इब्रानी 10 - Garhwali

हमेसा तक रौण वळु एक ही बलिदान

¹ दगड़्यों, जु नियम-कानून परमेस्वर का रैबर्या मूसा का द्‍वारा दिये गैनी वु त औण वळा बगत मा भली चीजों को एक नमूना छौ। अर छैल वळी चीज खुद भली नि ह्‍वे सकदिन, किलैकि यहूदी लोगु द्‍वारा हरेक साल बलिदान चड़ये जनदिन, त फिर जु लोग पिता परमेस्वर का पास औन्दिन ऊ कनकै शुद्ध ह्‍वे सकदिन।

² अगर पिता परमेस्वर की भक्‍ति करण वळा लोग सच्‍चि मा शुद्ध ह्‍वे जान्दा, त वु खुद तैं पाप खुणि दोषी मैसूस नि करदा अर बलिदान करण भि बन्द ह्‍वे जान्दु।

^3-4 मगर इन नि ह्‍वे किलैकि बखरों अर सांड़ो को ल्वे मनखि पर लग्यां पापों का इळजाम से माफी नि दिलै सकदु, यू त लोगु तैं हरेक साल सिरफ इन याद दिलान्दु कि अभि तक ऊ पापि अर दोषी छिन।

⁵ इलै जब यीशु मसीह ईं दुनियां मा औण वळु छौ, त वेन अपणा बारा मा इन बोलि जन कि पवित्रशास्‍त्र मा भि लिख्यूं च कि, “हे मेरा परमेस्वर, तुमुन बलिदान अर भेंट नि चै, पर तुमुन मि खुणि एक सरील तयार कैरी।

⁶ अर नऽ त तुम हवन करण से खुश होनद्‍यां, अर ना ही ऊं बलियों से जु कि पाप करण की वजै से चड़ये जनदिन।

⁷ तब मिन बोलि, ‘देखा, मि इख छौं मि तुमरि मनसा तैं पूरि करणु कू ऐ ग्यों, किलैकि पवित्रशास्‍त्र मा मेरा बारा मा इन ही लिख्यूं च।’”

⁸ मूसा का दियां नियम-कानून त इन सिखौन्दिन कि हवन मा चड़ईं भेंट अर बलि पाप से माफी पौण खुणि च, त फिर यीशु मसीह न यों बातों को जिकर इन किलै कैरी कि तुम ना त हवन करण से, अर ना ही पाप खुणि चड़ईं बलि से खुश होनद्‍यां?

⁹ चला छोड़ा, यीशु मसीह को परमेस्वर का दगड़ा मा बात करण को यू ही मतलब छौ कि, “मि तुमरि मनसा तैं पूरु करण का खातिर ही अयूं।” अर यां से इन पता चलदु कि पैलु वळु करार जैमा अरपण मा भेंट अर बलियां छै वु सब हटये गैनी।

¹⁰ अर परमेस्वर की मनसा का मुताबिक यीशु मसीह का सरील तैं एक ही बार हमेसा खुणि बलि चड़ये गै अर इन होण से वेन हमतै पवित्र कैरियाली।

¹¹ हरेक पुरोहित हरेक दिन अपणु-अपणु काम पूरु करदिन, अर इन बलि चडौन्दिन जु कि मनखियों का पापों तैं कभि ऊं से दूर नि कैरी सकदिन।

¹² मगर यीशु मसीह न खुद तैं एक बलि का रुप मा दे दिनी, एक इन्दरि बलि जु कि सदनि तक रौण वळी च। अर वेका बाद उ परमेस्वर का दैंणा हाथ की तरफा आदर-सम्मान वळी जगा मा जैके बैठि गै।

¹³ अर उख बैठि के वु वे बगत को इंतजार कनु च, जब तक की वेका दुसमन वेका अधीन मा नि ह्‍वे जा।

¹⁴ किलैकि वेन एक ही बलिदान चड़ै के ऊं लोग तैं पवित्र कैरी जु कि वेकी सेवा खुणि अलग कैरिके रख्यां छा।

¹⁵ अर पवित्रशास्‍त्र मा पवित्र आत्मा भि ईं बात की गवै देन्दु। अर उ पैलि इस्राएली लोगु का बारा मा बुल्दु अर वेन इन बोलि कि,

¹⁶ प्रभु इन बुल्दु, “जब बगत आलु त मि ऊंका दगड़ा मा एक नयू करार करलु, अर मि अपणा नियम-कानूनों तैं ऊंका जमीर मा डललु अर ऊंका दिलों मा ऊंतैं लिखलु।”

¹⁷ अर फिर वु इन भि बुल्दु कि, “मि ऊं लोगु का पापों तैं अर ऊंका द्‍वारा कियां बुरा कामों तैं फिर कभि भि याद नि करलु।”

¹⁸ अर जब परमेस्वर कै का पापों तैं माफ कैरी देन्दु, त फिर वेतैं बलिदान चड़ौण की क्या जरुरत?

