खास चेलों 3 - Garhwali

लंगड़ा भिकारी तैं खूब करण

¹ एक दिन पतरस अर यूहन्‍ना दुफरे तीन बजी का करीब प्रार्थना का बगत मन्दिर कू जाणा छा।

² अर ये मन्दिर का गेट पर जैकू सुन्दर गेट बुले जान्दु, लोग जनम का एक लंगड़ा मनखि तैं हर दिन ये गेट का पास बैठे देन्दा छा, ताकि यू भैर-भितर जाण वळा लोगु बटि भीक मांगु, अर इन्‍नि ये दिन भि ह्‍वे।

³ जब ये मनखि न पतरस अर यूहन्‍ना तैं मन्दिर मा औन्द देखि, त कुछ पौण की उम्मीद से वेन ऊं बटि भीक मांगि।

⁴ पतरस अर यूहन्‍ना न वेकी तरफा ध्यान से देखि अर बोलि, “हम जनै देख।”

⁵ तब वेन ऊं बटि कुछ पौणे की इच्छा से ऊं जनै देखि।

⁶ अर पतरस न बोलि, “सोना अर चांदी त मि मा नि च, मगर जु मेरा पास च वु मि त्वेतै देन्दु, नासरत गौं का यीशु मसीह का नौ से उठ अर चलण-फिरण लगि जा।”

⁷ तब पतरस न वेकू दैंणु हाथ पकड़ी अर वेतैं उठे, अर तुरन्त वेका खुटों अर घुंडो मा ताकत ऐ गै।

⁸ तब उ उचड़फळि मारी के खड़ु ह्‍वे अर चलण-फिरण लगि, अर ईं खुशी का बाना उ नचण लगि गै, अर उछलि-कूदी के परमेस्वर की तारीफ करद-करद ऊंका दगड़ा मन्दिर मा चलि गै।

⁹ अर सब लोगु न वेतैं हिटण अर परमेस्वर की तारीफ करद देखि,

¹⁰ अर पछ्याणी गैनी, कि यू त उई मनखि च जु कि मन्दिर का सुन्दर गेट पर बैठि के भीक मंगदु छौ। अर यू देखि के की अब यू चलण-फिरण लगि गै लोग हकदक अर ताजुब मा पोड़ि गैनी।

मन्दिर मा पतरस को उपदेस

¹¹ पतरस अर यूहन्‍ना मन्दिर का वे बरण्डा का पास छा जैकू सुलैमान को बरण्डा बुले जान्दु, अर अपणी खुशी का बानो ये भिकारी मनखि न ऊंतैं पकड़ी के रख्युं छौ। अर ये मनखि तैं देखि के हकदक होईं भीड़ भागी के ऊंका पास ऐ।

¹² अर यू देखि के पतरस न ऊं लोगु कू बोलि, “हे इस्राएल का लोगु, तुम ये काम तैं देखि के किलै ताजुब कना छाँ? अर टक लगै के हमतै इन किलै दिखणा छाँ? तुम त इन दिखणा छाँ जन कि हम लोगु न ये मनखि तैं खुद की ताकत अर भक्‍ति की वजै से खूब कैरी हो।

¹³ अरे, यू सब आदर-सम्मान त हमरा पितरों का परमेस्वर याने कि अब्राहम का परमेस्वर, इसहाक का परमेस्वर अर याकूब का परमेस्वर न अपणा सेवक हमरा प्रभु यीशु तैं देई, हाँ, वे ही यीशु तैं जैतैं तुमुन पकड़वै दिनी। अर गवर्नर पिलातुस न वेतैं छुड़ण को विचार कैरी, पर तुमुन वेका समणि यीशु तैं नकारी दिनी।

¹⁴ हाँ, तुम लोगु न वे पवित्र अर धरमी मनखि तैं नकारी दिनी, अर पिलातुस बटि वे हत्यारा मनखि बरअब्बा खुणि बिन्ती कैरी, कि तुम लोगु खुणि वेतैं छुड़ै जौ।

