इब्रानी 13 - Garhwali

हमेसा परमेस्वर खुणि काम कना रा

¹ हे मेरा भै-बैंणो एक-दुसरा का दगड़ा मा प्यार से रा।

² अर अणजाण लोगु की भि सेवा-भगत करण नि बिसरयां, किलैकि तुमतै पता होण चयेणु कि सेवा-भगत का खातिर कुछ लोगु न बिना जणयां ही स्वर्गदूतों को भि बड़ु आदर-सम्मान कैरी।

³ अर जु बिस्वासी लोग कैद मा छिन ऊंकी मदद कैरा, इन सोचा कि तुम भि ऊंका दगड़ा कैद मा छाँ। अर जौं बिस्वासी लोगु का दगड़ा मा बुरु बरतौ होणु च, ऊंतैं याद रखा अर इन मैसूस कैरा, जन कि तुम खुद ऊंका दगड़ा मा दुख झिलणा छाँ।

⁴ ब्यौ सब लोगु का बीच मा आदर की बात समझै जौ, अर पति अर पत्‍नी एक-दुसरा खुणि वफादार रा, किलैकि परमेस्वर गळत सम्बन्ध रखण वळा लोगु तैं, अर एक बैख या जनानि पर गळत नजर रखण वळो तैं जरुर दण्ड द्‍यालु।

⁵ अर तुम लोग धन को लालच नि कैरा, बल्किन मा जु कुछ भि तुमरा पास च तुम वेमा खुश रा, किलैकि परमेस्वर न खुद इन बोलि कि, “मि त्वेतै कभि भि नि बिसरलु अर ना ही कभि छुड़लु।”

⁶ इलै हम हिम्मत रखी के बुल्द्‍यां कि, “प्रभु मेरु मददगार च, मि कभि नि डऽरलु, अब कुई भि मनखि मेरु कुछ नि बिगाड़ि सकदु।”

⁷ अर जौन तुमतै परमेस्वर को वचन सुणै, तुम ऊं शिक्षा देण वळो तैं याद रखा। अर तुम ऊंका अच्छा चाल-चलन पर ध्यान द्‍या अर वेका मुताबिक ऊंका बिस्वास तैं देखि के तुम ऊंका जन जीवन भि ज्या।

⁸ अर यीशु मसीह अभि भि उन्‍नि च जन वु पैलि छौ, अर वेन सदनि तक एक ही जन रौण।

⁹ अर ध्यान द्‍या, कखि तुम बन्‍नि-बन्‍नि किसम की शिक्षा से भरमै नि जा, किलैकि परमेस्वर खाणु-खाण से ना, बल्किन मा अपणी महान किरपा से हमरा बिस्वास तैं मजबूत करदु, किलैकि खाणु-खाण का रीति-रिवाजों तैं मनण से कुई फैदा नि होन्दु।

¹⁰ सुणा, जब यहूदी धरम का पुरोहित पवित्र तम्बू मा बलिदान चड़ौन्दा छा, त वु वेमा बटि कुछ खै सकदा छा, मगर यीशु मसीह एक बलिदान का रुप मा ऐ अर वेन अपणी दया हम पर कैरी। अर या दया ऊं पुरोहितों खुणि ना, बल्किन मा हम बिस्वासी लोगु खुणि च।

¹¹ अर जब यहूदी लोगु का महा पुरोहित जानबरों का ल्वे तैं पापों से माफी पौणु खुणि पवित्र तम्बू की महा पवित्र जगा मा चड़ौन्दा छा, त वेका बाद ऊं जानबरों का सरील तैं सीमा से भैर फुके जान्दु छौ।

¹² इलै ही यीशु की मौत भि वे नगर कि सीमा से भैर ह्‍वे, ताकि उ अपणा ल्वे का द्‍वारा लोगु तैं पवित्र कैरो।

¹³ इलै आ, हम पुरणि बातों तैं छोड़ि के यीशु मसीह का पास ऐ जां, अब चै हमरि बेजती ही किलै नि हो।

¹⁴ किलैकि ईं दुनियां मा इन्द्रयो कुई भि नगर नि च जु सदनि तक रालु, बल्किन मा हम वे नगर को इंतजार कना छां, जु स्वर्ग मा च अर सदनि तक रालु।

¹⁵ इलै हम यीशु मसीह का द्‍वारा हमेसा पिता परमेस्वर की भक्‍ति कैरा अर वेतैं स्वीकार कैरा।

¹⁶ अर भलै करण अर दुसरो की मदद करण नि बिसरा, किलैकि यू भि एक बलिदान का जन च, ज्यां से कि परमेस्वर खुश होन्दु।

¹⁷ अर जु बिस्वासी समुदाय का मुखिया लोग छिन, तुम ऊंकी आज्ञा माणा अर ऊंका अधीन मा रा, किलैकि वु तुमरा जीवन खुणि बड़ी चिन्ता करदिन, अर वु भौत अच्छे से जणदिन कि ऊंतैं तुमरा जीवन को हिसाब-किताब परमेस्वर तैं देण पोड़लु। अर तुम ऊंकी बात को पालन कैरा, ताकि वु खुशी से ये काम तैं कैरी सैका ना कि दुखी ह्‍वेके। किलैकि अगर जु वु दुखी छिन त वां से तुमतै कुई फैदा नि च।

¹⁸ हम खुणि प्रार्थना कना रा, हमरु जमीर साफ च अर हम इन कोसिस करद्‍यां की सब बातों मा इमानदारी से चला।

¹⁹ मि बिन्ती करदु कि तुम और भि जादा प्रार्थना कैरा, ताकि मि तुम लोगु का पास जल्दी ऐ सैकु।

आसिरबाद

^20-21 हे मेरा भै-बैंणो, प्रभु यीशु हम खुणि एक चरवाह का जन च, अर उ हम खुणि बलिदान ह्‍वे गै, मगर परमेस्वर न वेतैं मुरदो मा बटि ज्यून्द कैरी अर इन कैरिके वेका ल्वे का द्‍वारा वु करार पूरु कैरी जु कि सदनि तक रौण वळु च। अर मि इन प्रार्थना करदु कि पिता परमेस्वर अपणी शान्ति तुमतै द्‍यो, अर तुमरि हरेक जरुरत तैं पूरु कैरो। अर मि इन भि प्रार्थना करदु कि तुम पिता परमेस्वर की इच्छा तैं जाणि जा, अर यीशु मसीह तुमरा जीवनों मा वु काम कैरो ज्यां से कि परमेस्वर खुश होन्दु, हमरा प्रभु परमेस्वर की बडै सदनि तक होणी रौ। आमीन।

²² हे मेरा भै-बैंणो मि तुम बटि बिन्ती करदु, कि तुमतै हौसला देण खुणि जु कुछ भि मिन ईं छुटी चिठ्‍ठी मा लिख्यूं च, तुम ऊं सब बातों तैं सबर रखी के स्वीकार कैरा।

²³ तुमतै यू मालूम होण चयेणु कि हमरा भै तीमुथियुस तैं जेलखाना से छुड़ै गै। अगर उ जल्दी ऐ जालु त मि वेका दगड़ा मा ऐके तुम से मिललु।

²⁴ अर सुणा, तुम लोग अपणा मुखिया कू अर सब पवित्र लोगु कू मेरु सलाम बुलयां, अर इटली देस का सब मसीह लोग तुमकु सलाम बोन्‍ना छिन।

²⁵ हमरा पिता परमेस्वर की किरपा तुम सब लोगु पर होणी रौ, आमीन।