कुलुसी 4 - Garhwali

¹ हे मालिकों, अपणा-अपणा नौकरों तैं ऊंको हक द्‍या, अर अपणु सभौ ऊंका दगड़ा मा ठिक रखा। अर यू सब कुछ तुम इन समझि के कैरा, कि स्वर्ग मा तुमरो भि एक मालिक च।

यीशु मसीह का बारा मा बतौण

² हे मेरा भै-बैंणो, चौकस रा, अर प्रार्थना करण मा लग्यां रा, अर हरेक बात मा प्रभु को धन्यवाद द्‍या।

³ अर येका दगड़ा-दगड़ि हम खुणि इन प्रार्थना कैरा, ताकि हमतै इन मौका मिलु कि हम पिता परमेस्वर का वचन तैं लोगु का बीच मा और भि जादा फैले सैका। अर हम यीशु मसीह का वे राज का बारा मा बतै सैका, जैका खातिर आज मि कैद मा छौं,

⁴ अर मि खुणि भि प्रार्थना कैरा, कि मि वचन का ये राज तैं खूब ढंगल बतै सैकु, ताकि सब लोग ढंगल समझि सैका।

⁵ अर बगत तैं अच्छु समझि के वेको पूरु इस्तेमाल कैरा। अर जु लोग प्रभु यीशु पर बिस्वास नि करदिन, ऊं लोगु का दगड़ा मा अपणु बरतौ बड़ा समझदारी से कैरा।

⁶ अर बात-चित करण मा तुमतै दीन होण चयेणु, ताकि तुमरि बात सभ्यों तैं अच्छी लगौ, अर तुमतै हरेक बात को जबाब देण भि औण चयेणु।

आखिरी सला

⁷ हे मेरा दगड़्यों, मेरा प्यारु भै तुखिकुस जु कि प्रभु की सेवा का काम मा मेरी मदद करण वळु अर भरोसामन्द मनखि च, जब उ तुमरा पास आलु, त मेरा बारा मा तुमतै सब कुछ बतै द्‍यालु।

⁸ अर मि वेतैं तुमरा पास इलै भेजणु छौं, ताकि वेका द्‍वारा तुमतै हमरि हालत का बारा मा पता चलि जौ, अर जब उ तुमरा पास पौंछी जालु त उ तुमरा दिलों की हिम्मत तैं भि बढालु।

⁹ अर वेका दगड़ा-दगड़ि मि अपणा प्यारा भै उनेसिमुस तैं भि भेजणु छौं, जु कि तुमरा इख को ही च, अर उ एक भरोसामन्द मनखि च। अर जु कुछ भि इख होणु च, ऊं बातों का बारा मा ऊ दुईया का दुई तुमतै बतै द्‍याला।

¹⁰ अर मेरा दगड़ा कैद होयां अरिस्तर्खुस भै कि तरफा बटि अर मरकुस भै कि तरफा बटि भि तुमतै सलाम, अर मरकुस रिश्ता मा बरनबास को भै लगदु। (अर मरकुस का बारा मा तुमतै इन बतये गै छौ, कि वेको स्वागत बड़ा अच्छे कर्यां)।

¹¹ अर भै ईसु जैकू यूसतुस बुले जान्दु, तुमकु सलाम बोन्‍नु च। दगड़्यों, हमरा ये भै न खतना का रिवाज तैं पूरु कर्युं च अर यू ही च जु कि परमेस्वर का राज तैं फैलाण मा मेरु दगड़्या च अर यू बगत-बगत पर मेरी हिम्मत तैं भि बढौन्दु।

¹² अर तुमरा इखो इपफ्रास भै भि जु कि यीशु मसीह को सेवक च, उ भि तुमकु सलाम बोन्‍नु च। अर उ मन लगै के तुम खुणि हमेसा प्रार्थना कनु रौन्दु, ताकि तुम हरेक बात मा सिद्ध ह्‍वे सैका अर यीशु मसीह पर पूरु बिस्वास कैरिके परमेस्वर की मनसा तैं पूरि कैरी सैका।

¹³ अर मि ईं बात मा इपफ्रास भै को गवा छौं, कि वु तुम खुणि अर लौदीकिया नगर अर हियरापुलिस नगर का लोगु खुणि बड़ी मेनत कनु रौन्दु।

¹⁴ अर हमरु प्यारु भै लूका जु कि बैद च, अर देमास भै तुमकु सलाम बोन्‍ना छिन।

¹⁵ अर लौदीकिया का बिस्वासी भै-बैंणो तैं हमरु सलाम बुलयां, अर हमरि बैंण नुमफास का घौर मा इकट्‍ठा होण वळी समुदाय का लोगु खुणि भि सलाम बुलयां।

¹⁶ अर जब तुम ईं चिठ्‍ठी तैं बिस्वासी समुदाय का लोगु का बीच मा पैढी दिल्या, त इन कर्यां कि लौदीकिया नगर की बिस्वासी समुदाय मा भि पैढी दियां, अर ज्वा चिठ्‍ठी मिन लौदीकिया नगर का लोगु खुणि लिखीं च वा तुमरा बीच मा भि पढै जौ।

¹⁷ अर भै अरखिप्पुस कू बुलयां, कि सेवा को जु काम प्रभु न त्वेमा सौप्युं च वेतैं तू ध्यान से कैरी।

¹⁸ अर मि पौलुस जु कि इख बेड़ियों मा बन्धयूं छौं खुद अपणा हाथळ तुम खुणि सलाम लिखणु छौं, तुम मितैं अपणी प्रार्थनाओं मा याद रख्यां। अर मि इन प्रार्थना करदु कि प्रभु की किरपा तुम पर होणी रौ। आमीन।