खास चेलों 1 - Garhwali

पवित्र आत्मा देण को करार

¹ प्रिय थियुफिलुस, मिन अपणी पैलि किताब मा यीशु मसीह का ऊं सब कामों का बारा मा लिखी, जु कुछ भि वेन करण की अर सिखौण की शुरुवात कैरी,

² अर वेन अपणा चुण्यां खास चेलों तैं पवित्र आत्मा का द्‍वारा आज्ञा भि दिनी, अर येका बाद वेतैं स्वर्ग मा उठये गै।

³ अर क्रूस को दुख झिलण का बाद भि यीशु न अपणा ज्यून्द होण का भौत सरा पक्‍का परमाण दिनी। अर उ चालीस दिनों तक अपणा खास चेलों तैं दिखै, अर वेन ऊं बटि परमेस्वर का राज का बारा मा बात भि कैरी।

⁴ अर थियुफिलुस, एक दिन इन ह्‍वे जब यीशु अपणा चेलों का दगड़ा मा मिली के खाणुक खाणु छौ, त वेन ऊंतैं आज्ञा दिनी कि, “यरूशलेम नगर तैं छोड़ि के नि जयां, मगर इखि रयां अर पिता का वे करार तैं पूरु होण को इंतजार कर्यां, जैका बारा मा मिन तुमुन पैलि बतै छौ।

⁵ किलैकि यूहन्‍ना न त पाणिळ बपतिस्मा दिनी, मगर अब से कुछ दिनों का बाद तुम पवित्र आत्मा का द्‍वारा बपतिस्मा पैल्या।”

यीशु को स्वर्ग मा उठये जाण

⁶ अर जब यीशु का खास चेला वेका दगड़ा मा छा, त ऊंन वे बटि पूछी कि, “प्रभु, क्या तुम इस्राएल राज्य तैं अभि छुड़ै के फिर से जनौ-तन कैरी दिल्या?”

⁷ तब वेन ऊंकू बोलि, “वे बगत अर वे समौ का बारा मा जनण तुमरो काम नि च, किलैकि वु सब कुछ पिता न अपणा अधिकार मा रख्युं च।

⁸ अर जब तुम पवित्र आत्मा तैं पैल्या, त तुमतै सामर्थ मिलेली तब तुम यरूशलेम नगर मा अर पूरा यहूदिया अर सामरिया का मुलकों मा, इख तक की पूरि दुनियां मा तुम मेरा गवा बणि जैल्या।”

^9-10 अर जब यीशु न या बात बोलि दिनी, त उ खास चेलों का दिखदी-दिखदी मथि स्वर्ग मा उठये गै, अर जब उ जाणु छौ, त एक बादळ न वेतैं ऊंका आंख्यों बटि लुके दिनी, वेका चेला वेतैं टक लगै के दिखणा छा। अर देखा, उबरि सफेद कपड़ा पैरयां दुई आदिम चेलों का समणि ऐके खड़ा ह्‍वेनि।

¹¹ अर यों न चेलों कू बोलि, “हे गलीली लोगु, तुम किलै खड़ु ह्‍वेके आसमान जनै टक लगै के दिखणा छाँ? यू ही यीशु जु तुमरा पास बटि स्वर्ग मा उठये गै, ठिक इन्‍नि वेन औण भि च जन तुम वेतैं स्वर्ग मा जान्द दिखणा छाँ।”

मत्तियाह तैं खास चेला को पद मिलण

¹² तब यीशु का खास चेला जैतून नौ का ढौंडा बटि यरूशलेम नगर कू वापिस ऐनी। अर यू ढौंडो यरूशलेम नगर बटि लगभग एक किलोमीटर की दूरी पर च।

¹³ अर जब यू लोग यरूशलेम नगर मा ऐनी, त वे घौर का मंज्यूळ मा गैनी जख यू सब रुक्यां छा। अर यों लोगु का नौ इन छिन, पतरस, यूहन्‍ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई को नौनु याकूब, शमौन जेलोतेस, अर याकूब को नौनु यहूदा।

¹⁴ अर यू सभ्या का सभि हमेसा एक जगा मा मिलदा छा अर एक मन ह्‍वेके प्रार्थना करदा छा, अर ऊंका दगड़ा मा यीशु की माँ मरियम अर वेका भै अर कुछ और जनानियां भि छै।

^15-17 अर कुछ दिनों का बाद इन ह्‍वे कि, पतरस लगभग एक सौ बीस बिस्वासी लोगु का बीच मा खड़ु ह्‍वेके बोन्‍न लगि गै, “हे मेरा भै-बैंणो, या बात यहूदा इस्करियोती का बारा मा च, जु की यीशु तैं पकड़वौण वळो तैं बाटु दिखौण वळु बणि के ऐ छौ। हाँ, वेकी गिनती हमरा दगड़ा मा किये जान्दी छै, अर उ भि हमरि तरौं सेवा मा सामिल ह्‍वे गै छौ। मगर पवित्र आत्मा न येका बारा मा पैलि ही राजा दाऊद का द्‍वारा भविष्यबाणी करवै छै, अर यू जरुरी छौ कि पवित्रशास्‍त्र की या बात पूरि हो।

¹⁸ अर वेकी नीच कमै का द्‍वारा एक पुंगड़ु खरीदे गै, अर उ कपाळ का बल पोड़ि, पुटगु फटी, अर वेका सब अन्दड़ा भैर निकळि गैनी।

¹⁹ अर या बात यरूशलेम नगर का सब लोगु तैं पता चलि गै, इलै वीं जगा को नौ ऊंकी भाषा का मुताबिक ‘हकलदमा’ रखै गै जैको मतलब च ‘ल्वे को पुंगड़ु।’

²⁰ अर जन की भजन संहिता की किताब मा भि लिख्यूं च कि, “‘वेको घौर बांजा पोड़ि जौ, अर वेमा मा कुई भि नि रै सैको’ अर ‘वेको पद कुई दुसरो ले ल्यो।’

²¹ “इलै यूहन्‍ना बपतिस्मा देण वळा का दिन बटि लेके जबरि तक प्रभु यीशु स्वर्ग मा नि उठये गै,

²² याने कि जब हमरु प्रभु यीशु हमरा दगड़ा मा छौ वे बगत बटि लेके अब तक जु लोग हमरा दगड़ा मा छिन, ऊंमा बटि एक मनखि तैं चुणै जौ। ताकि उ मनखि भि ईं बात को गवा ह्‍वे कि यीशु तैं मुरदो मा बटि ज्यून्द किये गै।”

²³ तब ऊंन दुई मनखियों तैं चुणी के खड़ु कैरी पैलु यूसुफ, अर यूसुफ कू बरसब्बा भि बुले जान्दु छौ, अर कुछ लोग येतैं यूसतुस नौ से भि जणदा छा, अर दुसरो मत्तियाह।

²⁴ अर लोगु न इन प्रार्थना कैरी, “हे प्रभु, तुम त सब लोगु का मन की बात तैं जणद्‍यां, इलै हमतै बता कि यों दुईयों मा बटि तुमुन कैतैं चुण्यूं च,

²⁵ ताकि वेतैं सेवा की जिमेदारी अर खास चेला होण को पद दिये जौ, किलैकि यहूदा न ये पद तैं नकारी दिनी, अर ज्वा जगा वे खुणि चुणै गै छै वु उख चलि गै।”

²⁶ अर ऊं लोगु न यों का नौ पर पांसा डलिनी, अर पांसा मत्तियाह का नौ पर निकळिनी। तब मत्तियाह भि ऊं ग्यारा खास चेलों का दगड़ा मा गिणै गै।