यूहन्ना 6 - Garhwali

यीशु न पांच हजार से भि जादा लोगु तैं खाणु खिलै

¹ फिर येका बाद यीशु अपणा चेलों का दगड़ा तिबिरियास की झील याने कि गलील झील का पल्या छाला नाव मा बैठि के चलि गै।

² तब भौत बड़ी भीड़ वेका पिछनै चलण लगि गै, किलैकि जै चमत्कारिक रुप बटि उ बिमारों तैं खूब करदु छौ, ऊंन ऊ देखि छा।

³ फिर यीशु एक ऊँचा ढौंडा मा चैड़ि अर अपणा चेलों का दगड़ा मा उख बैठि गै।

⁴ अर यहूदियों को फसह को त्योवार नजदीक छौ।

⁵ जब यीशु न देखि, की एक बड़ी भीड़ वेकी तरफा औणी च, तब वेन अपणा चेला फिलिप्पुस कू बोलि, “यों खुणि खाणु खुणि रुट्‍टी हम कख बटि मोल लाँ?”

⁶ पर यू त वेन वेतैं अजमौणु कू बोलि छौ, किलैकि उ खुद ही जणदु छौ कि मिन कन क्या च।

⁷ तब फिलिप्पुस न वेतैं जबाब देई, “दुई सौ दीनार की रुट्‍टी भि यों खुणि पूरि नि होलि जु की हरेक तैं जरा-जरा भि मिली जौ।”

⁸ तबरि शमौन पतरस को भै अन्द्रियास जु कि चेलों मदि एक छौ, वेन यीशु कू बोलि,

⁹ “गुरुजी, इख एक नौनु च, जैमा जौ की पांच रुट्‍टी अर दुई माछा छिन, पर इथगा मा यों लोगु खुणि क्या होण?”

¹⁰ तब यीशु न बोलि, “यों सभि लोगु तैं भ्वीं मा बैठे द्‍या।” अर उख भौत घास छै, इलै ऊ सभि लोग वीं जगा बैठि गैनी। अर ऊं लोगु मा केवल बैख ही लगभग पांच हजार छा।

¹¹ तब यीशु न रुट्‍टी लेके पिता परमेस्वर को धन्यवाद देई, अर उख बैठयां लोगु मा बांटि दिनी। फिर ठिक उन्‍नि वेन माछों तैं भि लेई अर उन्‍नि कैरी, अर जथगा ऊ चान्दा छा, उथगा ऊंतैं देई।

¹² जब ऊ खै के छक ह्‍वे गैनी, तब यीशु न अपणा चेलों कू बोलि, “बच्यां टुकड़ों तैं बटोळि ल्या कि कुछ भि बेकार नि जौ।”

¹³ इलै सब लोगु का खाण का बाद जौ की पांच रुट्‍टीयों मा बटि जु बचि गै छौ, ऊंतैं चेलों न बटोळि अर बारह कण्डो तैं भोरी।

¹⁴ तब यीशु का ये चमत्कार तैं देखि के ऊ लोग बुलण लगि गैनी, “सच्‍चि मा यू त परमेस्वर को उई रैबर्या च, जु कि ईं दुनियां मा औण वळु छौ।”

¹⁵ तब यीशु न यू जाण्यालि कि, “यू लोग मितैं पकड़ी के जबरदस्ती अपणु राजा बणौण चाणा छिन।” इलै उ फिर से इखुली ही ढौंडा मा चलि गै।

यीशु को पाणि पर चलण

¹⁶ जब रुमुक पोड़ि गै, त यीशु का चेला झील का छाला पर गैनी।

¹⁷ अर एक नाव पर चैड़ि के झील का पल्या छाला कफरनहूम नगर जाण लगि गैनी अर अन्धेरु ह्‍वे गै छौ, मगर यीशु तबरि तक भि उख नि पौंछी छौ।

¹⁸ अर फिर भौत तेज बथौं चलण लगि गै, ज्यां से झील का पाणि मा उथल-पुथल मची गै।

¹⁹ जब ऊ नाव चलौन्द-चलौन्द लगभग पांच-छह किलोमीटर चलि गैनी, त ऊंन यीशु तैं झील का पाणि पर चलण अर नाव जनै औन्द देखि। अर ऊ भौत डौऽरी गैनी।

