खास चेलों 11 - Garhwali

पतरस को अपणा लोगु तैं समझाण

¹ अर या खबर यहूदिया मुलक का खास चेलों अर बिस्वासी भै-बैंणो तैं पता चलि गै, कि जु हमरि जाति का नि छिन ऊंन भि परमेस्वर का वचन तैं स्वीकार कैरियाली।

² अर जब पतरस यरूशलेम नगर मा ऐ, तब खतना कियां बिस्वासी लोग वेका दगड़ा मा वाद-विवाद करण लगि गैनी।

³ अर ऊंन वेकू बोलि कि, “तू इन्द्रया लोगु का घौर मा गै, जौन अपणा सरील मा खतना का रिवाज तैं पूरु नि कर्युं छौ अर तिन ऊंका दगड़ा मा खाणु भि खै।”

⁴ तब पतरस न ऊंतैं एक-एक बात बिंगौण शुरु कैरी अर बोलि,

⁵ “जब मि याफा नगर मा प्रार्थना कनु छौ, त मितैं भूक लगणि छै। अर मि अपणी सुद-बुद मा नि छौ, अर मिन एक दरसन देखि की एक बड़ा चदरा का जन कुई चीज मेरा पास मूड़ी औणी च, अर वीं चीज तैं चौतरफि बटि पकड़ी के धरती पर लये जाणु च।

⁶ अर जब मिन वीं चीज तैं ध्यान से देखि, त वामा धरती का हरेक किसम का जानबर याने की चार खुटों वळा जानबर, रिंगण वळा, अर पंछि भि छा।

⁷ तब एक आवाज न मिकू बोलि, ‘हे पतरस उठ, यों तैं मार अर खै ले।’

⁸ पर मिन बोलि, ‘ना प्रभु कभि भि ना, अगर मितैं कुई भि चीज खाणु कू मिलेली त मि वींतैं इन्‍नि नि खै देण, किलैकि आज तक मिन ऊ चीज नि खैनि जु अशुद्ध अर पवित्र नि छिन।’

⁹ अर जब मिन इन जबाब दिनी त दुसरि दौं भि आसमान बटि इन आवाज सुणै कि, ‘जौं चीजों तैं परमेस्वर न शुद्ध कैरियाली, तू वेकू अशुद्ध नि बोल।’

¹⁰ अर तीन दौं इन्‍नि ह्‍वे, अर वेका बाद वा चीज आसमान मा वापस उठये गै।

¹¹ अर सुणा, वे ही बगत जै घौर मा हम छा, उख तीन लोग पौंछी गैनी। अर ऊंतैं मेरा पास कैसरिया नगर बटि भेजि गै छौ।

¹² अर पवित्र आत्मा न मितैं बिन हिचकिचयां ऊंका दगड़ा मा जाणु कू बोलि, अर मेरा दगड़ा मा यू छह बिस्वासी भै भि उख जाणु कू पैटि गैनी। अर तब हम कुरनेलियुस नौ का एक मनखि का घौर कू ग्यां।

¹³ अर उख कुरनेलियुस भै न हमतै बतै कि मिन एक स्वर्गदूत तैं अपणा घौर मा खड़ु होयुं देखि अर वे स्वर्गदूत न वेकू बोलि कि, ‘अपणा कुछ लोगु तैं याफा नगर मा भेज अर उख बटि शमौन जैकू पतरस भि बुले जान्दु वेतैं इख बुलवौ।

¹⁴ अर वु ऐके तुम लोगु तैं वचन सुणालु, अर वे वचन तैं सुणी के त्वेतै अर तेरा घौर का लोगु तैं बचयै जालु।’

¹⁵ “अर जब मिन ऊंतैं वचन सुनौण शुरु कैरी, तब पवित्र आत्मा को दान ऊं सभ्यों तैं भि मिली गै, अर यू सब ठिक उन्‍नि ह्‍वे जन शुरु मा हमुन पै छौ।

¹⁶ तब मितैं प्रभु को वु वचन याद ऐ जन कि बुले गै छौ कि, ‘यूहन्‍ना न त पाणिळ बपतिस्मा दिनी, मगर तुम पवित्र आत्मळ बपतिस्मा पैल्या।’

