गलातियों 1 - Garhwali

गलाति खुणि पौलुस की चिठ्‍ठी

^1-2 हे मेरा भै-बैंणो, मि पौलुस अर वु सब बिस्वासी भै-बैंणा जु कि मेरा दगड़ा मा छिन, मि या चिठ्‍ठी गलाति मुलक मा रौण वळा बिस्वासी समुदाय का लोगु खुणि लिखणु छौं। मेरा दगड़्यों, मितैं नऽ त कै खास मनखि न, अर ना ही लोगु द्‍वारा खास चेला का रुप मा चुणै गै, बल्किन मा मितैं त यीशु मसीह अर पिता परमेस्वर न खास चेला का रुप मा चुणी, हाँ, वे ही पिता परमेस्वर न जैन यीशु मसीह तैं मुरदो मा बटि ज्यून्द कैरी, अर वेन ही खुद यू काम कैरी।

³ अर हमरा पिता परमेस्वर अर प्रभु यीशु मसीह की तरफा बटि वेकी किरपा अर शान्ति तुम पर बणि रौ, या ही हमरि प्रार्थना च।

⁴ अर तुम यू जाणि ल्या, कि वे ही यीशु न हमरा पापों का खातिर खुद तैं बलिदान होणु खुणि दे दिनी, ताकि इन कैरिके वु हमरा पिता परमेस्वर की मनसा का मुताबिक हमतै आज ईं दुनियां की बुरी बातों से आजाद कैरो।

⁵ वे परमेस्वर की बडै सदनि तक होणी रौ। आमीन।

एक ही शुभ समाचार

⁶ मितैं ईं बात पर बड़ु ताजुब होणु च, कि जै पिता परमेस्वर न तुमतै यीशु मसीह की किरपा का द्‍वार अपणा पास बुलै, आज तुम वेतैं छोड़ि के कैं दुसरा ही शुभ समाचार को पालन करण लगि ग्यां।

⁷ पर मि तुमतै बतै देन्दु कि पिता परमेस्वर को कुई दुसरो समाचार छैई नि च, अर सच्‍चि बात त या च कि कुछ लोग तुमतै भरमौणा छिन, अर इन कैरिके वु लोग मसीह का शुभ समाचार तैं ही बदलण चाणा छिन।

⁸ मगर जै शुभ समाचार को परचार हमुन तुमतै सुणै, अगर वेका अलावा कुई तुमतै दुसरो ही समाचार सुणौ, त वे मनखि पर पिता परमेस्वर को असगार औण द्‍या। अब चै ऊ हम हो, या कुई स्वर्गदूत।

⁹ अर जन हमुन पैलि ही बोलियालि छौ, ठिक उन्‍नि मि फिर से बोन्‍नु छौं, कि पिता परमेस्वर को जु शुभ समाचार तुमुन स्वीकार कैरी, अगर वेका अलावा कुई दुसरो समाचार तुमतै सिखौन्दु, त वे मनखि पर परमेस्वर को असगार औण द्‍या।

¹⁰ अर तुमतै क्या लगदु, कि क्या अब मि लोगु तैं मनौण की कोसिस कनु छौं? ना, मि त परमेस्वर तैं मनौण चान्दु। अर तुमतै क्या लगदु कि मि मनखियों तैं खुश कनु छौं? नऽ रे ना, अगर जु मि अभि तक मनखियों तैं खुश कनु रौन्दु, त मि परमेस्वर को सेवक नि होन्दु।

पौलुस तैं खास चेला होणु खुणि बुलये जाण

¹¹ हे मेरा भै-बैंणो मि तुमतै बतै देन्दु, कि जै शुभ समाचार को परचार मिन तुमरा बीच मा कैरी, वु कै मनखि का द्‍वारा नि बणयै गै।

¹² किलैकि उ शुभ समाचार नऽ त मितैं कै मनखि न दिनी, अर ना ही मितैं कैन सिखै, बल्किन मा वु त खुद यीशु मसीह न मि पर परगट कैरी।

¹³ अर मि पौलुस, जनमजात यहूदी छौ, अर वे बगत मि यीशु पर बिस्वास नि करदु छौ इलै मेरु चाल-चलन कन छौ, वेका बारा मा भि तुमुन भौत सा लोगु का द्‍वारा सुणयूं च। दगड़्यों, वे बगत मि परमेस्वर का समुदाय का लोगु तैं भौत सतौन्दु छौ, अर ऊंतैं नास करणु खुणि मिन भौत जतन भि कैरी।

¹⁴ अर वे बगत त मि अपणा पितरों की रीति-रिवाजों तैं मनण मा, अर अपणी उमर का भौत सा यहूदी लोगु का बीच मा, अर अपणा देस का लोगु मा भि मि सबसे जादा तेज छौ।

¹⁵ मगर परमेस्वर न मितैं माँ का पुटगुन्द ही अफ खुणि चुणी के अलग कैरियाली छौ, अर अपणी महान किरपा का द्‍वारा वेन मितैं बुलै। अर वे परमेस्वर तैं या बात अच्छी लगि कि,

¹⁶ वु अपणा पुत्र तैं मि पर परगट कैरो, ताकि मि वेका पुत्र यीशु मसीह को परचार ऊं लोगु का बीच मा जैके कैरुं जु यहूदी जाति का नि छिन। अर जब मेरा दगड़ा मा इन ह्‍वे, त मि तुरन्त सला लेणु खुणि कै मनखि का पास नि ग्यों।

¹⁷ अर ना ही मि यरूशलेम नगर मा ऊं लोगु का पास ग्यों जु मिसे पैलि खास चेला का रुप मा चुणै गै छा, बल्किन मा मि तुरन्त अरब मुलक कू चलि ग्यों, अर वेका बाद मि फिर दमिश्क नगर कू वापिस ऐ ग्यों।

¹⁸ अर ठिक तीन साल बाद मि पतरस बटि मुलाकात करणु खुणि यरूशलेम नगर कू ग्यों, अर उख पन्द्ररा दिनों तक वेका दगड़ा मा रौंऽऽ।

¹⁹ अर उख मेरी मुलाकात प्रभु यीशु का भै याकूब से ह्‍वे, अर वेका अलावा मेरी मुलाकात कै दुसरा खास चेला का दगड़ा मा नि ह्‍वे।

²⁰ अर जु बात मि तुम खुणि लिखणु छौं वु सब बात सच्‍चि छिन, किलैकि यों सब बातों को गवा पिता परमेस्वर च।

²¹ अर यरूशलेम नगर बटि निकळण का बाद मि सीरिया अर किलिकिया का मुलक कू ग्यों।

²² अर यहूदिया मुलक मा समुदाय का जु लोग यीशु मसीह पर बिस्वास करण वळा छा, ऊंन मितैं पैलि कभि नि देखि छौ।

²³ पर ऊंन मेरा बारा मा सिरफ इथगा सुणी छौ, कि पौलुस नौ एक मनखि बिस्वासी लोगु तैं भौत सतौन्दु, मगर अब वेन खुद वे पिता परमेस्वर का शुभ समाचार पर बिस्वास कैरियाली। अर वे ही शुभ समाचार का बारा मा अब उ लोगु तैं बतौणु भि च, जै शुभ समाचार तैं नास करण को पूरु जतन उ कनु छौ।

²⁴ अर अब यहूदिया मुलक का ऊ बिस्वासी लोग मेरा खातिर पिता परमेस्वर की बडै करदिन।