मत्ती 1 - Garhwali

यीशु मसीह का पितरों का नौ की सूची

¹ प्रभु यीशु मसीह का पितरों का नौ की सूची इन च, कि यीशु जु की राजा दाऊद का वंश मदि, अर राजा दाऊद अब्राहम का वंश मदि छौ। अर पितर अब्राहम बटि यीशु मसीह तक जनम्यां लोगु का नौ कुछ इन छिन।

² पितर अब्राहम बटि इसहाक को जनम ह्‍वे, अर इसहाक बटि याकूब को जनम ह्‍वे, अर याकूब बटि यहूदा को जनम ह्‍वे, अर याकूब की और भि औलाद छै।

³ यहूदा बटि पेरेस अर जोरह को जनम ह्‍वे, अर ऊंकी माँ को नौ तामार छौ, अर फिरिस बटि हिस्रोन को जनम ह्‍वे, अर हिस्रोन बटि एराम को जनम ह्‍वे।

⁴ अर एराम बटि अम्मीनादाब को जनम ह्‍वे, अर अम्मीनादाब बटि नहशोन को जनम ह्‍वे, अर नहशोन बटि सलमोन को जनम ह्‍वे।

⁵ अर सलमोन बटि बोअज को जनम ह्‍वे, अर बोअज की माँ को नौ राहाब छौ, अर बोअज न रूत बटि ब्यौ कैरी, अर ऊंका नौना को नौ ओबेद छौ, अर ओबेद बटि यिशै को जनम ह्‍वे।

⁶ अर यिशै बटि राजा दाऊद को जनम ह्‍वे, अर दाऊद बटि सुलैमान राजा को जनम ह्‍वे। (अर यू वीं जनानि बटि पैदा ह्‍वे जु पैलि ऊरिय्याह कि घरवळी छै)।

⁷ अर सुलैमान बटि रहबाम को जनम ह्‍वे, अर रहबाम बटि अबिय्याह को जनम ह्‍वे, अर अबिय्याह बटि आसा को जनम ह्‍वे।

⁸ अर आसा बटि यहोशाफात को जनम ह्‍वे, अर यहोशाफात बटि योराम को जनम ह्‍वे, अर योराम बटि उज्‍जियाह को जनम ह्‍वे।

⁹ अर उज्‍जियाह बटि योताम को जनम ह्‍वे, अर योताम बटि आहाज को जनम ह्‍वे, अर आहाज बटि हिजिकिय्याह को जनम ह्‍वे।

¹⁰ अर हिजिकिय्याह बटि मनश्शिह को जनम ह्‍वे, मनश्शिह बटि आमोन को जनम ह्‍वे, अर आमोन बटि योशिय्याह को जनम ह्‍वे।

¹¹ अर एक बगत इन ऐ, कि बेबीलोन देस का राजा न यहूदियों तैं युद्ध मा हरै दिनी, तब वु ऊंतैं अपणा देस बेबीलोन कू लि गै। अर वे बगत पर योशिय्याह को नौनु यकुन्याह को जनम ह्‍वे। अर वेका बाद यकुन्याह का और भि भैयों न जनम लिनी।

¹² अर जब ऊ बेबीलोन देस मा रौण लगि गैनी, त वे बगत यकुन्याह बटि शालतिएल को जनम ह्‍वे। अर शालतिएल बटि जरुब्बाबिल को जनम ह्‍वे।

¹³ अर जरुब्बाबिल बटि अबीहूद को जनम ह्‍वे, अर अबीहूद बटि इल्याकीम को जनम ह्‍वे, अर इल्याकीम बटि अजोर को जनम ह्‍वे।

¹⁴ अर अजोर बटि सदोक को जनम ह्‍वे, अर सदोक बटि अखीम को जनम ह्‍वे, अर अखीम बटि इलीहूद को जनम ह्‍वे।

¹⁵ अर इलीहूद बटि इलियाजार को जनम ह्‍वे, अर इलियाजार बटि मत्तान को जनम ह्‍वे, अर मत्तान बटि याकूब को जनम ह्‍वे।

¹⁶ अर याकूब बटि यूसुफ को जनम ह्‍वे। अर यूसुफ न मरियम बटि ब्यौ कैरी, अर मरियम बटि यीशु को जनम ह्‍वे। अर वे ही यीशु कू मसीह बुले जान्दु।

¹⁷ त इनकै पितर अब्राहम बटि राजा दाऊद तक चौदह पीढ़ी ह्‍वेनि। अर राजा दाऊद बटि लेके यहूदियों का बेबीलोन देस मा बन्धी बणै के लि जाण तक चौदह पीढ़ी ह्‍वेनि। अर बेबीलोन मा रौण का बगत बटि लेके यीशु मसीह तक चौदह पीढ़ी ह्‍वेनि।

यीशु को जनम

¹⁸ जब मरियम की मांगण यूसुफ का दगड़ा मा ह्‍वे गै छै, त ऊंका ब्यौ होण से पैलि ही इन पता चलि गै, कि वा परमेस्वर की पवित्र आत्मा की ताकत से गरवति च।

¹⁹ अर यूसुफ जु की परमेस्वर की नजर मा एक धरमी मनखि छौ। जब वेतैं इन पता चलि कि वा गरवति च, त वेन अपणा मन मा इन ठाणि दिनी, कि चुपचाप वीं से मांगण तोड़ि द्‍यो। किलैकि उ वींतैं बदनाम नि करण चाणु छौ।

²⁰ अर जब उ यों सब बातों का बारा मा सुचणु ही छौ, कि एक दिन वेतैं सुपन्या मा प्रभु को एक दूत दिखै। अर वेन वेकू बोलि कि, “हे यूसुफ, तू जु दाऊद का वंश मदि छैई तू मरियम का दगड़ा मा ब्यौ करण से नि डौऽर, किलैकि जु बच्‍चा वींका कोख मा च, उ परमेस्वर की पवित्र आत्मा की ताकत से च। अर मि त्वेतै बतै देन्दु कि,

²¹ ‘वा एक नौना तैं जनम द्‍याली। अर तू वेको नौ यीशु रखी किलैकि उ अपणा लोगु तैं ऊंका पापों बटि छुटकारा द्‍यालु।’”

²² अर यू सब इलै ह्‍वे, ताकि जु वचन प्रभु न अपणा रैबर्यों का द्‍वारा बुलवै छौ, उ पूरु ह्‍वे जौ।

²³ अर उ वचन इन च कि, “सुणा, एक कुंवारी नौनि गरवति होलि अर एक नौना तैं जनम द्‍याली, अर वेको नौ इम्मानुएल रखै जालु,” जैको मतलब च कि “परमेस्वर हमरा दगड़ा मा च।”

²⁴ अर इथगा मा यूसुफ की निन्द खुलि गै। अर जन प्रभु का दूत न वेकू बोलि छौ वेन ठिक उन्‍नि कैरी, अर मरियम का दगड़ा मा ब्यौ कैरिके वींतैं अपणा इख लेके ऐ गै।

²⁵ अर जबरि तक वींन नौना तैं जनम नि देई, तबरि तक यूसुफ मरियम का दगड़ा मा नि सै। अर जब नौनो को जनम ह्‍वे, त यूसुफ न वेकू नौ यीशु रखी। अर इनकै यीशु को जनम ह्‍वे।