²⁰ पर यीशु न ऊंकू बोलि, “डौऽरा ना, मि छौं।”

²¹ तब चेला वेतैं नाव मा लेणु कू तयार ह्‍वे गैनी, अर वा नाव एकदम से वीं जगा पर पौंछी गै जख ऊंतैं जाण छौ।

जीवन की रुट्‍टी यीशु ही च

²² अर दुसरा दिन भीड़ ज्वा कि झील का वे छाला मा रै गै छै, ऊंन देखि कि इख त एक ही नाव तैं छोड़ अर कुई दुसरि नि छै। अर ऊ जणदा छा, कि यीशु वीं नाव मा अपणा चेलों का दगड़ा नि गै, बल्किन मा वेका चेला ही गैनी।

²³ (तब तिबिरियास नगर बटि कुछ दुसरि नाव वीं जगा का नजदीक ऐनी, जख ऊंतैं प्रभु यीशु न पिता परमेस्वर को धन्यवाद देण का बाद रुट्‍टी खिलै छै)।

²⁴ इलै जब भीड़ न देखि, कि इख नऽ त यीशु च अर ना ही वेका चेला, त ऊ भि नावों पर चैड़ि के यीशु तैं खुज्यान्द-खुज्यान्द कफरनहूम नगर मा पौंछी गैनी।

²⁵ जब ऊं लोगु तैं यीशु झील का पल्या छाला मिली त ऊंन वेतैं पूछी, “गुरुजी, तुम इख कब अयां?”

²⁶ तब यीशु न ऊंतैं जबाब देई, “मि तुम बटि सच्‍चि ही बोन्‍नु छौं, तुम मितैं इलै नि खुज्याणा छाँ कि तुमुन चमत्कार का काम दिखिनी, पर इलै किलैकि तुमुन रुट्‍टी खै के अपणी भूक मिटै।

²⁷ तुम नास होण वळा खाणु खुणि ना, बल्किन मा वे खाणुक खुणि मेनत कैरा जु कि सदनि का जीवन तक रौन्दु। अर उ खाणुक मनखि को पुत्र ही तुमतै द्‍यालु, किलैकि यू देणु खुणि पिता परमेस्वर न वेतैं यू अधिकार दियूं च।”

²⁸ तब ऊंन वे बटि पूछी, “परमेस्वर को काम करणु खुणि हमतै क्या करण चयेणु?”

²⁹ तब यीशु न ऊंतैं जबाब देई, “परमेस्वर को काम यू च, कि जैतैं वेन भेजि च तुम वे पर बिस्वास कैरा।”

³⁰ तब ऊंन वेकू बोलि, “तुम हमतै कु जि अदभुत चिन्‍न दिखैल्या, कि हम वेतैं देखि के तुम पर बिस्वास कैरा?

³¹ हमरा पितरों न निर्जन जगा मा मन्‍ना खै, जन कि पवित्रशास्‍त्र मा भि लिख्यूं च, “‘वेन ऊंतैं खाणु खुणि स्वर्ग बटि रुट्‍टी देई।’”

³² तब यीशु न ऊंकू बोलि, “मि तुम बटि सच्‍चि ही बोन्‍नु छौं, कि वा रुट्‍टी स्वर्ग बटि तुमतै मूसा न नि देई, बल्किन मा मेरु पिता ही तुमतै स्वर्ग बटि सच्‍चि रुट्‍टी देन्दु च।

³³ किलैकि परमेस्वर का द्‍वारा दिईं रुट्‍टी वा च, जु स्वर्ग बटि उतरि के दुनियां का लोगु तैं जीवन देन्दी।”

³⁴ तब ऊंन वेकू बोलि, “गुरुजी, इन्दरि रुट्‍टी हमतै रोज दिया कैरा।”

³⁵ तब यीशु न ऊंकू बोलि, “जीवन देण वळी रुट्‍टी मि छौं। जु मि मा आलु, उ कभि भूकों नि रालु, अर जु मि पर बिस्वास करलु, उ फिर कभि नि तिसालु।