¹⁷ अर जब हमुन प्रभु यीशु मसीह पर बिस्वास कैरी, त परमेस्वर न हमतै पवित्र आत्मा दान का रुप मा दिनी, अर उई दान वेन ऊंतैं भि दिनी, त फिर परमेस्वर तैं रुकण वळु मि कु होन्दु।”

¹⁸ अर जब यहूदी बिस्वासी लोगु न यू सब बात सुणिनी, त वु संट ह्‍वे गैनी। अर ऊंन परमेस्वर की तारीफ कैरिके बोलि, “परमेस्वर की बडै हो, किलैकि वेन सदनि को जीवन पौणु खुणि मन से पस्ताप करण को मौका ऊंतैं भि दियाली जु यहूदी जाति का नि छिन।”

अन्ताकिया नगर को बिस्वासी समुदाय

¹⁹ अर स्तिफनुस की मौत का बाद बटि जु सतौ बिस्वासी समुदाय का लोगु पर ऊं दिनों मा किये जाणु छौ, वां की वजै से बिस्वासी लोग तितर-बितर ह्‍वे गै छा। अर वु सब लोग साइप्रस टापू मा, फीनीके मुलक मा इख तक की अन्ताकिया नगर तक चलि गैनी, अर ऊंन केवल यहूदी लोगु तैं ही वचन सुणै।

²⁰ मगर ऊंमा बटि कुछ बिस्वासी लोग साइप्रस टापू अर कुरेन नगर का छा जु कि अन्ताकिया नगर मा ऐनी, अर ऊंन यूनानियों तैं भि प्रभु यीशु को शुभ समाचार सुनौण शुरु कैरी दिनी।

²¹ अर प्रभु की ताकत ऊं लोगु का दगड़ा मा छै, अर भौत सा लोगु न बिस्वास कैरी अर प्रभु की तरफा ह्‍वे गैनी।

²² अर जब यरूशलेम नगर का बिस्वासी लोगु न यों लोगु की चर्चा सुणी, तब ऊंन बरनबास भै तैं अन्ताकिया नगर मा भेजि।

^23-24 अर बरनबास एक अच्छु बिस्वासी, पवित्र आत्मा से भरपूर अर एक भलु मनखि छौ। अर जब उ अन्ताकिया नगर मा पौंछी, अर लोगु पर होईं परमेस्वर की किरपा तैं देखि के बड़ु आनन्दित ह्‍वे, अर वेन ऊंतैं ईं बात की शिक्षा दिनी कि वु सब लोग पूरा मन से प्रभु मा बणयां रा, अर एक बड़ी भीड़ प्रभु पर बिस्वास करण लगि गै।

²⁵ अर वेका बाद बरनबास, शाऊल तैं खुज्याणु खुणि तरसुस नगर कू गै।

²⁶ अर जब उ बरनबास तैं मिली त बरनबास वेतैं अन्ताकिया नगर मा अफ दगड़ा लेके ऐ। अर ऊ पूरा एक साल तक बिस्वासी समुदाय का लोगु से मिलणा रैनी, अर लोगु तैं सिखौणा रैनी। अर अन्ताकिया नगर का बिस्वासी लोगु खुणि ही सबसे पैलि “ईसै” बुले गै।

²⁷ अर ऊं दिनों मा यरूशलेम नगर बटि परमेस्वर का कुछ रैबर्या अन्ताकिया नगर मा ऐनी।

²⁸ अर ऊंमा बटि एक अगबुस रैबर्या छौ, अर वेन खड़ु ह्‍वेके पवित्र आत्मा का द्‍वारा भविष्यबाणी कैरिके बोलि कि ये पूरि दुनियां मा भौत बड़ु अकाळ पोड़लु (अर ठिक उन्‍नि ह्‍वे, यू अकाळ महाराजा क्लौदियुस का बगत मा पोड़ि)।

²⁹ अर ये अकाळ का बगत मा ही अन्ताकिया नगर का बिस्वासी लोगु न इन फैसला कैरी, कि हरेक मनखि यहूदिया मुलक मा रौण वळा बिस्वासी लोगु की मदद करणु खुणि जै से जथगा ह्‍वे सकलु, उ उथगा दे सकदु च।

³⁰ अर ऊंन ठिक इन्‍नि कैरी अर या मदद ऊंन इकट्‍ठा कैरिके बरनबास अर शाऊल का द्‍वारा बिस्वासी समुदाय का अध्यक्षों का पास भेजि।