2 थिस्सलुनीकी 3 - Garhwali

प्रार्थना करणु खुणि बिन्ती

¹ हे मेरा भै-बैंणो, आखिरी मा हम तुमकु इन भि बुल्द्‍यां, कि हम खुणि प्रार्थना कर्यां ताकि जन तुम लोगु का बीच मा परमेस्वर को वचन फैली, ठिक उन्‍नि दुसरा लोगु का बीच मा भि परमेस्वर को वचन जल्दी-जल्दी परचार किये जौ। अर वे वचन तैं सुनण वळा बड़ा आदर-सम्मान बटि वेतैं स्वीकार कैरा।

² अर इन भि प्रार्थना कैरा, कि बड़ा दुष्‍ट लोग जु हमतै नुकसान पौंछाणे की कोसिस करदिन, ऊं बटि हमतै छुटकारा मिली जौ, किलैकि हरेक मनखि बिस्वास नि करदु।

³ पर परमेस्वर बिस्वास का काबिल च, इलै उ तुमतै बिस्वास मा मजबूत बणै के रखलु, अर दुष्‍ट शैतान बटि बचै के रखलु।

⁴ अर तुम लोगु का बारा मा हमतै परमेस्वर पर पूरु बिस्वास च, कि जु कुछ भि हम लोगु न तुमतै सिखै, वु सब बात तुम मनणा छाँ अर हमेसा मनणा रैल्या।

⁵ अर हम तुम लोगु खुणि इन प्रार्थना करद्‍यां, कि यीशु मसीह तुमतै परमेस्वर का प्यार की तरफा लेके जौ, अर जन दुख-तकलीफ प्रभु यीशु न उठे, उन्‍नि दुख-तकलीफ सौणु खुणि प्रभु यीशु तुमरि मदद भि करलु।

अळकसि नि होण का खातिर चितौण

⁶ हे मेरा भै-बैंणो, हम प्रभु यीशु मसीह का द्‍वारा दियां अधिकार से तुमतै आज्ञा देन्द्‍यां, कि बिस्वासी लोगु मा जु अळकसि छिन अर हमरि दिईं शिक्षा को पालन नि करदिन, ऊंका दगड़ा मा नि रा।

⁷ किलैकि तुम खुद जणद्‍यां, कि जन हमुन कैरी उन्‍नि तुमतै भि करण चयेणु। अर जब हम तुमरा दगड़ा मा छा, त हम अळकसि बणि के नि रयां।

⁸ अर हमुन मुफत मा कै की रुट्‍टी नि खै, पर दिन-रात खून पसीना बुगै के मेनत कैरी, ताकि कै खुणि हम भारु नि बणि जां।

⁹ जब की हमरा पास यू अधिकार च कि हम तुम बटि पूरि मदद ल्या, मगर हम खुद तुम खुणि एक उदारण बणि ग्यां, ताकि तुम सिखी जा कि जन हम लोगु न कैरी उन्‍नि तुम भि कैरा।

¹⁰ अर जब हम तुमरा दगड़ा मा छा, त हमुन तुमतै एक बात सिखै छै, कि अगर कै की काम-धाम करण कि इच्छा नि हो, त वेतैं खाणु भि नि खाण चयेणु।

¹¹ पर येका बाद भि हमतै इन पता चलि, कि तुम लोगु मा बटि कुछ लोग इन छिन जु की अळकसि जीवन जीणा छिन। अर ऊ कुछ काम-काज नि करदिन, पर दुसरा लोगु का काम-काजों मा टांग अड़ौन्दिन।

¹² अर इन्द्रया लोगु तैं हम प्रभु यीशु मसीह का द्‍वारा दियां अधिकार से आज्ञा देन्द्‍यां, अर समझौद्‍यां कि ऊ चुपचाप काम कैरिके अपणा खाणुक खुणि खुद ही पैसा कमा।

¹³ पर हे मेरा भै-बैंणो, तुम भलै करण मा नि थका।

¹⁴ अगर कुई हमरि ईं चिठ्‍ठी मा लिखीं बातों को पालन नि करदु, त वेतैं दिख्यां कि उ छैई कु च, अर वेको साथ नि दियां ताकि उ खुद मा बेजती मैसूस कैरो।

¹⁵ पर तभि भि वेतैं दुसमन नि समझा, पर एक बिस्वासी भै समझि के सीखा।

आखिरी सलाम

¹⁶ अब हम इन प्रार्थना करद्‍यां, कि शान्ति देण वळु प्रभु हरेक बात मा तुमतै शान्ति द्‍यो अर तुमरा दगड़ा मा रौ।

¹⁷ अर मि पौलुस खुद अपणा हाथळ तुम खुणि सलाम लिखणु छौं। अर मि अपणी हर चिठ्‍ठी मा इन्‍नि सलाम लिखदु, ताकि हरेक तैं इन पता चलि जौ, कि या चिठ्‍ठी मिन ही लिखीं।

¹⁸ अर हम इन भि प्रार्थना करद्‍यां, कि हमरा प्रभु यीशु मसीह की किरपा तुम सभ्यों पर होणी रौ।