इब्रानी 8 - Garhwali

यीशु हमरु महा पुरोहित

¹ हे मेरा दगड़्यों, हमरि यों सब बातों को मतलब यू च कि हमरु यीशु मसीह एक इन्द्रयो महा पुरोहित च, जु कि स्वर्ग मा सबसे महान परमेस्वर की राजगद्‍दी की दैंणी तरफा बैठयूं च।

² अर वीं पवित्र जगा मा उ महा पुरोहित बणि के पिता परमेस्वर की सच्‍चि सेवा कनु च। अर यू वे तम्बू का जन नि च जख पुरोहित लोग पैलि सेवा करदा छा, किलैकि वेतैं लोगु का द्‍वारा बणयै गै मगर जख यीशु मसीह च वीं जगा तैं स्वर्ग मा खुद पिता परमेस्वर न बणै।

³ अर हरेक महा पुरोहित तैं इलै ठैर्युं जान्दु ताकि उ पिता परमेस्वर का समणि अरपण मा चड़ईं भेंट अर बलिदान तैं लेके अऽ। अर ईं बात का मुताबिक हमरा महा पुरोहित यीशु का पास भि चड़ौणु खुणि कुछ ना कुछ होण चयेणु।

⁴ अगर जु यीशु मसीह ईं धरती पर होन्दु, त उ पुरोहित का पद पर कभि भि काम नि कैरी सकदु छौ, किलैकि इख त पैलि ही दुसरा पुरोहित मौजूद छा जु की मूसा का दियां नियम-कानून का मुताबिक पिता परमेस्वर खुणि भेंट चडौन्दिन।

⁵ अर असली पवित्र जगा स्वर्ग मा च अर ईं धरती का पुरोहित जख सेवा करदिन वु सिरफ वेको एक नमूना च। इलै जब मूसा रैबर्या ईं धरती पर पवित्र तम्बू तैं बणौण वळु छौ, त तम्बू बणौण से पैलि ही पिता परमेस्वर न वेतैं चितै दिनी कि, “ईं बात को ध्यान रखी कि जु नमूना त्वेतै सीनै पाड़ पर दिखये गै तू तम्बू तैं वेका मुताबिक ही बणै।”

⁶ पर हमरा महा पुरोहित यीशु तैं सेवा को जु काम दिये गै वु दुनियां का दुसरा पुरोहितों से जादा बढी के च, किलैकि यीशु वु च जु कि पुरणा करार का मुताबिक परमेस्वर का दगड़ा मा मनखियों खुणि एक अच्छा बिचलु होण को काम करदु। अर यां से इन पता चलदु कि नयू करार पुरणा से जादा अच्छु च।

⁷ अर अगर जु पैला करार मा कुई कमी नि होन्दी, त फिर दुसरा करार की भि कुई जरुरत नि छै।

⁸ अर वे बगत का लोगु तैं पिता परमेस्वर न अपणी नजर मा दोषी पैके इन बोलि कि, “प्रभु इन बुल्दु कि वु दिन औण वळा छिन, जब मि इस्राएल का कुटुम्ब का दगड़ा मा अर यहूदा का कुटुम्ब का दगड़ा मा नयू करार करलु।

⁹ अर यू वे करार की तरौं नि होलु जु मिन ऊं लोगु का पितरों का दगड़ा मा वे बगत कैरी छौ। जब मि ऊंको हाथ पकड़ी के ऊंतैं मिस्र देस बटि भैर निकाळि के लै छौ। अर प्रभु इन बुल्दु कि वु लोग मेरा करार पर अटल बणयां नि रैनी, इलै मिन ऊंकी परवा करण छोड़याली।

¹⁰ मगर प्रभु इन भि बुल्दु कि, ऊं दिनों का बाद मि इस्राएल का घौर बटि जु करार करलु, उ यू च कि मि अपणा नियम-कानूनों तैं ऊंका जमीर मा डललु, अर ऊंका दिलों मा ऊंतैं लिखी द्‍यूलु, अर मि ऊंको परमेस्वर होलु अर ऊ मेरा लोग होला।

¹¹ अर अब से ऊंमा बटि कुई भि अपणा देस का लोगु तैं अर अपणा भै-बन्दों तैं इन बोलि के नि सिखालु कि, ‘प्रभु तैं पछ्याणा’ किलैकि छुटा से लेके बड़ा तक सभ्या का सभि मितैं जाणि जाला।

¹² किलैकि जथगा भि गळत काम ऊंन करिनी मि ऊं पर अपणी दया दिखै के ऊंतैं माफ कैरी द्‍यूलु, अर ऊंका पापों तैं फिर कभि भि याद नि करलु।”

¹³ अर इनकै एक नया करार तैं ठैरै के परमेस्वर न पैला वळा करार तैं पुरणु ठैरै दिनी। किलैकि जु चीज पुरणि अर कमजोर ह्‍वे जनदिन ऊ रद्‍द ह्‍वे जनदिन अर इनकै ऊंको नास ह्‍वे जान्दु।