गलातियों 4 - Garhwali

¹ पर मि तुमतै बतै देन्दु कि बच्‍चा जबरि तक वारिस होण को अधिकार नि पै ल्यो, तबरि तक उ बच्‍चा ही च अर जन गुलाम अपणा मालिक का अधीन रौन्दु ठिक उन्‍नि वु बच्‍चा भि अपणा लोगु का अधीन मा रौन्दु, हालांकि वु बच्‍चा सब चीजों को मालिक च।

² पर फिर भि वु बच्‍चा अपणा बुबा का द्‍वारा ठैरयां बगत तक शिक्षा देण वळो, अर अपणा घौर का लोगु का अधीन मा रौन्दु।

³ अर ठिक उन्‍नि यीशु मसीह का औण से पैलि हम भि बच्‍चों का जन ही छा, अर ईं दुनियां का नियम-कानूनों का गुलामी मा अपणु जीवन जीणा छा।

⁴ पर जब परमेस्वर को ठैर्युं बगत ऐ, त वेन अपणा पुत्र यीशु मसीह तैं ईं दुनियां मा भेजि, अर वेको जनम एक मनखि का रुप मा एक जनानि बटि ह्‍वे। अर वेको ईं दुनियां मा औण यहूदी नियम-कानूनों का अधीन मा ह्‍वे।

⁵ अर इन इलै ह्‍वे, ताकि पुत्र ऊं लोगु तैं आजाद कैरो जु कि नियम-कानूनों का अधीन मा छिन, अर हमतै भि पिता परमेस्वर की औलाद होण को अधिकार मिली जौ।

⁶ अर इन साबित करणु खुणि परमेस्वर न अपणा पुत्र की पवित्र आत्मा हमरा मनों मा भेजि, ताकि इन पता चलि जौ कि हम वेकी औलाद छां। अर आज हम पवित्र आत्मा की मदद से प्रार्थना मा पिता परमेस्वर कू “हे मेरा अब्बा, मेरा पिता” बोलि सकद्‍यां।

⁷ इलै हे मेरा भै-बैंणो, अब तुम गुलाम नि छाँ, बल्किन मा पिता परमेस्वर की औलाद छाँ। अर अब जब तुम औलाद छाँ, त पिता परमेस्वर न तुमतै अपणु वारिस भि बणैयालि।

गलाति का लोगु खुणि पौलुस की चिन्ता

⁸ हे मेरा भै-बैंणो, पैलि जब तुम परमेस्वर तैं नि जणदा छा, त वे बगत तक तुम ऊंका गुलाम छा जु कि असल मा ईश्‍वर छैई ही नि छिन।

⁹ पर अब जु तुमुन परमेस्वर तैं पछ्याणयालि, या हम इन बोलि सकद्‍यां कि तुम भि परमेस्वर का नौ से जणे जाणा छाँ, त फिर तुम किलै दुनियां की नास होण वळी ऊं बातों का जनै लौटण छाँ जु तुमतै बचै नि सकदिन? अर तुम फिर से किलै गुलामी का सेवक होण चन्द्‍यां? मेरा दगड़्यों, तुम बेकार की बातों पर अपणु मन किलै लगौन्द्‍यां?

¹⁰ अर तुम खास दिन, खास मैना, अर खास सालों तैं बड़ु ध्यान देके मणद्‍यां, या बात ठिक नि च।

¹¹ अर मितैं ईं बात से डौऽर लगदी, कि ज्वा मेनत मिन तुमरा बानो कैरी कखि वा बेकार नि ह्‍वे जौ।

¹² हे मेरा बिस्वासी भै-बैंणो, तुम जु यहूदी जाति का नि छाँ तुमुन मेरु कुछ नि बिगाड़ि, अर मि एक यहूदी होण का बाद भि तुम लोगु खुणि तुमरि तरौं ही ह्‍वे ग्यों, पर अब मि तुम बटि बिन्ती करदु कि तुम मसीह जीवन मा अब मि जन ह्‍वे जा।

¹³ अर तुमतै याद होलु जब मिन पैलि बार तुमतै शुभ समाचार सुणै छौ, अर वे बगत त मि बिमार छौ।

¹⁴ अर मेरी ईं बिमारि का बाना तुम लोगु तैं दिक्‍कत झिलण पोड़ि, मगर फिर भि तुम लोगु न मि बटि नफरत नि कैरी अर ना ही मेरु तिरिस्कार कैरी, मगर तुमुन मितैं परमेस्वर का एक दूत का जन या इन बोलि सकद्‍यां कि यीशु मसीह का जन स्वीकार कैरी।

¹⁵ अर मितैं इन बता, कि जु आसिरबाद तुमतै मिल्यूं छौ उ कख हरचि गै? अर मि खुद ईं बात की गवै देन्दु कि एक बगत वु छौ, कि जब मि तुमकु बुल्दु कि अपणा आंखा निकळि के मितैं दे द्‍या, त तुम मि खुणि उन्‍नि कैरी देन्दा।

