इब्रानी 2 - Garhwali

छुटकारु पौण को बाटु

¹ इलै जौं बातों तैं हमुन सुणी, ऊं सब बातों पर हमतै और भि जादा ध्यान देण चयेणु, ताकि हम सच्‍चै से दूर नि ह्‍वे जा।

² अर ज्वा शिक्षा पिता परमेस्वर न स्वर्गदूतों का द्‍वारा दिनी वा सच्‍च छै, अर जैन भि वेको पालन नि कैरी वेतैं दण्ड मिली।

³ त सोचा, अगर जु हम छुटकारा पौण वळा बाटा तैं स्वीकार नि करुला, त हम वेका दण्ड से बचण की उम्मीद कनकै कैरी सकद्‍यां? अर सबसे पैलि पिता परमेस्वर न ही ईं बात का बारा मा बतै, अर जौं लोगु न वेका रैबार तैं सुणी, ऊंन हमतै यू साबित कैरिके दिखै दिनी कि वा बात सच्‍चि छै।

⁴ अर परमेस्वर न भि अपणी इच्छा का मुताबिक चिन्‍न, चमत्कार अर अलग-अलग किसम से सामर्थ का कामों का द्‍वारा इन कैरिके दिखै कि वेको रैबार सच्‍चु च। अर जौन वेतैं चुणी वेन ऊंतैं अपणा पवित्र आत्मा को दान दिनी।

यीशु हमतै बचौण वळु

⁵ हे मेरा भै-बैंणो, पिता परमेस्वर न स्वर्गदूतों तैं नि चुणी कि वु औण वळी नयी दुनियां का अधिकारी ह्‍वा, जैकी चर्चा हम लोग करदी औणा छां।

⁶ अर पवित्रशास्‍त्र मा राजा दाऊद इन बुल्दु कि, “हे मेरा परमेस्वर, मनखि क्या च कि तुम वेकी चिन्ता करद्‍यां? या मनखि को पुत्र क्या च, कि तुम वेकी परवा करद्‍यां?

⁷ तुमुन वेतैं कुछ बगत खुणि ही स्वर्गदूतों से जरा कम कैरी, अर फिर वेतैं आदर-सम्मान को मुकुट पेनै के सब कुछ वेका हाथों मा सौंपी, ताकि सब कुछ वेका अधीन मा रौ।

⁸ अर तुमुन सब कुछ वेका अधीन मा कैरियाली।” अर सब कुछ वेका अधीन मा कैरी देण को मतलब यू च कि जथगा भि चीज छिन वु सब कुछ वेका हाथों मा छिन अर जन वु चौ वेको इस्तेमाल कैरी सकदु। मगर फिर भि आज हम इन दिखद्‍यां, कि कुछ बात इन छिन जु कि अभि भि वेका अधीन मा नि छिन।

⁹ पर जब हम यीशु मसीह तैं दिखद्‍यां, त इन जणद्‍यां कि पिता परमेस्वर न वेतैं कुछ बगत खुणि ही स्वर्गदूतों से जरा कम कैरी। अर इन वेन इलै कैरी, किलैकि यीशु मसीह न सब मनखियों का खातिर मौत का स्वाद तैं चखी। अर ईं योजना का द्‍वारा पिता परमेस्वर न अपणी दया अर प्यार सब लोगु पर दिखै, मगर अब पिता परमेस्वर न यीशु तैं सबसे महान राजा का रुप मा आदर-सम्मान देके सबसे ऊँचो पद दियाली।

¹⁰ अर जन पिता परमेस्वर न चै, वेन अपणी ताकत का मुताबिक सब कुछ बणै। अर इन वेन इलै कैरी, ताकि उ यीशु मसीह का द्‍वारा भौत सा लोगु तैं अपणी महानता मा सामिल कैरी सैको। अर लोगु तैं बचौणु खुणि वेन अपणी योजना तैं पूरु कैरी, ज्वा कि यीशु तैं मौत का दुख तैं झिलण की छै। अर फिर वेन यीशु तैं मुरदो मा बटि ज्यून्द कैरिके ईं बात तैं सिद्ध कैरियाली, कि वेका द्‍वारा लोग पिता परमेस्वर का पास आ।

¹¹ इलै यीशु जौं लोगु तैं पवित्र करदु अर जु लोग वेका द्‍वारा पवित्र किये जाण छिन, दुईयों को एक ही पिता च। अर ईं बात की वजै से ही यीशु ईं दुनियां का लोगु तैं अपणु भै-बैंण बोन्‍न मा झिझक मैसूस नि करदु।

¹² इलै ही वेन पिता परमेस्वर कू बोलि, “मि अपणा भै-बैंणो का समणि तुमरा नौ को बखान करलु, अर सभा का समणि मि तुमरो गुणगान करलु।”

¹³ अर यीशु न इन भि बोलि कि, “मि अपणु भरोसा परमेस्वर पर रखलु।” अर फिर इन भि बुल्दु कि, “सुणा, मि इख ऊं बच्‍चों का दगड़ा मा छौं, जु कि परमेस्वर न मि मा सौंप्यां छिन।”

¹⁴ अर लोग अभि भि बच्‍चों का जन छिन, इलै यीशु मसीह ईं दुनियां मा सरील को रुप लेके ऐ। अर इन इलै ह्‍वे, ताकि वेकी मौत का द्‍वारा यीशु मसीह शैतान को नास कैरी सैको जैका पास मौत तैं लेके औण की ताकत च।

¹⁵ अर हरेक मनखि का मन मा मौत की डौऽर छै, जैकी वजै से वु गुलामी को जीवन जीणा छा, मगर यीशु मसीह की मौत न ऊंतैं वीं डौऽर से आजाद कैरियाली।

¹⁶ किलैकि यीशु मसीह स्वर्गदूतों की मदद करणु खुणि नि ऐ, बल्किन मा उ त इलै ऐ ताकि ऊं लोगु कि मदद कैरी सैको, जु कि परमेस्वर पर बिस्वास रखण की वजै से पितर अब्राहम का वंशज छिन।

^17-18 इलै या बात भि भौत जरुरी छै, कि यीशु मसीह सब बातों मा अपणा भै-बैंणो का जन बणि जौ। अर वेन खुद दुख उठे, अर शैतान का द्‍वारा भकलै भि गै मगर फिर भि उ खरु निकळि अर इन इलै ह्‍वे, ताकि उ लोगु पर दया करण वळु हो अर ऊं खुणि एक वफादार महा पुरोहित बणि जौ। अर एक बगत औण पर वेन खुद तैं बलिदान का रुप मा चड़ै दिनी, ताकि वेका द्‍वारा पिता परमेस्वर लोगु का पापों तैं माफ कैरी सैको। इलै हे मेरा दगड़्यों, ईं बात तैं याद रखा कि यीशु ऊं लोगु की मदद जरुर करलु, जौं तैं शैतान का द्‍वारा भकलयै जान्दु।