यीशु पर अपणु बिस्वास बणै के रखण

^19-21 इलै हे मेरा भै-बैंणो, अब हमरा पास पिता परमेस्वर का घौर मा एक बड़ु महा पुरोहित याने की यीशु मसीह च। हाँ, यीशु जैन हमरा खातिर अपणु जीवन देई अर अपणा ल्वे की ताकत से वेन मन्दिर का वे परदा तैं हटै दिनी जख आम लोगु नि जै सकदा छा। अर इनकै यीशु मसीह न एक नयू बाटु दिखै जु कि हमतै नया जीवन की तरफा लेके जान्दु। इलै अब एक यीशु मसीह ही च जु कि हमतै हिम्मत देन्दु की हम महा पवित्र जगा मा दाखिल ह्‍वे सैका।

²² इलै आ, अब हम सच्‍चा मन अर पूरा बिस्वास का दगड़ा मा पिता परमेस्वर का नजदीक ऐ जा, किलैकि हमतै पवित्र करण का खातिर हमरा दोषी जमीर पर यीशु मसीह का ल्वे तैं छिड़के गै, ताकि हम पर लग्यूं इळजाम दूर हो अर हम मन से पवित्र अर अपणा सरील तैं बपतिस्मा का पाणिळ ध्वेके शुद्ध ह्‍वे जा।

²³ अर वीं आस तैं अपणा-अपणा जीवन मा बणै के रखा जिं पर हमतै पूरु यकीन च, किलैकि जु करार पिता परमेस्वर न हमरा दगड़ा मा कर्युं च वु जरुर पूरु होलु।

²⁴ अर हमरा सभौ मा प्यार अर भलै का कामों तैं करण ही हो, अर यां खुणि हम एक-दुसरा की हिम्मत बढा ताकि वु भि इन्‍नि कैरा।

²⁵ अर एक-दुसरा का दगड़ा बिस्वासी समुदाय मा औण-जाण की संगती तैं नि छोड़ा, किलैकि तुम मा बटि कुछ लोग इन कना छिन, पर तुमतै एक-दुसरे की हिम्मत बढौण चयेणी। अर या बात मि इलै बोन्‍नु छौं किलैकि तुम जणदा छाँ कि प्रभु को वापस औण को दिन नजदीक ऐ गै, इलै इन करण मा लग्यां रा।

²⁶ अर अगर जु हम सच्‍चा ज्ञान तैं पौण का बाद भि जाणि बुझि के पाप कना रौला, त ईं बात तैं जाणि ल्या कि फिर पापों से माफी पौणु खुणि कुई भि दुसरो बलिदान नि च।

²⁷ फिर त सिरफ एक ही बात रै जान्दी न्याय को होण अर खतरनाक आग मा जाण को दण्ड अर यू ऊ छिन जु कि पिता परमेस्वर का दुसमनों को नास कैरी देन्दिन।

²⁸ किलैकि जु मनखि मूसा रैबर्या का दियां नियम-कानून तैं मनण से इनकार कैरी देन्दु छौ, वे पर दया नि किये गै बल्किन मा दुई या तीन लोगु का द्‍वारा देई गवै से वेतैं मरे जान्दु छौ।

²⁹ त फिर सोचा ऊं लोगु कि सजा कथगा खतरनाक होलि जौन परमेस्वर का पुत्र को अपमान कैरी, अर करार का वे ल्वे तैं सुद्‍दी समझि जैका द्‍वारा ऊंतैं पवित्र किये गै छौ। अर ऊंन पवित्र आत्मा से मिलण वळी किरपा को आदर नि कैरी, बल्किन मा बेजती कैरी।

³⁰ किलैकि हम जणदा छां, कि परमेस्वर न इन बोलि कि, “बदला लेण मेरु काम च, मि खुद ही ये काम तैं करलु।” अर फिर इन भि बोलि कि, “प्रभु अपणा लोगु को न्याय करलु।”

³¹ अर सुणा, ज्यून्दा परमेस्वर का हाथों मा पोड़ण बड़ी खतरनाक बात च।

³² हे मेरा भै-बैंणो, अपणा पुरणा दिनों तैं याद कैरा, जब तुमुन परमेस्वर का उज्याळा तैं अपणा जीवन मा पै छौ अर वे बगत मा ईं दुनियां का द्‍वारा जु कुछ भि तुमुन सै वेका बदला मा तुमुन हार नि माणी, बल्किन मा बिस्वास मा बणयां रयां।

³³ अर कभि-कभि त तुमतै सतौ सौण पोड़ि अर सभ्यों का समणि तुमरो अपमान किये गै, अर कभि-कभि त तुमुन ऊं लोगु खुणि बड़ी चिन्ता दिखै जौं का दगड़ा मा तुम जन ही बरतौ किये गै।

³⁴ अर जु लोग जेलखाना मा कैद छा ऊं खुणि तुमुन बड़ी दया दिखै। अर जब लोगु न तुमरि चीजों तैं अपणा कब्जा मा कैर दिनी त तुमुन खुशी से अपणु नुकसान उठे, किलैकि तुम जणदा छा कि तुमरा पास वेसे भि जादा कीमती च जु की सदनि तक रौण वळु च।

³⁵ इलै प्रभु यीशु पर अपणु बिस्वास बणै के रखा किलैकि वेका बदला मा तुमतै एक बड़ु इनाम मिलण वळु च।

³⁶ मगर तुमतै सबर रखण की भौत जरुरत च, ताकि तुम परमेस्वर की मनसा तैं पूरु कैरिके करार का इनाम तैं पै सैका।

³⁷ किलैकि पवित्रशास्‍त्र मा इन लिख्यूं च कि, “जु औण वळु च उ भौत जल्द ही आलु, अर अब वु देर नि करलु।

³⁸ अर जु लोग मि पर बिस्वास करदिन वु अपणा बिस्वास करण की वजै से ज्यून्दु राला, पर जु पिछनै हटि जनदिन ऊंतैं देखि कर मि दुखी होन्दु।”

³⁹ हे मेरा दगड़्यों, हम पिछनै हटि के नास होण वळा लोगु मा बटि नि छां। इलै जबरि तक हमतै पूरि तरौं से बचयै नि जौ तब तक हम बिस्वास मा बणयां रौला।