यूहन्ना 2 - Garhwali

काना गौं मा यीशु को पैलु चमत्कार

¹ फिर तिसरा दिन गलील मुलक का काना गौं मा एक ब्यौ छौ। अर उख यीशु की माँ भि छै।

² यीशु अर वेका चेला भि वे ब्यौ मा न्यूत्यां छा।

³ अर जब अंगूरों को रस कम ह्‍वे गै, त यीशु की माँ न वेकू बोलि कि, “ऊंका पास अंगूरों को रस खतम ह्‍वे गै।”

⁴ तब यीशु न वींकू बोलि, “हे माँ, मिकू अभि नि बोला की मिन क्या करण, किलैकि अभि मेरु बगत नि ऐ।”

⁵ पर वेकी माँ न नौकरों कू बोलि, “जु कुछ भि उ तुमकु बोललु, उन्‍नि कर्यां।”

⁶ उख त ढुंगो का बणयां छह बड़ा-बड़ा भाँडा धरयां छा, जैमा चार-छह गागर पाणि ऐ जान्दी छै। यू त यहूदियों की रीति का मुताबिक शुद्धिकरण खुणि धरयां छा।

⁷ अर यीशु न ऊं नौकरों कू बोलि, “यों भाँडो तैं पाणिळ भोरी द्‍या।” तब ऊंन भाँडो तैं मुख तक पाणिळ भोरी दिनी।

⁸ फिर वेन ऊंकू बोलि, “अब उखुन्द बटि गाडी के दावत का कर्ता-धर्ता का पास लि जा।” अर वु लि गैनी।

⁹ तब दावत का कर्ता-धर्ता न उ पाणि चखी जु अंगूरों को रस बणि गै छौ। अर उ नि जणदु छौ कि यू कख बटि ऐ। (पर जौं नौकरों न पाणि निकाळि छौ, ऊ जणदा छा)। तब दावत का कर्ता-धर्ता न ब्यौला तैं बुलै अर वे बटि बोलि,

¹⁰ “हरेक मनखि त पैलि अच्छु अंगूरों को रस देन्दु च अर जब लोग पी के छक ह्‍वे जनदिन, तब हलकु वळु देन्दु च। पर तुमुन त अभि तक अंगूरों को अच्छु रस रख्युं च।”

¹¹ अर यीशु न गलील का काना गौं मा अपणु पैलु चमत्कार कैरिके अपणी महानता दिखै। अर वेका चेलों न वे पर बिस्वास कैरी।

¹² येका बाद यीशु अपणी माँ, भैयों अर चेलों का दगड़ा मा कफरनहूम नगर गै। अर उख ऊ कुछ ही दिन रैनी।

यीशु न मन्दिर तैं शुद्ध कैरी

¹³ अर जब यहूदियों को फसह को त्योवार नजदीक छौ, तब यीशु यरूशलेम नगर कू गै।

¹⁴ अर वेन मन्दिर मा बल्दों, भेड़ों, अर कबूतरों तैं बिकौण वळो अर पैसौं को अदलण-बदलण करण वळो तैं बैठयूं देखि।

¹⁵ तब वेन ज्यूडों को एक कोड़ा बणै के सभि भेड़ों अर बल्दों तैं मन्दिर बटि भैर निकाळि दिनी, अर पैसौं को अदलण-बदलण करण वळो का पैसा छिलारी दिनी, अर ऊंकी मेजों तैं उल्ट-पुल्ट कैरी दिनी।

¹⁶ अर कबूतर बिकौण वळो बटि बोलि, “यू सब इख बटि लि जा। तुम मेरा पिता का घौर तैं व्यापार को घौर नि बणावा।”

¹⁷ तब पवित्रशास्‍त्र मा जु लिख्यूं च उ वेका चेलों तैं याद ऐ, कि “तेरा घौर की धुन का कारण मेरु नास किये जालु।”

¹⁸ अर यहूदियों का मुखिया लोगु न यीशु तैं पूछी, “यू सब करणु को त्वेतै अधिकार च, यू साबित करणु कू तू हमतै कु चिन्‍न दिखै सकदी?”

¹⁹ तब यीशु न ऊंतैं जबाब देई, “ये मन्दिर तैं ढोळि द्‍या अर मि येतैं तीन दिन मा बणै द्‍यूलु।”

²⁰ तब ऊंन बोलि, “ये मन्दिर तैं बणौण मा छियालिस साल लगि गैनी अर क्या तू येतैं तीन दिनों मा बणै दिली?”

²¹ पर उ त अपणा सरील रुपी मन्दिर का बारा मा ऊंतैं बतौणु छौ।

²² इलै जब यीशु मुरदो मा बटि ज्यून्द ह्‍वे तब वेका चेलों तैं यू सब याद ऐ। अर ऊंन पवित्रशास्‍त्र अर यीशु मसीह का द्‍वारा बुलयां वचन पर बिस्वास कैरी।

मनों तैं जनण वळु यीशु

²³ अर फसह का त्योवार का बगत पर यीशु यरूशलेम नगर मा छौ, अर वेका द्‍वारा जु चमत्कारिक काम किये जाणा छा, ऊंतैं देखि के भौत सरा लोगु न वे पर बिस्वास कैरी।

²⁴ पर यीशु न ऊं पर भरोसा नि कैरी, किलैकि उ सब लोगु तैं अच्छी तरौं से जणदु छौ।

²⁵ अर वेतैं कुई जरुरत नि छै, कि कुई भि वेतैं मनखियों का बारा मा बतौ। किलैकि उ खुद ही जणदु छौ, कि मनखियों का मनों मा क्या च।