मत्ती 20 - Garhwali

बगिचा का मजदूरों को उदारण

¹ अर यीशु न अपणा चेलों कू इन भि बोलि कि, “परमेस्वर को राज इन च कि एक घौर को मालिक सुबेर लेके अपणा घौर बटि इलै निकळि, ताकि अपणा अंगूरों का बगिचा मा काम करणु खुणि मजदूरों तैं लगौ।

² अर वेन मजदूरों तैं एक दिन की पूरि ध्याड़ि देण को करार कैरी, अर फिर वेन ऊंतैं अपणा अंगूर का बगिचा मा भेजि दिनी।

³ अर सुबेर नौ बजी का लगभग वु मालिक फिर से घौर बटि निकळि, अर वेन देखि की कुछ मजदूर लोग बजार मा सुद्‍दी खड़ा होयां छिन,

⁴ अर वेन ऊंकू बोलि, ‘तुम लोग भि मेरा अंगूरों का बगिचा मा जा, अर मि तुमतै ठिक-ठाक ध्याड़ि द्‍यूलु।’ तब वु लोग भि वेका बगिचा मा गैनी।

⁵ अर फिर उ मालिक बारह अर तीन बजी का करीब अपणा घौर बटि भैर निकळि, अर वेन फिर से ठिक उन्‍नि कैरी।

⁶ अर रुमुक का बगत करीब पांच बजी उ फिर घौर बटि भैर निकळि, अर वेन कुछ और लोगु तैं खड़ु होयुं देखि। अर वेन ऊंकू बोलि, ‘तुम लोग पूरा दिन-भर इख बेकार किलै खड़ा रयां?’

⁷ ऊंन वेकू बोलि, ‘किलैकि साब, हमतै कैन भि ध्याड़ि पर नि रखी।’ वे मालिक न ऊंकू बोलि, ‘जा, मेरा अंगूर का बगिचा मा जैके ध्याड़ि को काम कैरा।’

⁸ अर जब रुमुक ह्‍वे गै, त बगिचा का मालिक न अपणा कर्ता-धर्ता कू बोलि, ‘सब मजदूरों तैं बुलौ, अर जु लोग आखिरी मा ऐ छा ऊं बटि लेके शुरु तक सभ्यों तैं ध्याड़ि दे।’

⁹ अर जब वु मजदूर ऐनी जु कि पांच बजी का लगभग ऐ छा, त ऊंतैं एक दिन की पूरि ध्याड़ि मिली।

¹⁰ इलै जु पैलि ऐ छा ऊंन सोची की हमतै जादा मिललु, मगर ऊंतैं भि एक दिन की ध्याड़ि ही मिली।

¹¹ अर जब ऊंतैं ध्याड़ि मिली गै, त वु मालिक पर कुड़कुड़ौण लगि गैनी।

¹² अर बोलि, ‘साब, यू जु आखिरी मा ऐनी यों न त सिरफ एक घन्टा ही काम कैरी, अर तुमुन ऊंतैं भि हमरा बराबर ही कैरियाली, अर हमुन त पूरा दिन-भर इथगा मेनत कैरी अर तेज घाम मा भि लग्यां रयां?’

¹³ अर मालिक न ऊंमा बटि कै एक तैं जबाब दिनी, ‘हे दगड़्या, मिन तेरा दगड़ा मा कुछ अन्यो नि कैरी, किलैकि मिन त्वेतै पैलि ही बतैयालि छौ, कि मिन त्वेतै एक दिन कि ही ध्याड़ि देण।

¹⁴ इलै जु तेरु हिसाब-किताब च वेतैं उठौ अर चलि जा, किलैकि मेरी मनसा इन च कि जथगा मिन त्वेतै दे, ठिक उथगा ही मि आखिरी मा अयां लोगु तैं भि द्‍यूं।

¹⁵ क्या मि अपणा धन-दौलत तैं अपणी मरजी से खर्च नि कैरी सकदु? या तू जळत्यौणि छै, किलैकि मि खुला दिल से देन्दु।’

¹⁶ अर ठिक उन्‍नि भौत सा लोग जु पैलि छिन, वु आखिरी ह्‍वे जाला, अर जु आखिरी छिन वु पैलि ह्‍वे जाला।”

अपणी मौत का बारा मा यीशु की तिसरी भविष्यबाणी

¹⁷ अर यीशु अपणा बारह चेलों का दगड़ा मा यरूशलेम नगर जाणु छौ, त वेन बाटा मा चलद-चलद अपणा बारह चेलों तैं भीड़ मा बटि अलग कैरिके ऊंकू बोलि कि,