¹⁵ अर तुमुन जीवन का दाता तैं मारी दिनी, मगर परमेस्वर न वेतैं मुरदो मा बटि ज्यून्दु कैरी, अर ईं बात का गवा हम छां,

¹⁶ अर यीशु पर बिस्वास करण से, अर वेकी ताकत से, ये मनखि तैं खड़ु होण की ताकत मिली, अर तुम येतैं दिखणा अर जणदा भि छाँ। अर सच्‍च त यू च कि यीशु पर बिस्वास करण से ही यू मनखि तुम सभ्यों का समणि पूरि तरौं से तन्दुरुस्त ह्‍वे गै।

¹⁷ “हे मेरा भै-बैंणो, मि जणदु छौं कि तुमुन अर तुमरा अधिकारीयों न यीशु का दगड़ा मा जु कुछ भि कैरी, तुम वीं बात का बारा मा नि जाणि सक्यां कि तुमुन इन किलै कैरी।

¹⁸ अरे, परमेस्वर न पैलि ही अपणा सब रैबर्यों का द्‍वारा इन बुलवै छौ कि जै मसीह तैं मि भेजलु वेतैं यू दुख सौण पोड़लु, अर वेन यीशु मसीह का द्‍वारा वीं भविष्यबाणी तैं इनकै पूरु कैरी दिनी।

¹⁹ इलै अपणा पापों से पस्ताप कैरा, अर परमेस्वर का पास वापिस ऐ जा, ताकि तुमरा पाप पूरि तरौं से माफ ह्‍वे जा,

²⁰ तब प्रभु बटि तुमतै नयी ताकत मिलण को बगत आलु, अर उ यीशु तैं तुमरा पास फिर से भेजलु, जैतैं वेन पैलि बटि तुम खुणि मसीह कैरिके ठैर्युं च।

²¹ अर या बात जरुरी च कि यीशु स्वर्ग मा तब तक रौ जबरि तक की परमेस्वर सब चीजों तैं फिर से नयू नि कैरी द्‍यो, जौं बातों का बारा मा परमेस्वर न अपणा पवित्र रैबर्यों का द्‍वारा भौत साल पैलि ही बुलवैयालि छौ।

²² हाँ, जन की मूसा रैबर्या न बोलि छौ कि, ‘प्रभु परमेस्वर तुमरा बीच मा बटि मि जन एक रैबर्या तैं चुणी के तुम खुणि खड़ु करलु, अर जु कुछ भि उ तुम मा बोललु तुम वे बटि सुणी के वेका मुताबिक ही कर्यां।

²³ अर हरेक मनखि जु वे रैबर्या की बात तैं नि सुणलु, उ मनखि लोगु का बीच मा बटि नास किये जालु।’

²⁴ अर परमेस्वर का रैबर्या शमूएल न अर वेका बाद औण वळा जथगा भि रैबर्यों न भविष्यबाणी कैरिके बोलि, ऊं सभ्यों न यों दिनों मा होण वळी बातों का बारा मा ही त बतै छौ।

²⁵ अर परमेस्वर न रैबर्यों का द्‍वारा जु करार कैरी, वु तुम खुणि भि च। अर तुम ये समझौता का हकदार छाँ जु कि तुमरा पितरों का दगड़ा मा किये गै। अर वेन पितर अब्राहम कू बोलि छौ कि, ‘तेरा वंश का द्‍वारा धरती का सब कुटुम्ब आसीस पाला।’

²⁶ अर परमेस्वर न ही हम लोगु का बीच मा बटि यीशु मसीह तैं चुणी के ठैरै, अर सबसे पैलि तुमरा ही बीच मा भेजि, ताकि तुम सब अपणी-अपणी बुरै तैं छोड़ि द्‍या, अर वेसे आसीस पा।”