³⁶ तुमुन मितैं देखि, पर बिस्वास नि कैरी। अर या बात मिन तुमतै पैलि ही बतैयालि छै।

³⁷ अर पिता न जु लोग मि मा सौंप्यां छिन, उ सभि मि मा आला। अर जु कुई भि मि मा आला, ऊंतैं मि कभि नि निकळळु।

³⁸ किलैकि मि अपणी इच्छा तैं ना, बल्किन अपणा भेजण वळे की मनसा तैं पूरि करणु खुणि स्वर्ग बटि उतरयुं छौं।

³⁹ अर मेरा भेजण वळे की मनसा या च, कि जु कुछ भि वेन मितैं सौंपी, मि वामा बटि कुछ भि नि हरचौं, बल्किन वेतैं आखिरी का दिन मा ज्यून्दु कैरी द्‍यूं।

⁴⁰ किलैकि मेरा पिता की मनसा या च, कि जु पुत्र तैं दिखदु अर वे पर बिस्वास करदु, उ सदनि को जीवन पौ अर मि वेतैं आखिरी का दिन मा ज्यून्दु कैरी द्‍यूं।”

⁴¹ तब यहूदी लोग यीशु पर कुड़कुड़ौण लगि गैनी, किलैकि वेन इन बोलि, “ज्वा रुट्‍टी स्वर्ग बटि उतरि, वा मि छौं।”

⁴² अर ऊंन बोलि, “क्या यू यूसुफ को नौनु यीशु नि च? अरे, हम त येका ब्वे-बबों तैं भि जणदा छां। फिर यू कनकै बोन्‍नु च कि मि स्वर्ग बटि अयूं छौं?”

⁴³ तब यीशु न ऊंकू बोलि, “तुम आपस मा नि कुड़कुड़ावा।

⁴⁴ मेरा पिता न मितैं भेज्यूं च अर उई लोगु तैं मि मा लेके औन्दु। जबरि तक उ लेके नि अऽ, तबरि तक कुई मि मा नि ऐ सकदु। अर जौं लोगु तैं उ मि मा लेके औन्दु, ऊंतैं मि आखिरी का दिन मा फिर से ज्यून्दु कैरी द्‍यूलु।

⁴⁵ अर परमेस्वर का रैबर्यों न लिख्यूं च कि, “‘ऊ सभ्या का सभि परमेस्वर की तरफा बटि सिखये जाला।’ इलै हरेक जु पिता की बात तैं सुणी के सिखदिन, ऊ सभि मि मा औन्दिन।

⁴⁶ अर कैन भि पिता तैं नि देखि, पर जु परमेस्वर की तरफा बटि अयूं च, बस वेन ही वेतैं देखि च।

⁴⁷ मि तुम बटि सच्‍चि ही बोन्‍नु छौं, कि जु कुई मि पर बिस्वास करदु, सदनि को जीवन वेकू च।

⁴⁸ किलैकि जीवन देण वळी रुट्‍टी मि छौं।

⁴⁹ अर तुमरा पितरों न निर्जन जगा मा मन्‍ना खै, फिर भि मोरि गैनी।

⁵⁰ पर या वा रुट्‍टी च ज्वा स्वर्ग बटि अईं च, ताकि जु कुई वामा बटि खौऽ, उ कभि नि मुरलु।

⁵¹ अर जीवन की रुट्‍टी ज्वा स्वर्ग बटि अईं च, वा मि छौं। अर जु कुई ईं रुट्‍टी मा बटि खालु, उ सदनि खुणि ज्यून्दु रालु। अर ज्वा रुट्‍टी मि दुनियां का लोगु तैं जीवन देणु खुणि देन्दु छौं, उ मेरु बदन च।”

⁵² तब ईं बात पर यहूदी आपस मा घपरोळ करण लगि गैनी कि, “यू मनखि कनकै हमतै अपणु बदन खाणु कू दे सकदु च?”