¹⁶ अर अब जु मि तुम बटि सच्‍च बोन्‍नु छौं, त मि तुमरो दुसमन बणि ग्यों।

¹⁷ अर वु झूठ्‍ठा लोग तुमतै अफ दगड़ा मिलाणु खुणि बड़ा जोस से तुमरा पिछनै पोड़यां छिन, पर ऊंको मकसद ठिक नि च। अर वु तुमतै अलग करण चाणा छिन, ताकि तुम उन्‍नि कैरा जन वु चाणा छिन।

¹⁸ अर अगर कुई भला कामों का बानो तुमरा पिछनै पोड़्यूं च, त वेतैं दोस्त बणौण कुई गळत बात नि च पर ध्यान रखा कि वेको मकसद ठिक होण चयेणु। अर यू भि याद रखा कि वु भलै का काम हर बगत कैरो, ना कि केवल तब जब मि तुमरा दगड़ा मा रौन्दु।

¹⁹ हे मेरा बच्‍चों, मि तुम खुणि फिर से परसव जन पीड़ा सौंणु छौं। अर या पीड़ा तब तक राली, जबरि तक मसीह को रुप तुमरा भितर फिर से बणि के तयार नि ह्‍वे जौ।

²⁰ इलै मि तुमरा बानो बड़ी उळझण मा पोड़्यूं छौं, कि तुम लोग दुसरा ही बाटा पर चलण लगि ग्यां, अर मेरी या इच्छा च कि यों सब बातों का बारा मा मि ऐके तुमतै भौत अच्छे से समझौ। मगर अभि मि कुछ नि कैरी सकदु किलैकि मि तुम से भौत दूर छौं।

सारा अर हाजिरा को उदारण

²¹ हे मेरा भै-बैंणो तुम लोग जु नियम-कानूनों का अधीन रौण चन्द्‍यां, तुम मितैं एक बात बता क्या तुम लोग न नियम-कानूनों तैं ढंगल नि सुणी?

²² सुणा, वेमा इन लिख्यूं च कि अब्राहम का दुई नौना छा, एक को जनम गुलाम नौकराणि बटि ह्‍वे। अर दुसरो को जनम वेकी घरवळी बटि ह्‍वे, ज्वा कि हरेक बात मा आजाद छै।

²³ मगर सारा की इच्छा का मुताबिक जु नौनु नौकराणि से पैदा ह्‍वे, वु मनखि की इच्छा से ह्‍वे। अर जु नौनु वेकी घरवळी बटि ह्‍वे उ परमेस्वर का द्‍वारा कियां करार का मुताबिक ह्‍वे।

²⁴ अर गुलाम अर आजाद करण वळी बातों को मतलब यों दुई जनानियों से सीखा, किलैकि यू दुई जनानियां दुई करार को चिन्‍न छिन। पैलु चिन्‍न हाजिरा च ज्वा कि नौकराणि छै अर वींका द्‍वारा पैदा होयुं बच्‍चा गुलाम ही च, ठिक उन्‍नि पैलु करार भि च जु कि सीनै नौ का पाड़ पर दिये गै, अर वेको पालन करण वळा लोग गुलामी मा ही पैदा होनदिन।

²⁵ अर सीनै पाड़ जु कि अरब मुलक मा च अर नौकराणि हाजिरा वे पाड़ का जन च, ठिक उन्‍नि आज यरूशलेम नगर का लोग भि छिन जु कि अपणा जण-बच्‍चों समेत नियम-कानूनों की गुलामी मा जीणा छिन।

²⁶ मगर दुसरो चिन्‍न अब्राहम की घरवळी सारा च, ज्वा की आजाद छै अर वा हमरि माँ का जन च, किलैकि वा दुसरा करार को उदारण च ज्वा कि आजाद च अर वींका बच्‍चा भि आजाद छिन। अर वा वे यरूशलेम नगर का जन च, जु स्वर्ग बटि औण वळु च।

²⁷ किलैकि पवित्रशास्‍त्र मा इन लिख्यूं च कि, “हे बाँझ, तू आनन्द मणौ किलैकि तिन बच्‍चा तैं जनम नि दिनी। अर खुश हो अर परमेस्वर खुणि धन्यवाद का गीत गा, किलैकि तिन कभि भि परसव की पीड़ा नि सै, मगर अब तेरा पास वीं जनानि से जादा बच्‍चा होला जिं का पास पति होन्दु।”

²⁸ हे मेरा भै-बैंणो, हम भि पितर इसहाक की तरौं करार करीं औलाद छां।

²⁹ अर जन हमतै ऊं लोगु का द्‍वारा सतयै जान्दु, जु इन चनदिन कि हम नियम-कानूनों का मुताबिक चलणा रा, यू ठिक उन्‍नि च जन करार का द्‍वारा पैदा होयां पितर इसहाक तैं इश्माएल द्‍वारा सतयै गै जु कि नौकराणि का द्‍वारा पैदा ह्‍वे छौ।

³⁰ पर पवित्रशास्‍त्र मा इन लिख्यूं च कि, “अब्राहम अपणी नौकराणि अर वींका नौना तैं निकाळ दे, किलैकि नौकराणि को नौनु तेरी घरवळी का नौना का दगड़ा मा बिल्कुल भि हकदार नि होलु।”

³¹ इलै हे मेरा भै-बैंणो, हम नौकराणि का ना पर आजाद जनानि का बच्‍चा छां।