इब्रानी 1 - Garhwali

परमेस्वर को पुत्र यीशु

¹ हे मेरा दगड़्यों, जन कि तुम जणदा ही छाँ, कि पुरणा जमना मा पिता परमेस्वर न हमरा पितरों का दगड़ा मा रैबर्यों का द्‍वारा कई बार अलग-अलग तरीका से बात कैरी।

² मगर आखिरी का यों दिनों मा पिता परमेस्वर न अपणा पुत्र यीशु का द्‍वारा हम से बात कैरी। अर पिता परमेस्वर न वेतैं सब चीजों को वारिस बणै अर वेका द्‍वारा ही पूरि दुनियां तैं बणै।

³ अर परमेस्वर को पुत्र अपणा पिता की अदभुत महानता तैं परगट करदु, अर उ हमतै ठिक उन्‍नि दिखेन्दु जन कि परमेस्वर खुद च। अर परमेस्वर को पुत्र सब चीजों तैं अपणा वचन की ताकत से समळ्दु। अर लोगु तैं ऊंका पापों से शुद्ध करण की बात तैं परमेस्वर का पुत्र न पूरु कैरी, अर वेका बाद उ बड़ा आदर-सम्मान से सबसे महान परमेस्वर का दैंणा हाथ की तरफा जैके बैठि गै।

⁴ अर इन कैरिके उ सब स्वर्गदूतों मा सबसे महान ह्‍वे गै, किलैकि पिता परमेस्वर न वेतैं वु नौ दिनी जु कि सब नौ मा सबसे महान च।

यीशु स्वर्गदूतों से भि महान

⁵ हे मेरा भै-बैंणो, पिता परमेस्वर न कभि भि कै स्वर्गदूत कू वा बात नि बोलि, ज्वा कि वेन अपणा पुत्र का बारा मा बोलि। वेन इन बोलि कि, “तू मेरु पुत्र छैई, अर आज से मि तेरु पिता छौं।” अर फिर इन बोलि कि, “मि वेको पिता, अर उ मेरु पुत्र होलु।”

⁶ अर फिर जब पिता परमेस्वर अपणा इकलौता पुत्र तैं ईं दुनियां मा भेजण वळु छौ, त वेका बारा मा उ इन बुल्दु कि, “मेरा सब स्वर्गदूत वेकी भक्‍ति कैरा।”

⁷ अर अपणा स्वर्गदूतों का बारा मा पिता परमेस्वर कुछ इन बुल्दु कि, “मि अपणा स्वर्गदूतों तैं हवा का जन बणौन्दु, अर जु लोग मेरी सेवा करदिन ऊंतैं मि आग की बणांग का जन बणौन्दु।”

⁸ मगर अपणा पुत्र का बारा मा उ इन बुल्दु, “हे परमेस्वर तुमरि राजगद्‍दी सदनि तक बणि रौ, अर तुमरा राज मा न्याय सच्‍चै का सासन से किये जौ।

⁹ मि परमेस्वर छौं मि वु परमेस्वर छौं जैकी सेवा तू करदी, अर तिन वेसे प्यार कैरी जु कि मेरी नजर मा सही च, अर जु गळत च वेसे तिन नफरत कैरी। इलै मिन तेरा सब दगड़्यों मा बटि तेरु अभिषेक कैरिके त्वेतै सबसे ऊँचो पद दियाली।”

¹⁰ अर पवित्रशास्‍त्र मा पुत्र खुणि इन भि लिख्यूं च कि, “हे प्रभु, शुरुवात मा तुमुन धरती कि बुनियाद रखी, अर आसमान तुमरा हाथों का द्‍वारा बणि।

¹¹ अर यू सब खतम ह्‍वे जाण, मगर तुमुन सदनि तक ज्यून्द रौण, अर यू सब कपड़ों का जन पुरणा ह्‍वेके फटी जाला।

¹² अर तुमुन ऊंतैं एक चदरा का जन लपेटि देण, अर वु कपड़ों का जन बदलि जाला, मगर तुम उ छाँ जैन सदनि तक ज्यून्द रौण।”

¹³ अर परमेस्वर न कभि कै स्वर्गदूत कू नि बोलि कि, “मेरी दैंणी तरफा बैठ, जबरि तक कि मि तेरा दुसमनों तैं हरै के तेरा अधीन मा नि कैरी द्‍यूं।”

¹⁴ अर, यू सब स्वर्गदूत त सेवा करण वळी आत्मा छिन, जु कि बचयै जाण वळा लोगु की सेवा खुणि भिजे जनदिन।