⁵³ फिर यीशु न ऊंकू बोलि, “मि तुम बटि सच्‍चि ही बोन्‍नु छौं, कि जब तक तुम मनखि का पुत्र का बदन तैं नि खैल्या, अर वेका ल्वे तैं नि पील्या, तब तक तुम मा सदनि को जीवन नि होलु।

⁵⁴ इलै जु कुई मेरु बदन तैं खालु अर मेरु ल्वे तैं प्यालु, त सदनि को जीवन वेकू च, अर मि वेतैं आखिरी का दिन मा फिर से ज्यून्दु कैरी द्‍यूलु।

⁵⁵ किलैकि मेरु बदन त सच्‍चु खाणु च अर मेरु ल्वे सच्‍चि मा पीणे की चीज च।

⁵⁶ इलै जु कुई मेरु बदन तैं खान्दु अर मेरु ल्वे तैं पीन्दु च, उ मि मा अर मि वेमा बसदु छौं।

⁵⁷ अर जीवन देण वळा पिता न मितैं भेजि, अर वेकी वजै से मि ज्यून्दु छौं ठिक उन्‍नि उ भि जु मितैं खालु, मेरी वजै से ज्यून्दु रालु।

⁵⁸ अर या वा रुट्‍टी च, ज्वा स्वर्ग बटि अईं च। अर या वीं रुट्‍टी का जन नि च, जींतैं तुमरा पितरों न खै फिर भि मोरि गैनी, पर जु कुई स्वर्ग बटि अईं ईं रुट्‍टी तैं खालु उ सदनि ज्यून्दु रालु।”

⁵⁹ अर जब यीशु कफरनहूम नगर का एक प्रार्थना भवन मा छौ, तब वेन अपणा उपदेस मा यू सभि बात बुलिनी।

भौत सरा लोगु को यीशु तैं छोड़ि देण

⁶⁰ अर यीशु की बातों तैं सुणी के वेका पिछनै चलण वळा भौत सरा लोगु न बोलि, “यों बातों पर चलण त बड़ु कठिन च, यों तैं कु स्वीकार कैरी सकदु?”

⁶¹ पर वेन अपणा मन मा यू जाण्यालि, कि वेका पिछनै चलण वळा लोग आपस मा कुड़कुड़ौण लगि गैनी। इलै वेन बोलि, “क्या तुम यों बातों तैं सुणी के बिस्वास मा डगमगै ग्यां?

⁶² अगर जु तुम मनखि का पुत्र तैं स्वर्ग जान्द दिखल्या, जख उ पैलि छौ त फिर तुमरो क्या जि होलु?

⁶³ अर जीवन देण वळु त परमेस्वर को आत्मा च, पर सरील बटि कुई फैदा नि होन्दु। अर जु बात मिन तुम मा बुलिनी, वु सब परमेस्वर की आत्मा बटि अईं छिन, अर जीवन देण वळी भि छिन।

⁶⁴ फिर भि तुम मा इन्द्रया भि छिन, जु मेरी बातों पर बिस्वास नि करदिन।” (यीशु न यू इलै बोलि, किलैकि उ पैलि बटि जणदु छौ, कि ऊ कु छिन जु बिस्वास नि करदिन, अर उ कु च जु वेतैं पकड़ौण वळु च)।

⁶⁵ फिर यीशु न बोलि, “इलै मिन तुमतै पैलि बतैयालि छौ, कि जबरि तक पिता की रजामंदी नि हो तबरि तक कुई भि मि मा नि ऐ सकदु।”

⁶⁶ अर ईं बात का बाना वेका पिछनै चलण वळो मा बटि भौत सरा वापिस लौटी गैनी, अर वेका बाद ऊ फिर कभि वेका पिछनै नि गैनी।

⁶⁷ तब यीशु न अपणा बारह चेलों बटि पूछी, “क्या तुम भि वापस जाण चन्द्‍यां?”

⁶⁸ फिर शमौन पतरस न वेतैं जबाब देई, “हे प्रभु, हमुन कै मा जाण? किलैकि सदनि को जीवन देण वळी बात त तुम मा ही छिन।

⁶⁹ अर हम बिस्वास करद्‍यां अर जाण भि ग्यां कि, परमेस्वर का पवित्र जन तुम ही छाँ।”

⁷⁰ तब यीशु न ऊंतैं जबाब देई, “क्या मिन तुम बारह तैं नि चुणी? तभि भि तुम मा बटि एक मनखि शैतान च।”

⁷¹ यू वेन शमौन इस्करियोती का नौना यहूदा का बारा मा बोलि। किलैकि उई ऊं बारहों मदि एक छौ, जु की यीशु तैं पकड़ौण वळु छौ।