वर को पुत्र छौ।”

⁵⁵ अर भौत सि जनानियां गलील बटि इख अईं छै, जु की यीशु की सेवा करदी छै, अर वेका पिछनै-पिछनै चलदि छै, अर यों सब बातों तैं यू दूर से दिखणी छै।

⁵⁶ अर ऊं जनानियों मा बटि एक मगदला गौं की मरियम, याकूब अर यूसुफ की माँ मरियम, अर जबदी की घरवळी भि छै।

यीशु तैं कबरुन्द रखै जाण

⁵⁷ यूसुफ नौ को एक मनखि छौ, जु कि अरिमतिया नगर मा रौन्दु छौ। अर यू एक सेठ मनखि छौ, अर यू यीशु पर बिस्वास करदु छौ। अर जब रुमुक ह्‍वे, त यू रोमी गवर्नर पिलातुस का पास गै।

⁵⁸ अर जब उ पिलातुस का पास पौंछी, त वेन यीशु की लांश तैं गुलगुता नौ की जगा बटि लि जाण की मांग कैरी, तब पिलातुस न वेतैं लि जाण की आज्ञा दे दिनी।

⁵⁹ तब यूसुफ न यीशु की लांश तैं लेई, अर वेकी लांश तैं मखमल का एक साफ चदरा मा लपेटि दिनी।

⁶⁰ अर वेन यीशु की लांश तैं कबर मा रखी दिनी, अर ईं कबर का मुख पर वेन एक बड़ु डांग लगै दिनी। अर या एक नई कबर छै ज्वा कि वेन पाड़ पर खुदवै के अफ खुणि बणवईं छै।

⁶¹ अर मगदला गौं की मरियम अर दुसरि मरियम कबर का समणि उखि बैठि छै।

यीशु की कबर पर सिपयों को पैरा

⁶² अर दुसरा दिन, जु कि सब्त को दिन छौ, मुख्य पुरोहित अर फरीसी दल का लोग, रोमी गवर्नर पिलातुस का पास इकट्‍ठा ह्‍वेनि।

⁶³ अर ऊंन बोलि, “श्रीमान, हमतै याद च, कि ये झूठ्‍ठा मनखि न जब उ ज्यून्दु छौ, त वेन बोलि छौ, ‘मि तीन दिन बाद ज्यून्दु ह्‍वे जौलु।’

⁶⁴ इलै तुम तीन दिन तक वेकी कबर पर पैरा देणु खुणि आज्ञा दे द्‍या, कखि इन नि हो कि वेका चेला ऐके वेकी लांश तैं चुरै के लि जा, अर लोगु मा जैके बोला कि, ‘यीशु मुरदो मा बटि ज्यून्दु ह्‍वे गै।’ श्रीमान, अगर जु इन ह्‍वे जालु, त या झूठ्‍ठी बात पैले की झूठ्‍ठी बातों से और भि जादा फैली जालि, अर हालत जादा खराब ह्‍वे जाला।”

⁶⁵ तब पिलातुस न ऊंकू बोलि, “तुमरा पास त पैरेदार छैई छिन ऊंतैं ही लि जा, अर कबर की रखवळी करणु खुणि जन ठिक लगणु तुम उन्‍नि कैरा।”

⁶⁶ तब वु उख बटि गैनी, अर कबर पर मोर लगै के पैरादारों तैं पैरा देणु खुणि उख बैठे दिनी।