¹⁸ “सुणा, हम लोग यरूशलेम नगर कू जाणा छां, अर उख मनखि का पुत्र तैं मुख्य पुरोहितों अर शास्‍त्री लोगु का हवाला किये जालु, अर वु वे पर इळजाम लगाला कि वेतैं जान से मार दिये जौ।

¹⁹ अर वु लोग मनखि का पुत्र तैं ऊं लोगु का हवाला कैरी द्‍याला जु कि यहूदी जाति का नि छिन, ताकि वु लोग वेको मजाक उड़ा, अर कोड़ा मारा, अर क्रूस पर चड़ै द्‍या, पर सुणा, उ तिसरा दिन ज्यून्दु ह्‍वे जालु।”

एक माँ की यीशु से बिन्ती

²⁰ येका बाद जबदी की घरवळी अपणा दुई नौनो का दगड़ा यीशु का पास ऐ। अर वींन वेका खुटों मा पोड़ि के वेसे बिन्ती कैरिके कुछ मांगि।

²¹ तब यीशु न वींकू बोलि, “हे बेटी, तू क्या चान्दी?” वींन बोलि, “गुरुजी, जब तुमरो राज आलु त मेरा दुई नौनो तैं एक तैं अपणी दैंणी तरफा, अर दुसरा तैं अपणी बैं तरफा बैठण को अधिकार दे द्‍या।”

²² ईं बात तैं सुणी के यीशु न बोलि, “तुम नि जणद्‍यां कि तुम मंगणा क्या छाँ। क्या तुम वे दुख तैं झेली सकद्‍यां, जु मि झिलण वळु छौं?” तब ऊं दुईयों न वेकू बोलि, “हाँ गुरुजी, हम झेली सकद्‍यां।”

²³ वेन ऊंकू बोलि, “तुम वे दुख तैं जरुर झिलिल्या, पर मेरा दैं अर बैं तरफा बैठाण को हक मि मा नि च। या जगा त ऊं लोगु खुणि च जौं खुणि मेरा पिता परमेस्वर न तयार कैरिके रखी च।”

²⁴ अर ऊं दुई भैयों की ईं बात तैं सुणी के दस चेला ऊं दुई भैयों पर गुस्सा ह्‍वेनि।

²⁵ अर यीशु न चेलों तैं अपणा पास बुलै के बोलि, “तुम जणदा ही छाँ कि जु लोग यहूदी जाति का नि छिन, ऊंका राजा ऊं पर सासन करदिन अर ऊंका बड़ा अधिकारी लोग अपणा-अपणा राज्य का लोगु पर अपणु हक जमौन्दिन।

²⁶ पर तुम लोगु का बीच मा अधिकार जतौण वळी बात नि होण चयेणी, अर अगर तुम मा बटि कुई बड़ु होण चान्दु, त उ तुमरो सेवक बणु,

²⁷ अर अगर कुई तुम मा बटि पैलु होण चान्दु, उ तुमरो सेवक बणु।

²⁸ तुमतै मनखि का पुत्र जन होण चयेणु, किलैकि उ अपणी खातिरदारि करौणु खुणि नि ऐ, बल्किन मा इलै ऐ कि खुद दुसरा लोगु की सेवा कैरो, अर भौत सा लोगु तैं ऊंका पापों से आजादी दिलौणु खुणि अपणी जान दे द्‍यो।”

दुई अन्धों तैं खूब करण

²⁹ जब यीशु अर वेका चेला यरीहो नगर बटि निकळि के जाणा छा, त एक बड़ी भीड़ वेका पिछनै चलण लगि गै।

³⁰ अर सुणा, दुई अन्धा सड़क का किनरा बैठयां छा, अर जब ऊंन यू सुणी कि यीशु इख बटि जाणु च त ऊ चिल्‍लै-चिल्‍लै के बुलण लगि गैनी, “हे प्रभु, राजा दाऊद का वंशज, हम पर दया कैर।”

³¹ तब लोगु न ऊंतैं झिड़की के बोलि, “चुप ह्‍वे जा।” पर उ और भि जादा जोर से चिल्‍लै के बोन्‍न लगि गैनी, “प्रभु हे प्रभु, राजा दाऊद का वंशज, हम पर दया कैर।”

³² तब यीशु रुकी गै अर वेन ऊंतैं बुलै अर पूछी, “तुम क्या चन्द्‍यां, कि मि तुम खुणि कैरुं?”

³³ अर ऊंन वेकू बोलि, “प्रभु, हमरा आंख्यों तैं खूब कैरी द्‍या।”

³⁴ अर यू सुणी के यीशु तैं ऊं पर तरस ऐ, अर वेन ऊंका आंख्यों तैं छ्वी, अर वु तुरन्त दिखण लगि गैनी। अर तब वु दुईया का दुई भि यीशु का पिछनै ह्‍वे गैनी।